Manatu o le Fa’atonu - Atonu e mafai ona latou faia se teuteuga mulimuli e tasi

By Mata'afa Keni Lesa 17 April 2016, 12:00AM

O le mea moni lenei e le mafai ona faafitia.

Pe o le faiga faa-Samoa e uiga i le faamagalo atu ma le fealofani o se mea e le’i maua lava e le lalolagi poo ona o i tatou o se atunuu uiga ese e faapalepale i mea sese, faiga pi’opi’o ma le ituaiga o amio lea e masani ona taunuu ai isi lava tagata i le falepuipui.

Poo le fea lava ituaiga o mafaufauga e te talitonu ma ‘ou talitonu  i ai , e leai se afaina tele o lena itu. O le a le suia ai lava le mea moni e faapea o mea na tutupu i nai vaiaso ua mavae atu i totonu o le atunuu ma le lalolagi atoa o le a tuua ai se faailoga e le ma tineia i luga o le igoa o Samoa i mata o le lalolagi.

O le mea moni, o feliuaiga ma pioga i totonu o taualumaga o talosaga tau le faiga-palota ua leva ona tatou tuli-mata’ia i lenei vaiaso- ua matua faapitoa lava lona uiga ese i se faaupuga itiiti. 

O ia tulaga o le mea moni ua tatau ona sui ai le silasila i totonu o le tele o nofoaga ma le faamoemoe e faapea o loo i ai lava se mea e matua uiga ese lava i totonu o lenei parataise manaia.

O le mea moni e faapea e fa talosaga sa tuua’ia ai faiga pi’opi’o i le faagasologa o le Faiga-Palota Lautele-na toe faaui i tua-o nisi i lalo o ni tulaga faigata-ia e le gata ina uiga ese ae le masani ai.

O ia tulaga e uiga ese ma e tau faafefe..  O se mea faa-Kerisiano ma e matua le faa-kerisiano lava. O le Faamagalo atu o le isi lea mea ae o le faamalumalu i mea sese ma le una’ia o lea amio leaga o le isi lea mea-a ‘ea? 

Ma o ia e faaiuga ua talafeagai ai ma le aganuu a Samoa? Ioe pe o le leai.

O a tatou aganuu o le ‘ava fatafata, va fealoaloa’i ma le tofā mamao ua faailoa mai ai ia i tatou e faapea o ia faaiuga e le o ‘ausia le tuaoi o mea e mafai ona fai ae o le uiga ‘ea o lenei mea e faapea o la tatou aganuu e fai mea pi’opi’o?

E e le o le tatou aganuu ea faa-Samoa o le fai lea o le mea sa’o? 

O le taimi mulimuli na matou siakiina ai, o tatou tua’ā na tuuina mai ia i tatou se aganuu e siitia ai le amiotonu, amio, ma faiga faavae, faiga tausisia ma le tulaga lelei. O lea ua lagā se fesili, o le faamoemoe ‘ea o faiga-palota o se mea faa-Samoa?

O le temokalasi ‘ea o se mafaufauga lea faa-Samoa?  O le faamasinoga ‘ea o se fuafuaga lea O tulafono ‘ea o loo faafoe ai le atunuu i aso nei-e tusa ai ma lenei mataupu-o le faiga palota o ni fuafua faa-Samoa?

O le tali o le matua leai lava. Ia-aisea lava ua tatou faaaogaina ai le aganuu a Samoa i mea e le o ni mea a Samoa? O fea o i ai le fai mea sa’o i totonu o nei mea uma?

O fea o i ai le fai mea tonu i lenei mataqupu? 

O fea tatou te vaaia ai foliga o le Atua i totonu o nei mea uma? Matou te talia e faapea o ni fesili faigata nei ma lu’itau i le mafaufau. Ae peitai, o ni fesili e tatau ai ma e tatau ona tuuina atu i lenei lava taimi-aimaise ai lava lo tatou vaaia o ni mea fou ua tatou vaaia.

O le aloa’ia ma le talia faale-tulafono o faiga pi’opi’o e pei ona tuua’ia i le faagasologa o le faiga-palota ae faalafi i lalo o le aganuu  ona o sootaga lelei e le o se mea lea e tatau ona manatu māmā i ai.

O Oe ma A’u, i le avea ma tausi-mea o la tatou aganuu, mea faatauaina ma mea tausi, ua ia i tatou se avega tauave e faataoto ai se tofi faasolo mo le lumana’i o lenei atunuu ina ia mitamita ai. 

E tatau ona tatou faataatia ni faata’ita’iga tatou te manana’o ina ia latou mulimuli ai.

O nei ‘ea faata’ita’iga e tatau ona mitamita ai? Ia, o se mea sa’o la ona fai faatosina ma faatau tagata palota ina ia sao ai i totonu o le Palemene? O se faiga fou lena?

O lenei ‘ea mea o se tofi tuufaasolo tatou te manana’o e tu’u mo tupulaga o lalovaoa o lenei atunuu? Ua uma ona matou faailoa atu muamua lenei mataupu ma o le a matou toe faailoa atu aofi, afai o le tulga lena o le a i ai, aisea la tatou te manaomia ai se faiga tau le Faamasnoga?

Aisea tatou te manaomia ai ni tulafono? O ai na te manaomia se Palemene na te faia ni tulafono ae o nisi o e faia tulafono e le tatau ona i totonu o le Palemene? Matou te toe faamanatu tasi atu e faapea i Samoa nei i aso uma lava, o loo tuuina atu nai tagata vaivai i le falepuipui ma taofia ai ina ia mautali atu mo ni nai solitulafono laiti.

Aisea e le mafai ai ona tatou faamagalo atu ma faagalo tagata solitulafono uma lava? Aisea tatou te le faaleaogaina ai le faiga tau faamasinoga pe afai ona pau o le mea e tatau ona tatou faia e fo’ia ai mataupu o le talanoa, faataloga ma ta’u upu-si’i mai le Tusi Paia?  E ono mafai ona faapea o le faiga fou lenei mo polokiki a Samoa

O le mea taua lava i totonu o nei mea uma e faapea ua uma ona tatou vaaia i le faagasologa o talosaga tau faiga-palota e faapea o loo aafia ai sui o le H.R.P.P. Ona tulai mai ai lea o se mafaufauga. Ona o le pule poo le paoa ua latou maua-atonu e mafai e lenei faigamalo ona toe faaopoopo se teuteuga lava e tasi i le latou lisi uiga ese o teuteuga na o latou faia i tulafono a lenei atunuu i le tele o tausaga ua te’a.  

E tatau ona latou tilotilo i le suiga o le tulafono o Faiga-Palota ina ia tuusaunoa ai sui auai uma lava o le H.R.P.P.mai talosaga ma faiga pi’opi’o tau le faiga-palota-pe o soo se isi lava ituaiga o faiga pi’opi’o e tusa ai ma lea mataupu.

E leai se mea o i ai e taofia ai i latou mai le faiga o lea tulaga. Ua ia i latou fuainumera ma le mautinoa lelei o le paoa uma o i le lalolagi.

O le a sou taofi?  Ia outou maua Samoa se Aso Sa e mapu lelei ai, ma ia faamanuia atu le Atua!

By Mata'afa Keni Lesa 17 April 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>