O LA’U TALA FO’I

17 May 2016, 12:00AM

1. Matauina i Tala Fou e faapea o le si’isi’i o le Tai ma le la’uina o le oneone –ua pogai ai ona se’e i uta le afioga o Solosolo-ma e tusa ai ma lea tala-fai mai o le Tusunami o le 2009-lea na fono ai -talanoaina ma faamaonia ai e le afioaga o Solosolo -ina ia se’e i uta-ma fai mai o le to’atele o le afioaga sa auai-na malilie e toe se’e le nuu i uta-ina ua latou vaaia le faafitauli o le a feagai ma le nuu!

Fai mai e ui lava ina le manatu mamafa le toatele i le mata’utia o lea tulaga-ae fai mai Toomata-talu ai ona ua taulamua le faife’au o le Ekalesia Faapotopotoga Kerisiano i lea tulaga-o lea na mulimuli atu ai ma le toatele o isi tagata. O le finagalo faaalia la o le Afioga a Toomata Nora Leota-e le na o le natura ua pogai ai ia faafitauli i le afioaga- ae o loo aafia ai foi ma tagata! Ia afai la o le tulaga lea ua aafia ai le afioaga o Solosolo-o le a faapea foi ona feagai nuu uma lava ma afioaga tu-matafaga ma lenei faafitauli- ona o suiga ogaoga o le Tau ma uiga o aso i nei ona po! Afai la o lea-o le a se mea e ao ina tatou faia e fo’ia ai lea faafitauli? O le a sou taofi?

2. Matauina foi i Talaa Fou se ulutala fai mai ua matua fefeu lava le faiga o loo faafoe ai le tatalaina i tua o pagota mai Tafaigata. O se faaaliga lea a le fofoga o le Falepuipui i Tafaigata-o Sagaga Galu Frost. Fai mai e sili atu i le 20 pagota na tatala i tua i le faaiuga o le vaiaso-mo le faamanatuina o le Aso o Tina.O le toatele la o i latou na tatala i tua- o alii ae na o le to’alua lava tamaitai na tuuina atu i ai le avanoa e faaaoga ai lea aso- e mafuta ai ma aiga.E tusa ai ma le faaaliga a Sagaga Galu Frost-o lea faaiuga na mafua ona fai-ona o le saogalemu o le atunuu-talu ai le anoano o soligatulafono na toe tulai mai- i le faagasologa o aso malolo.

Fai mai o le faamanatuina o le Eseta-na tulai mai ai se faalavelave i Savaii-lea na susunu ai e se pagota se taavale afi-o le isi faalavelave talu ai nei –o le sola ese lea o se pagota mata’utia mai Tafaigata ma fasi faamo’amo’a se tagata faipisinisi. Fai mai la Sagaga- o nei faalavelave uma- ua mafua ai ona fai lea faaiuga. O lona uiga- la e foliga mai-ua amata ona popona ma faataua e le Vaega o Falepuipui- ona tiute fai-aemaise ai o le saogalemu lea o le atunuu lautele! O le a sou taofi?

3. Matauina i Tala Fou-ua fesiligia e le Palemia le auina atu i fafo o ‘ietoga-ma ua faaalia ai le popole o le Palemia-ona o le a tuua e ‘ie toaga Samoa le atunuu. O lea la popolega o le Palemia- na faaalia ina ua mae’a le “faalelega-pepe” faale-tausaga-lea na faatino i luma o le fale o le malo.E ui lava la ina faafetaia e ia le taumafaiga a tina- e toe faaolaola le lalagaina o ‘ietoga’-ae na ia faailoa atu- ua uma ona fai se tapu i totonu o NIu Sila i vaitaimi o faiga-malo faa-kolone-e lalaga ma tausi ai ietoga i totonu o le atunuu.

O lea ua faailoa mai ia te a’u lenei mataupu e uiga i ‘ietoga-fai mai ua avatu i atunuu mamao…! Ia- e moni lava o ‘ietoga e faapito mo le tatou aganuu ma faalavelave fai-ma e pei lava o le masani a Samoa i aso ua mavae-poo le a lava le leva o le taimi- e tausi lava ietoga mo le aganuu.

Ae afai la ua ese nei aso-aemaise ai o le faateteleina o le mativa ma le le tagolia ua i ai nei le atunuu-o le a la le aoga e faatigaina ai tina o le atunuu e lalaga nei ietoga-ae le o mafai ona faatau atu e maua ai se taui mo lo latou afu maligi? Afai la o lenei galuega o le lalaga o ietoga e le faigofie-o maua la se taui mo tina o Samoa o loo faatinoina lea pitolaau-mai le Malo? Afai e leai-tu’u pea tina ia e faatau atu a latou ietoga-e tausi ai o latou aiga ma latou fanau! O le a sou taofi?

17 May 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>