“O Keriso, o Mea Uma ia i Mea Uma”

451 Hits

Petaia Setu

Petaia Setu

O Salamasina, o le uluai tupu tafa’ifā lava lea o Samoa. Sa faaeaea ia te ia le atunuu auā sa faa-ao iai Samoa. Sa ia te ia pa’ia ma mamalu uma o le atunuu auā sa ia tauavea pāpā o le Tuiatua, o le Tuiaana, o le Gatoaitele, ma le Vaetamasoālii.

Ua ia te ia mea uma auā ua finagalo So’oa’emalelagi ia mau ai ia Salamasina mea uma. O se ata faapea sa faamalamalama atu ai e Paulo le Alii o Iesu Keriso i le ekalesia i Kolose. E mătua i tumu i mea uma. Auā ua finagalo le Tamā ia mau i totonu ia te ia le tumu atoatoa.(f.19)\

O Kolose, o se aai e le telē tele e i le itū i sasa’e o Efeso pe tusa ma le selau maila. Sa faatuina ai e le tagata lea o Epafara le lotu Kerisiano. O Epafara, o se alii sa faaolaina ia Keriso e Paulo i lana galuega molimau i Efeso.

E manaia le galuega i Kolose, ua faafiafiaina ai foi le aposetolo. Peitai, e le ’asa lava foi ma faafitauli. Ua sao i totonu o le ekalesia nisi talitonuga ma aoaoga sesē. I le, ua fetosoaiina ai loto ma manatu o se isi vaega o le ekalesia, aemaise lava le vaega fou.

O le faamamafa la a le aposetolo i lana tusi nei i le ekalesia, “O Keriso.” O ai Keriso. O le Keriso a le ekalesia. O le Keriso a le lotu kerisiano. O Keriso, o le tumutumu ia. O le ulu ia o le tino(o le ekalesia). O le ao o le ekalesia.

O le ulumatua o mea uma lava ua faia. Fai mai foi le molimau faamaoni a le atalii o Sepetaio, “Sa i le amataga; sa i le Atua. O ia lava sa i le Atua i le amataga. E leai foi se mea e tasi na faia e le i faia e ia.”(Ioane.1:1-3).

O lona uiga, e muamua i mea uma. Sa iai lava foi o ia, a o le i iai lava se mea e tasi i le amataga. Poo fea lava e taamilo ane ai le poto o le lalolagi ma ana faiga faapolokiki, e manino lelei i le Alii.

Na te silafia mea lilo uma lava, o manatunatuga ma loto o tagata; o upu foi ma galuega uma lava.

O le toilalo o le ekalesia i Kolose, “o le lē maua’a i le Alii.” O le ala foi lea o le faigofie ona sao o le fili ma togafiti a le alii o lenei lalolagi, auā ua leai ni o tatou a’a e mau ai ia Keriso Iesu.

O aoaoga sesē ia ua afaina ai le faatuatuaga o le ekalesia i Kolose, ua latou aveesea ai Keriso mai le tumutumuga o lo latou faatuatuaga, ma teena ai le tulaga faa-ao o Iesu i lana ekalesia. O afaina foi ia ole galuega a le ekalesia Samoa.

Ua na ona taulagi o Iesu Keriso o le Ulu o le ekalesia, ae leai, ua tatou faoa le tulaga faa-ao o Le ua ulumatua i mea uma na faia. Ua tatou tulei ese Iesu ae faatietie ai oe i le nofoalii o Iesu.

Tatou te pale loa i tofiga taualoa ma mamalu o le lalolagi nei, leai loa se tulaga o Iesu. Ua e manatu loa faa-Nepukanesa. Ua ia te oe le paoa. Ua e pule i mea uma. Ua na o oe lava ma le lalolagi uma. Ae leai lava.

E le mafai ona maua e se tagata soifua le atoatoa o mea uma. Auā foi ua le tuuina atu iai e le Atua i se tagata, a o Iesu(f.19).

E tāua tele la le tusi nei e le gata i le ekalesia i Kolose, ae sa faapea foi ona naunau o le aposetolo, ina ia faitau ma iloa e isi nuu tuaoi e pei o Laotikaia ma isi. Aemaise ai foi, ua sili ona tāua mo oe ma tatou uma.

Auā ua matuā faamanino mai ai e Paulo le uiga atoa o Iesu Keriso. O le tōfa a le Atua mo le faaolaina o le lalolagi. O le tulaga o le Keriso i mea uma lava, ma le faamoemoe o Iesu i tagata taitoatasi uma lava.

E leai se mea e lilo i le Alii. Auā sa iai lava ia i le amataga. Ua faapea isi leo e masani ona faalogo ai, “o le mătua o ou tausaga, o le mătua foi lena o lou iloa.” O le ā la sau fua i le Keriso? O le ulumatua o mea uma na faia!

O le ulua’i o mea uma lava, o loo faatumauina foi mea uma lava ia te ia. O le ulu foi o ia o le tino, o le ekalesia lea. O le amataga o ia. O le ulumatua o ē ua oti, ina ia fai o ia ma faasilisili i mea uma lava. Auā ua finagalo le Tamā ia fai o ia ma mea uma i mea uma lava(f.15-19).

Le au uso e, o le upu moni, soo se vaega o lou olaga, e fetaui lava iai Iesu. Se ā e te le mapu tasi ifo ai i lalo, ae se i fai Iesu ma ou faaa’oa’o? Alaala ane Samoa i ou seetaga malū, ae tuu o tatou faiva e faatautai e Iesu.

Tuu iai. Tuu ane Iesu e fai ma ou taitai auā o ia o le Taitai. Fai Iesu ma ou pule auā o ia o le Pule. Faia o Ia ma Ulu o lou aiga, o lou nuu, o lou itūmālo, auā o le Ulu Ola ia.

Le ekalesia e, o afea ea e te talia ai Iesu Keriso ma toe faafoi ane i lona tulaga o ia o le Ulu? O le Ao o le ekalesia? Ne i e manatu ua valea lenei fesili. Uso e, e leai. Ua alofa tele le fesili. O leaga ua sao i totonu o le ekalesia i Kolose, o iinā foi o loo tauaso ai oe.

Ua e manao e tino oe, toe asosi  i le ulu, ae faapefea Iesu? O ’e silafia o Iesu Keriso lea ua finagalo ai le Tamā ia mau i totonu ia te ia le tumu o mea uma?(f.19)

O le malamalama fou lea i Kolose. Ia pipii le tino i le ulu. Ia mau o outou a’a ia Keriso. O se laau ua leai ni ona a’a, e mate lava ia. O a’a foi na te le maua se eleele lelei, e le gata ina faalautagitagi, ae le maua ai se fua lelei.

O le feau mo le ekalesia i Kolose ma le ekalesia Samoa, ia tutumau i le Alii, o le Ulu ia o le ekalesia. Ia maua’a ma atina’e ia Iesu Keriso, o le Ao ia o le ekalesia. I le ma lenei, alii, e tasi lava le ulu! E tasi. Na o Iesu.

Sa iai i le Atua i le amataga. O le mătua i tumu o tatou le lalolagi o tagata. O le tumu atoatoa o mea uma lava.

Le atunuu e, Samoa ma lau faigā mālo, o le malae i Tiafau, sa su’e ola ai Samoa anamua. Sa tili iai ola. O ona faiva sa talisoa e le atunuu. O ana upufai sa faamălieina ai le galala o nuu ma itumālo.

O lana faapolopolo sa tua iai le atunuu. O lona ola, sa fai ma mea uma mo Samoa. Mai fea lea ola? E tupu mai fea sea lelei? Sa fai le Atua ma Ao o le Malae. Sa fai ma Ulu o le Maota. Sa fai mea faalogo iai le fono. Sa ’oa ai le faatōfāla’iga. Na mau ai manatu. Sa tumu ai le tuu. Auā o le mătua i tumu. O ia o le Amataga. O le ulua’i o mea uma. E mătua iai mea uma. E ana mea uma lava. O lana galuega foi tatou.

Le au uso e, poo le a lava lou tofi ma lou tulaga i lou aiga, i le nuu, itūmālo, poo le a’oga foi ma lau galuega, ia e manatua, o oe o le lima, o oe o le vae, o le auauna. E le o le ulu oe. Poo ai lava oe i le maota o le palemene, o oe o le tino. O le tino faalogo ma galue. O le tino auauna. E le o le ulu oe. O le ulu Iesu Keriso o le palemene o Samoa. O le ao ia o le faigā mālo.

O le “faatuatua”, “alofa”, ma le “faamoemoe”(F4,5), o upu tāua lava ia e fiafia iai le aposetolo i lana tusi nei i Kolose. Ia faatuatua tagata uma i le Alii, ia alofa i tagata uma, ma ia taula’i le faamoemoe i le lagi. O a’a ia Samoa, e le mafai ai e Satani ma ana ’au ona mālo ia te oe. Ia mau a’a ia i le Alii o Iesu Keriso. “Auā afai ua ’au ma i tatou le Alii, o ai se faasaga tau mai ia i tatou?”(Rom.8:31). Poo a lava ma’i ma to’atugā o le soifuaga nei, ia tumau i le Alii i le faatuatua. O le tali lava ia o o tatou mafatiaga. O le Alii ia o mea uma i mea uma lava. Auā o le alofa lava ia.

Samoa pele e, ia maua Keriso. Ma ia tumau ai. Auā e le maua se atoaga o mea uma o loo e sailia i le lalolagi nei. O le tino tatou o Keriso. Ia tatou pipii mau i le pogai. O le ulu ia o i tatou. O le pogai ia o oe ma a’u. O le ola ia o tatou uma. A tatou maua Iesu Keriso, oka, ua tatou maua mea uma! Aleluia! Auā o Keriso, o mea uma lava ia i mea uma. “Auā ua finagalo le Tamā, ia mau i totonu ia te ia, le tumu atoatoa.”

 Amene

Petaia Setu

E-mail: petaiasetu@gmail.com

7737063/7783782

© Samoa Observer 2016

Developed by Samoa Observer in Apia