89 na Fa’au’uina i Faleata

234 Hits

O nisi o le ‘au-Fa’au’u a le APTC.

O nisi o le ‘au-Fa’au’u a le APTC.

Ripotia e le Kolisi o Matata ‘Ese’ese a Ausetalia ma le Pasefika (APTC)

Fa’aliliu e Maiava

 

E 89 le vasega-fa’au’u mai le Kolisi o Matata ‘Ese’ese a Ausetalia ma le Pasefika, sa ‘auai i le Maota o Ta’aloga i Apia, e fa’amanatu fiafia le taunu’uga manuia o a latou taumafaiga i lenei tausaga. 

O le Kolisi o Matata ‘Ese’ese, o se atina’e o lo’o fa’atupeina e le Malo o Ausetalia, mo le a’oa’oina o tomai ma matata ‘ese’ese e fua i mana’oga ma tu’utu’uga a a’oga a Ausetalia, e tapena ai tupulaga a le pasefika mo galuega i le lumana’i. 

O le saunoaga ‘autu o le fa’au’uga na saunia e le Ali’i Palemia, Tuila’epa Sa’ilele Malielegaoi. 

Mai le amataga o lea kolisi, ua silia nei i le 9,500 tamaiti-a’oga mai le Itulagi ua fa’au’u mai ai. O le 1,280 o latou nei, o tamaiti Samoa. 

Na fa’afetaia e Ricky Sale – e fai ma sui o le ‘au-fa’au’u, le Kolisi ma le Malo o Ausetalia, ona o le silasila mamao ae maise le lagolago ua tatala ai nei avanoa uma, e le gata mo tupulaga o Samoa, ae fa’apea fo’i isi mai motu uma o le Pasefika. 

Sa ia fa’afetaia fo’i le Malo o Samoa ona o le fa’atuina ma le fa’aauauina pea o lea faiga-pa’aga ma le Malo o Ausetalia, ua maua ai avanoa mo fanau e ‘ausia ai fa’ailoga mai Ausetalia. 

“O malamalama ma le iloa ia ‘outou tu’uina mai i o matou tagata, o le a aoga tele mo le fa’aleleia o le lumana’i o Samoa, o aiga ma nu’u, o falefaigaluega ae maise le tautuaina o Ekalesia,” o lana fa’afetai lea. 

Na ta’ua fo’i e Ricky – na fa’au’uina i le Tusipasi Lona III i ‘Au’aunaga Lautele – le fa’afetaia e le ‘au-fa’au’u o o latou fale-faigaluega mo le lagolagoina pea ma le una’ia o latou e fa’amae’a a latou a’oa’oga ma si’itia lo latou malamalama i le fa’atinoga o galuega o lo’o faia.  

Sa ia momoli fo’i le fa’afetai i ana pa’aga-fa’au’u uma, ma ia fa’amanatu ai fo’i ia latou, o le amataga lenei o nisi o mea lelei mo latou i o latou olaga. 

E 10 polokalame ‘ese’ese sa fa’au’uina ai alo ma fanau mai le Kolisi lenei. O ‘Au’aunaga fa’aSoifua Maloloina, A’oga Amata ma le Va’aiga o Fanau Laiti, O le Kuka, So’o-U’amea, Va’aiga o Turisi ma Faletalimalo, Inisinia tauTa’avale, Kamuta, Inisinia Faimoli ma le Galuega Lautele. E fa polokalame o lo’o a’oa’oina nei i le Kolisi o lo’o i Samoa nei, i Vaivase. 

O le fa’au’uga, sa fa’ailogaina ai le taunu’uga manuia o taumafaiga a nisi e to’alima e galulue i le Vaega o Galuega Tau-Taligamalo ma le Soifua Maloloina i le Tusipasi Lona III, lea sa fa’atupeina e le Pulega o Fa’ailoga Taualofa a Samoa (SQA) mo iloiloga a’o le’i amataina a’oa’oga. 

O lo’o fa’aauau pea ona galulue fa’atasi ma le Kolisi lenei o Matata ‘Ese’ese ma le malo fa’apea fa’alapotopotoga ‘ese’ese i totonu o le atunu’u. Sa fa’apea fo’i ona amataina so’otaga lelei ma nisi fa’alapotopotoga i totonu o le atunu’u e pei o le Fono a le ‘Aufaioloa ma le Asosi a le Au-Kuka a Samoa mo le faia o pisinisi e maua ai avanoa faigaluega mo tagata Samoa. O se fa’ata’ita’iga, o le ‘auai lea o tamaiti-a’oga i le tauvaga a le Asosi mo le faiga o le Oka i le tausaga ua mavae.  

O malo-fa’aaloalogia sa ‘auai i le fa’au’uga o lenei tausaga, e aofia ai le Hai Komesina o Ausetalia i Samoa, o Susan Langford, le Hai Komesina o Niu Sila o Jackie Frizelle, le Pule o le Iunivesete Aoao o Porofesa Le’apai Asofou So’o ma le Faife’au o Dean Max, o le A’oga Tusi Pa’ia mai Vailoa, Faleata. 

E ‘ese mai le lala o le Kolisi i Samoa nei, o lo’o fa’apea fo’i ona a’oa’oina tomai ‘ese’ese nei, i lala i totonu o Fiti, Vanuatu, Papua Niu Kini ma le Atu Solomona.

© Samoa Observer 2016

Developed by Samoa Observer in Apia