Ua toe faaui i tua le Talosaga

Tusia Lanuola Tusani Tupufia ,

196 Hits

Ua faasaoina le Sui Usufono o le Palemene mo le Alataua Sisifo, o Aliimalemanu Alofa Tu’u’au e faaauau lana tautua e lima tausaga i totonu o le Palemene.

O lea tulaga na soso’o ai ma se faaiuga mai le Sui Usufono muamua o le Palemene mo lea itumalo, o Lafaitele Patrick Lei’ataualesa, e toe faaui i tua lana talosaga tau faiga-palota ananafi.

Na tuua’ia e Lafaitele lona fili ona o faiga pi’opi’o ma le tau faasese i le faagasologa o le Faiga-Palota Lautele. O Loia o Eliota Fuimaono Sapolu ma Unasa Iuni Sapolu sa fai ma ona sui i totonu o le Faamasinoga.

O Amelia Faasau sa fai ma sui o Aliimalemanu. Ina ua faailoa atu i le Faamasinoga se maliega na faatau malilie i ai itu auai i le faagasologa o feutanaiga, fai mai Mr. Fuimaono Sapolu e le o malosi lelei lana paaga ma o lea ua le mafai ai ona auai i taualumaga.

Ae peita’i ua uma ona faatonuina i matou e la matou paaga ina ia toe faaui i tua le talosaga,” o lana faaaliga lea.”O le Faamasino Sili, Lana Afioga Patu Tiava’asu’e Falefatu Sapolu o se tasi lea o faamasino e to’alua sa auai.

O le isi o le Alii Faamasino o Lesatele Rapi Vaai. Na faaalia e Lana Afioga o Patu i le Faamasinoga na te le mafai ona faailoa atu le maliega na malilie i ai i le faagasologa o le feutanaiga-talu ai-o se mea faalilolilo lea.

“Ae peitai o le a fai e le Faamasinoga sana poloaiga e faapea o le faasilasilaga o le lafo poo le talosaga mo le toe faaui i tua o le talosaga o le a lomia faasalalau i totonu o se nusipepa taeao,” o lana faaaliga lea.

“O lenei mataupu o le a toe valaauina i le Aso Lua 3 o Me ina ia tuuina atu i itu auai le taimi e faamae’a ai le taualumaga o le toe faaui i tua e pei ona faataoto i totonu o tulafono.”.

O le Faamasino Sili o Patu na ia faafetaia le galuega a loia na aafia ai. Na ia faafetaia foi le itumalo o loo aafia i lea mataupu mo le latou lagolago faapea foi ma le itu talosaga ona ua toe sui lo lona finagalo. 

“E ui lava ina lugā ma lalō ae o lea lava ua fo’ia,” o lana faaaliga lea. I fafo ane o le Faamasinoga, o Aliimalemanu o se tamaitai lea ua sili ona fiafia. “Ou te faafetaia le Atua ona o lea ua maua le to’afilemu ma o lea ua fo’ia le mataupu, o se ala lea sa ‘ou mana’omia,” o le faaaliga lea a le Sui Usufono tamaitai o le Palemene.

 “O le agaga lenei o i tatou tagata Samoa, tatou te manana’o e fo’ia mea ae le o le aumai i le Faamasinoga. Ou te faafetaia le vaega o feutanaiga mo le latou matafaioi ma lo’i itumalo ma aiga mo le latou lagolago i le faagasologa o lenei mataupu.” 

Ae peitai, sa le auai Mr. Fuimaono Sapolu i lea tulaga fiafia. “O lea ua tatou maua nei mea faaletonu i totonu o nuu tau le solia o le tulafono ma e le mafai ona o’o i le Famasinoga,” o lana faaaliga lea.

“E ese ai mai le sui o le tulafono e fo’ia ai faiga tau faasese i le taimi nei, o lea ua sui le tulafono…o loo i ai se mea o iinei o loo taofia ai ona o’o mai i le Faamasinoga ma se mea o loo i le va.

Ua tatau ona tatou amata talanoa i lea itu-muamua o loo i ai se mea o loo tupu.” Na toe ta’ua e le loia e faapea “e i ai se tamaitiiti ua saisai mo le faatauina atu o se lau (marijuana) ma tuuina atu i le falepuipui.

“O le mea moni lava ia-ua ia te a’u le tulafono ae na te le o puipuia soo se tagata i totonu o le nuu.”A’o lumana’i ai se sainiga o le maliega, sa faailoa atu e Mr. Fuimaono Sapolu i le Faamasinoga e faapea sa le mafai e itu auai ona ona ausia se faaiuga lelei i le Aso Tofi.

“E tusa ai ma lenei faamasinoga-sa matua sili ona faigata talu ai le una’ia malosi o la matou paaga,” o le faaaliga lea a Sapolu. “E ono mafai ona matou feiloa’i mai talanoa e uiga i se feutanaiga ae o le savali mai lea potu i lenei potu o le Faamasinoga e mafai ai ona suia ni mea.

O se unaiga faigata lau Afioga le aga’i o mea i tua ma luma.”O lenei talosaga o se tasi lea o talosaga e fai na toe faaui i tua i lenei vaiaso. O isi talosaga e aafia ai le Fofoga Fetalai o le Palemene, o Le’aupepe Toleafoa Faafisi, le Sui Usufono o le Urban West o Faumuina Wayne Fonga ma le Faipule o Falelatai ma Samatau o Taefu Lemi. 

© Samoa Observer 2016

Developed by Samoa Observer in Apia