Asiasi mai tama-o le-‘ele’ele i lona aiga

17 March 2016, 12:00AM

Fa’aliliu e Maiava

 

Na fa’ate’ia le faletalimalo o Taumeasina Island Resort i le vaiaso talu ai, i le malaga asiasi mai o se tasi o ana amepasa totino, o La’auli Michael Jones. 

Na asiasi mai le tama-iloga a le ‘Olopeleki, o le faia’oga-tuai fo’i o le Manu Samoa, e silasila i le gasologa o galuega o le faletalimalo, lea ua fuafua nei e tatala aloa’ia i le amataga o le masina o Iuni. 

Na matua fa’afiafiaina lava La’auli – o se tama-fanau a le afio’aga o Moata’a lea e iai le faletalimalo lea, ona o lo’o fa’aaogaina lava e le faletalimalo, tagata o lona nu’u mo le fa’atinoina o lea galuega tele.

O le a api ai La’auli i le faletalimalo i le vaiaso muamua o Iuni, e fesoasoani ma ‘auai i tapenaga uma aua le tatalaga aloa’ia o le faletalimalo.

Na matua fa’amalieina lava le ali’i i lana asiasiga lea i le vaiaso talu ai.

 “O le maua o se avanoa e asiasi mai e tilotilo i le gasologa ma le tulaga ua iai le galuega a’o le’i tatala aloa’ia i le Aso 1 o Iuni i le tausaga nei, ua matua fa’afiafiaina ai lava, matua ‘ou ofo lava ona o le tulaga ua iai nei,” o lana fa’aaliga lea. 

 “Ua iloga le vave ona tula’i mai o lenei galuega, ma e mautinoa lava, o le tasi lea o va’aiga mata’ina o le a fa’aopopo i le tele o faletalimalo iloga ua i totonu o Samoa, ma o le a matua matagofie atili ai ma fe’ilafi i le aso e tatala aloa’ia ai.  

O le Pule Sili o le Faletalimalo, o Nathan Buchnall sa fa’atautaia le asiasiga, e fa’ailoa ma fa’amatalatala vaega uma o le faletalimalo ia La’auli. 

“Fa’afetai sa mafai ona ‘ou va’ai-tino i le matagofie ma le tulaga maualuga o le tapenaina o potu, o fale-eva ma fale’aiga, o potu mo fonotaga, o vai-ta’ele, malae-tenisi, o vai-vevela ma isi mana’oga mo fa’amalositino, ua matua lelei tapena uma ma fuafua lelei, e aofia ai fo’i le vaega mo le fa’aitiitia ma le tausia lelei o le malosi fa’aEletise, le suavai ma le vaega mo otaota-lafoa’i, ua matua lelei saunia uma. 

mea o le 70 pasene o le ‘aufaigaluega atoa e mai lo’u nu’u o Moata’a, lea e tu ai le faletalimalo nei.

“E ta’u mai ai le naunau tele o o tatou tagata ae maise fo’i le sao taua o lenei faletalimalo mo le atina’eina o le tamaoa’iga o le atunu’u. Ma ‘ou te lagona o se amataga lelei tele lea mo nisi fo’i atina’e fa’apenei, ae maise le fa’ailoa atu, a-mea ua gafatia lava e o tatou tagata, i tomai ma agava’a ‘ese’ese ona fa’atino o nisi galuega tetele fa’apenei aua tagata maimoa mai fafo.”  

Na aupito mitamita La’auli ona ua “taunu’u ma tino mai se faletalimalo mata’ia (fetu-lima) i se motu la’ititi pei o Samoa, ma o se mitamitaga fo’i o tagata o lona nu’u, le itumalo ma Samoa atoa e fa’asoa atu i tagata o le lalolagi!

“O le tulaga tonu lena, e fai lava si to’atele o nisi sa fa’ananau mai i le fia maua o le nofoaga lea i Taumeasina, aua o se tulaga ‘ese, lea la ua avea nei ma motu aupito la’ititi ua fa’atu ai se faletalimalo, ae feso’ota’i i se ‘auala-ta ui e le ‘umi se taimi e aga’i ai i le taulaga i Apia.  

 “Na o le Vaega a Lamana ua mafai ona fa’atinoina lea tulaga ma e le o toe mamao ona ‘ae’ae lea ma le fiafia e tagata tafafao mai fafo fa’apea fo’i o tatou tagata, le taunu’uga o ia galuega lelei ae maise fo’i le talitonuga o le atunu’u, i le sao taua o le motu o Taumeasina. 

Na fa’afetaia fo’i e La’auli le finau maua’i a le ‘aufaigaluega uma i le galuea’ina o lenei atina’e tele.

 “Ua tatau se fa’afetai lapo’a lapoa lava, mo le Vaega a le Lamana ae maise le Kamupani a le Taumeasina Island Resort Ltd. Fa’afetai tele atu ma fa’amalo, ona o le silasila mamao mo se faletalimalo “fetu-lima” i le motu o Taumeasina, ae maise o le finau ia taunu’u lava le fa’alepo ua leva o fa’ananau iai. 

“Talosia ia vave mai le taimi e tatala aloa’ia ai lenei fale-tele i le fiafia ma le olioli mai Le Ali’i.”

17 March 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>