“UA TU’U LE MA’A-AE MA’A I LE A’AU”-THE STONE IS REJECTED BUT A PIECE OF THE REEF IS ACCEPTED

158 Hits

Tatou te faafetaia pea le alofa ma le agalelei o le Atua-ua tatou aulia manuia ai lenei taeao Samoa.

Ia- alo maia-o le tatou talanoaga foi lenei e pei ona masani ai i Aso Sa Ta’itasi ma le mamalu o le ‘au-faitau o lenei nusipepa, aemaise ai foi o le mamalu o le atunuu o loo fiafia pea e faitau i lenei tusitusiga.

Ae pei lava ona faailoa atu pea i lea Aso Sa ma lea Aso Sa-o lenei tusitusiga-e le o se tau faaleaga-e le o se tuua’iga-e le o se tala fatu fua-ae ua na o se avanoa lava tatou te talanoa faatasi ai ma mafaufau i mea o loo tutupu i lo tatou atunuu-le pogai ua mafua ai; ae o lona itu e sili ona taua-“poo ai tonu lava e afaina ai!

Ia-o lena ua i luga le ulutala o le tatou talanoaga mo lenei Aso Sa-ma e talitonu lo’u faamoamoe-o loo manino lelei ma malamalama lona uiga. Ae ui o lea-e tatau lava ona matou fesoasoani atu e saga faamalamalama atili-ina ia maua tonu ai le aano moni o le ulutala.

Fai mai le ulutala ua faaalia i luga- “Ua tu’u le ma’a-ae ma’a i le a’au!” E faapenei la ona ‘ou faamalamalama atu. O pa’a o le sami-o lo latou nofoaga e malu ai-o lalo o ma’a tetele i le sami!

Ae fai mai le ulutala-ua tu’u poo ua lafoa’e e pa’a ia ma’a-ae ua se’e atu nonofo i le a’au. O le nofoia la e pa’a o le a’au-e le o se nofoaga lea e saogalemu mo i latou-talu ai –a sou le sami ua faatama’ia ‘amu o loo nonofo ai.

O lona uiga la- ua leai so latou saogalemu-o le a lamatia i taimi uma-e le gata i le loulouā o pea’u ma matagi vale-ae ua lamatia foi e isi o latou fili.Peita’i-e leai se mea e tasi e lamatia ai i latou-pe ana latou nonofo pea i lalo o ma’a tetele-e maua ai lo latou malu puipuia mai soo se fili-ae mafai ai foi ona latou  tali atu i le loulouā o aso!

A tatou tilotilo la i le amataga o Faamasinoga -ona o tagi na faaulu i le Faamasinoga tau le faiga-palota lautele talu ai nei-o le tulaga tonu lava lea e faatatau i ai le ulutala o le tatou talanoaga. Aisea?

A lea ua tu’u le ma’a o le Tulafono ae ma’a i le a’au poo le aganuu! O le a lona uiga? Ua tu’u le ma’a poo le Tulafono-ae ua ma’a i le aganuu! O le a lona uiga? O lea ua avatu solitulafono-a ua le faaaoga i ai le Tulafono-ae ua faaaoga i ai le aganuu?

Aisea? Ona o le mana’o e faalafi mea pi’opi’o. A tatou toe tilotilo la i tua ma le afuaga mai o le Malo Tuto’atasi o Samoa-ae faatoa fai le Tulafono o Faiga-Palota i le 1963. O le ma’a la na faata’oto e matua- e filifili lava e le itumalo ia lona Faipule.

I totonu o le Tulafono o Faiga Palota i le 1963- e na o itumalo mavae lava o le atunuu atoa ma Sui o Tagata Palota Ta’ito’atasi. O lea la ma’a na faataoto e matua-na faatoa sui ina ua tulai mai Vaega Faa-Upufai! O le a la le mea ua tatou iloa nei?

O itumalo mavae ua uma ona faata’oto -ua toe vaevae mo nisi nofoa faaopoopo e aunoa ma le fesiligia poo le logoina o ia itumalo! Poo a lava isi faiga-palota ua mavae-e matua uiga ese lava le Faiga-Palota Lautele talu ai nei!

O lona tulaga uiga ese-o talosaga uma na faaulu i le Faamasinoga e faasaga i faiga tau faasese ma faiga pi’opi’o-ua le mafai ona faatinoina e tusa ai ma le tulafono poo le ma’a ua uma ona faata’oto mo tagata uma-ae ua avatu i ai ma fasi ‘amu o le aganuu e fo’ia ai-ona o le naunau lava ia faalilo ma faalafi faiga pi’opi’o ma le soli o le tulafono!

Ia o lea ua faaaoga le aganuu e fofō ai nei faiga pi’opi’o-a’o fea le ma’a na faata’oto e matua e malu ma tausisia ai le tulafono? Afai la ua tu’u le ma’a ae tatou ma’a i le a’au-faamata la tatou te malu ai mai nisi mea pi’opi’o mata’utia i le lumana’i?

Afai la ua uma ona faamaomia le faitau miliona ma miliona o tupe a le atunuu ua maumau i faiga pi’opi’o a le Malo-e faapefea la ona tatou malu i le a’au o le punipuni o mea pi’opi’o?

A tatou tilotilo i luma atu o le Faiga-Palota Lautele talu ai nei ma sui sa faatutu mai isi itumalo aemaise ai lava itumalo o ta’ita’i o le malo-sa latou molia i latou i le faamasinoga fai mai e leai se tautua o faia i le nuu poo se monotaga!

O fea la le Tulafono o Aia Tatau a Tagata? Aisea ua avane ai le aganuu e taofi ai isi sui sa faatutu mai e tusa ai ma latou aia tatau?  Ae o le mea matautia-o nisi lava o ta’ita’I o le faigamalo sa taulamua i nei faiga uma?

O le a la le ituaiga o tautua lea na faaleaogaina ai e le Faamasinoga ia talosaga? A toe fesili-aisea ua faaaoga le tulafono i le aganuu? E tiga lava ona tautua mai tagata Samoa o loo i fafo i faalavelave ma mea e fai a o latou aiga- ae fai mai lava e leai se tautua!

O fua ia o le tu’u o le Ma’a na faata’oto e matua ae ma’a i le a’au o ‘amu e nuti gofie! O le fesili la- o le a la le tulaga e tatau ona mulimuli ai le atunuu -ae tuu loa na tulafono pe afai e le o faaaogaina?

A toe faamalamalama atili-o le fea la e mana’o le malo e fai? O le aganuu poo le tulafono? O le tali-o soo se faiga lava e mafai ona faalafi ai ia lilo mea pi’opi’o-e le taumate o le tali tonu lena!

Ia manatua la- e le faapea o le taimi muamua lenei ua fai ai ni mea pi’opi’o-o le mea ua leva tausaga o fai! Ae ui o lea-tatou te matua talitonu-e leai se mea o lilo i le Atua.

Atonu ua fai so’o ma ua o’o foi ina le malie-ae o le upu moni- e i ai lava le taimi a le Atua; ma e taunuu loa i le taimi a le Atua-o i latou uma lava o loo taulamua i nei faiga pi’opi’o-o le a matua vaai tino i o latou faasalaga leaga ua leva ona faafofoga le Atua i le oi o le atunuu talu ai nei faiga pi’opi’o.

Atonu o le taimi foi lena faatoa talitonu ai i le upu a le atunuu-“ e suamalie i le gutu ae oona i le manava”. (Ia manuia tele le Aso Sa Samoa)


© Samoa Observer 2016

Developed by Samoa Observer in Apia