Tapena ma Tuufaatasi e Fuimaono Na’oia Faasavalu Touli F.Tupua mo le Samoa Observer

FALE’ULA: E tusa ai ma suesuega ma faamaumaua a Papalagi, fai mai e aofia ai Foga’a. Fale’ula ma Totoamea lea fai mai e i uta i le itu i sisifo. O Foga’a e taoto latalata i le sami i luga o se tolotolo papa maulalo i le itu i sisifo o Upolu, ma faasolo atu ai i totonu o se aloalo. O Totoamea e le mamao ese ma le tuaoi e amata ai Malie.

O le igoa o ‘Fale’ula ‘ e pei e afua mai tua i le Fale’ula o le Tuimanu’a, lea na aumai i Upolu nei e le afafine o le Feepo. E pei ona ta’ua i luga, o Fale’ula o le isi ‘afa lea o le Faleono o Leatigaga; ma o loo faaalia i le faalupega i lalo o le Faletolu i le Aoao Tetele o le Tuamasaga.

O Upu Taoto la o Faleula e faapea:- “Tulouna Oe le Faletolu; Tulouna Seupule, Taogaga ma Nuuialii; Afio mai Lau Afioga Telea; Afio mai Loau; Tulouna Tuimaugapo, ma Niulevaea o Ma’upu a le Tuiaana. 

FALEATA: E aofia ai nu’u o Vaimoso, Lepea, Vailoa, Vaiusu, Vaitele, Saena, Toamua, Safune, Puipaa, Tiapepe ma Utuavaava mai sasa’e i sisifo. O nisi o nei nuu o nuu mavae, e pei o Vaimoso ma Vaiusu, o isi sa na o fale sa i ai i aso ua mavae, mo se faataitaiga o Lepea ma Puipaa ma isi. O le itu i sasa’e o Vaimoso o loo i ai Taufusi.

O Vaimoso lava ia e tolu ona vaega sa vaevae ai ma sa faaigoaina o “Taumuafa” lea e aga’i i uta e pei o se li’o. O lea nuu fai mai sueseuga a Papalagi na faavae i le 1850 i le taimi o se taua tele. O le vaevaega o lea nuu sa faaigoaina o Tuāolō poo tua o le ‘olo, “Loto’olo” poo totonu o le ‘olo ma “Tuā’olo” poo tua o le ‘olo. E latalata Vaimoso i se vaipuna, ae o le pito i uta sa i ai le tele o nuu e pei o ‘Ululoloa ma Alafua.

O Alafua sa lagomau ai le Tupu o I’amafana a’o le’i toe liu-tofaga atu i Faleolo i Satapuala. O le itu i sisifo o Vaimoso sa i ai se vai-pe i lona tuaoi; ae o aso nei o lea ua ta’oto ai le ala i Vaitele.

O le itu i sisifo i se mamao e kuata itula-o loo taoto ai Lepea-lea e afio ai Faumuina-ma sa tu ai se Fale mo Aitu e pei ona faamaumauina e Misi Situpe; ma i totonu o lea fale- e pei foi o le fale i Apolima-sa tautau ai se ato i lona talitali, ma o le nofoaga lea o se temoni. O Lepea e i ai le malae o taua- e igoa o “Lavega.” O iinei la i le itu i sasa’e o loo ta’oto ai le Tia o Moegagogo-le tua’a o Tamasese matua.

O ona tala atu o Pesega-lea ua nofoia i aso nei e se a’oga a le Ekalesia Mamona; ae sa pulea muamua e Mataafa o Faleata, talu ai o “Lepesega”o se suafa ma o loo faamanatuina pea i Atua.

O tala atu teisi o Lepea o loo i ai le vaitafe o “Fuluasou”lea e le mativa i se suavai i soo se taimi. O lona ituvai i le itu tauagavale latalata i le auala o loo taoto ai le Malae mai anamua o “Vaitagutu”- lea fai mai a mana’omia e tagata matitiva se mea-ona latou ifo to’ele lea i luma o le “Tauaitu”. Poo le isi sefulu minute o loo taoto ai Vailoa, ae o loo faasaga mai ia te ia Vaiusu.

A o’o mai la i lenei vaega, o nuu uma lava e i le itu i gauta ona o le tele o toga-togo ma taufusi. O Vaiusu e taoto faalava i luga o se faga faataamilo i luga o se maupu’epu’e i luga o le matafaga o se aloalo, lea e matua pe- pe a pe le tai.

O iinei la-e alu ai le ala i uta i le Malae o “Moafanatau” poo le malae o Toa. O le tuaoi o Vailoa ma Vaiusu o loo i ai se vaipuna ma se vai taele. O le aga’i teisi atu mai Vaiusu o loo i ai Vaitele lea sa nofoia e se kamupani fai faatoaga, ae sa tumau pea le igoa o lea nuu.

O le faasolo atu i luga o le matafaga o loo i ai Saina ma Toamua lea o loo ta’ua i le tala o Leatiogie-ona soso’o ai lea ma le Falesa o Safune le o loo i luga o se tolotolo. O Safune e faapea se taofi o se kolone o Safune i Savaii.

O le igoa la o Faleata e afua mai tua ia Ata -o lona sootaga tau toto e tau ia Malietoa, ona o ia o se tasi o tamā o le aiga ma e i ai lona sootaga ia Faleata ma le suafa Mataafa na afua mai ai- ma o le lālā lea o le Aiga Salevalasi i Atua lea na ia maua le suafa Mataafa lea e faae’e atu e Faleata.

O le suafa “Lepesega”e pei ona ta’ua e i Tuana’i foi faatasi ma le suafa o Folasaitu. Na maua e Faleata le tele o sootaga ma aiga taua ona o Letelesa  o Faleata lea e fesootai ma Faumuina i Lepea, ae le ona pau lea o le pogai ua mamalu ai, talu ai e ta’uta’ua foi i lona toa i taua e pei o le taimi o Atiogie ma lona tamā o Feepo lea sa nofo i gauta o Toamua i A’ele lea sa i ai le faatoaga a le Kamupani o D.H.P.G. Sa faaigoaina Faleata o le “Faleo’o-o-faigamalo”ma na faavae e Tuna, le uso o Malietoa Savea.

O lana ‘autau totoa sa faaigoa o le “Moa Fanatau”sa matua iloga lo  latou totoa i le taimi o le Tupu o Fonoti-lea na latou tulia ‘au a Aana, ma faato’ilalo ai e le Tulafale o Vele o Faleata Mano’o o Samatau i se fetauiga uiga ese.O le pogai lea ua maua ai e Faleata le avanoa i le taimi o le ‘ava e aunoa ma le alagaina.

A taumafa ‘ava se alii o Faleata-ona faapea lea o isi tagata-“Aumai le ‘afa ma a’u poo sina mea itiiti.” O le uiga lea o le muagagana e fai ia Une:-“A ua to’ia Oe e manū-ia faalua ia te a’u o le ‘autūtū.”. O Faleata la o le Itu’au tasi-talu ai lona malosi.

E ‘au faatasi ma le Alataua i Safata-ma e anoano tusitusiga a Misi Situpe e uiga i lea sootaga. O Upu Taoto la o Faleata e faapea:-“Tulouna Oe Faleata; Tulouna Oe le Tauaitu; Tulouna Aiga e Fa; Tulouna Alii e Lua; Susu mai lau Susuga Matai’a; Afio mai lau Afioga Faumuina; Susu mai Lau Susuga Seiuli o le Alo o Malietoa; Tulouna lou Alii o le Mataafa.