O LA’U TALA FO’I

159 Hits

1. Matauina i Tala Fou ananafi se ulutala fai mai ua “faatetele finauga tau Eleele-ma o ia finauga e faasino i eleele faale-aganuu poo le tofi faasolo o tagata Samoa. O lea la finauga o loo taiulu ai nisi o tamalii o le atunuu- ma le Faletupe o le Atiina A’e o Asia.

Ua mafua la lea finauga-ona o le popole o ia tamalii o le atunuu ina ne’i faoa le pule o eleele faaleaganuu poo le tofi tuufaasolo lea o tagata Samoa i le taimi nei-ma tupulaga o lalovaoa.

E tusa ai la ma le finagalo faaalia o ia tamalii o le atunuu-fai mai- a tuu i faiga toe fuata’ina-o le feagaiga o se lisi o fanua faale-aganuu-e mafai ona faaaogaina e le tagata e ou le lisi-e maua ai ni tupe faa-aitalafu mai le faletupe.

Ae peita’i-a le mafai e le tagata e ou le lisi ona toe totogi lea tupe i le faletupe-ona pule loa lea o le faletupe i lea lisi-lea e ono aafia ai se vaega tele o eleele faale-aganuu mo ni tausaga se tele.

O le mau la lea a ia tamalii o loo finau ma le Faletupe o le Atiina A’e o Asia –ona o lea mataupu. Afai la o silafia lea tulaga ma le mea o le a o’o i o tatou eleele faale-aganuu-o lona uiga- o se matauu lenei e tatau ona ave i ai le faamuamua a itumalo uma o Samoa ma soo se afioaga-ae le o polokiki leaga ia o loo maumau ai le taimi!

Afai foi e moni ma faamaonia le tulaga e pei ona faaalia e ia tamalii ma failauga o le atunuu o loo finau ma lea Faletupe- ua tatau loa ona matua faasaga mai e lagolago lenei finauga- aua e le nofonofo fai e lea Faletupe lea fuafuaga-ma o le taimi foi lenei ua tatau ai i soo se tagata Samoa e alofa moni  i le atunuu ona matua tulai mai- e fai faatasi lenei taua-ina ne’i ‘emo ane le ata- ua faaaoga eleele o le atunuu e faamau ai lenei anoano o faaunegatupe-ona o mai loa lea o tagata ese tutuli tagata Samoa e o ese ma o tatou eleele! O le a sou taofi? 

2. Ua matauina pea i faamasinoga tau le faiga-palota-o lea lava ua faaaoga le aganuu-e faalafi ai faiga tau faasese ma le pi’opi’o. O le fesili la-afai o faiga tau faasesē nei ma faiga pi’opi’o-o ni mea ia o loo tapu i totonu o le tulafono o Faiga-Palota-o le a le pogai ua avane ai fua le aganuu e faa’ele’elea ma faa-ta’uvalea e ufiufi ai nei faiga pi’opi’o o loo faasa e le Tulafono?

O le a le aoga na fai nei Tulafono ma alu ai le tele o taimi o le Palemene ma i latou e tusia ia tulafono ma faaliliu i le gagana Samoa ma talanoaina –ae le o faaaogaina? O le tulafono ‘ea e faapito i le atunuu poo tagata uma e aofia ai ma ta’ita’i o le malo?

O le a le pogai e saga ufiufi ai ma faalilo nei faiga pi’opi’o a ua iloa e pili ma mo’o? O afea e ono aloa’ia ai e nei taitai le amiotonu a le Atua ma lana faamasinoga? Anusa lava pe afai tatou te le o iloa mea matautia ua fai e faiga pi’opi’o i l tatou atunuu!

E faitau miliona ma miliona tupe a le atunu ua goto i le moana ona o faiga pi’opi’o a le faiga-malo-ae o lea foi ua faasolo atu i le faiga-palota-ona o le naunau lava ina ia ona pulea toatasi le atunuu!

Afai la o lea o le tulaga o le a tatou alu ai-e faapefea la ona maua ni manuia mo le atunuu lautele? O le a le aoga na fai ai ia tulafono ae le o faaaogaina? O ai e falepuipui i le gaoi o le $10 ae a maumau le faitau miliona ma miliona-e le mafai ona falepuipui?

Faapefea taupulepulega leaga a tagata faigaluega o le Malo? Afai ua savali i le 40 tausaga o pulea le atunuu e le HRPP-ae leai se manuia o le atunuu o maua ai-o le a la le ta’u o le ituaiga o atunuu lea ua o’o nei i ai Samoa? O le a sou taofi? 

3. Matauina i Tala Fou o lea o le a alo atu Samoa e puipui tafola-ae o la e sa’oloto tafola i le moana sausau e le o fia a’ai ma e le o matitiva foi e pei o tagata Samoa.

Sa fa’ita la e faamuamua i fuafuaga a le Malo le puipuiga o tagata Samoa-ae o lea ua aliali mai-o le a tuu tagata soifua-ae faamuamua tafola. O le fesili la-o le a se tulaga o pagatia ai tafola?

A toe faaupu-o ai na logo mai i ai e tafola le fia maua o se puipuiga mo i latou? E aliali mai e matua ese lava le mea lea o loo ave i ai le faamuamua a le malo- e ave le faamuamua i tafola-ae le amana’ia tagata ola ia e gapatia e saili tupe ia o loo fai ai faiga a le malo.

Afai la o le a malu puipuia lelei tafola-o le a se manuia o Samoa e maua mai ai? E mafai ona maua se tafola se tasi se’i faasoa ma i matou le ‘au-matitiva? O le a sou taofi?

© Samoa Observer 2016

Developed by Samoa Observer in Apia