Noatia le avetaavale onā i le mata’utia o le fetoa’iga o taavale i le po

Tusia Pai Mulitalo Ale ma Faaliliu e Seagaitumua Tupuola ,

223 Hits

O le avetaavale lea na ia so’a tua o ni taavale se lua i Apia i le faagasologa o se feeseeseaiga ona ua onanā ua uma ona molia ma o le a tula’i i totonu le Faamasinoga i le aso 19 o Aperila 2016.

Na faamaonia lea tulaga e le Alii Ofisa mo Nusipepa a le Matagaluega o Leoleo, o Maotaoalii Keioneta Kitiona..Ina ua mavae suesuega a Leoleo, fai mai Maota ua uma ona latou faamaonia e faapea o lea alii e 25 tausaga le matua sa onā ma sa le tatau lava ona ia aveina le taavale i lea po.

O lea faalavelave na tupu i le lua vaiaso talu ai i luma ane o le Fale Kalapu o le Seagan lea na so’a ai e se Nissan X isi taavale e lua sa faatu i luga o le tafā-ala.

Sa auina atu le avetaavale i le falemai lea na tuuina atu ai ia te ia ni togafitiga faanati..Fai mai Maotaoalii o le maualuga o le pasene o le ava malosi na inu e lea avetaavale i lea po e matua le talia lava. 

“O lea ituaiga o amio e le talia talu ai- e afaina ai soifua o isi sui o tagata lautele,” o le faaaliga lea a Maota. 

“Matou te fia talosaga atu i tagata uma lava ina ia faamolemole-ia faaeteete ma ia ‘aua ne’i taumafaina le ava malosi ma felaua’i i le taavale.”

© Samoa Observer 2016

Developed by Samoa Observer in Apia