O la’u tala fo’i

179 Hits

1. Matauina i Tala Fou le faaseā a se tama’ita’i –ona o tagata faagutu-gutulua ma le taufaasese-ia fai mai latou te lagolagoina le tuagane o lona tina i le faiga-palota lautele talu ai- ae emo ane le ata-e matua leai lava ma se tulaga tau lea lagolagoina na vaaia. O ia la tagata fai mai lea tamaitai o tagata o le aiga o le tuagane o lona tina.

Ia afai la ua maua lea tamaitai i le loto tiga ona o le taufaasese o tagata palota-o le fautuaga la-ia e maua pea le onosa’i ma le loto to’afilemu-aua o nei mea o palota- ua tatou iloa uma lava-e faatau i tupe, pusamoa, pusa muli-pīpī, pusa mamoe, pusa aisikulimi ma soo se mea.

O lona uiga la- afai e le mafai ona e faatinoina nei mea uma- e leai se aoga e te tausi ai i le amiotonu-leaga e leai se mea faapena o toe maua i Samoa nei i aso nei. Ua matua taavilivili Samoa i le malosi o le faama’i oti-o le pepelo, taufaasese ma le faimea pi’opi’o. A le vaai lava le tagata palota i mata o le Two-ia o le Tala a le Tusi ‘Oti pe a e talitonu i ai! O le a la sou taofi? 

2. Ua tau le ‘asa lava le aso i Tala Fou ma le faailoa mai o Sui Faipule Tama’ita’i ua filifili e ala i le Faiga-Palota Lautele talu ai nei-ma o le mau a isi tagata fai mai -ua lelei tele lea tulaga-talu ai e seāseā lava ona faailoa mai ni ata o nai tamaita’i!

O le lelei la o lea tulaga-o se faamanatu foi lea ia Samoa atoa-ua o’o i le taimi e tatau ai ona tula’i mai ni fuafuaga lelei mo le manuia lautele o Samoa!

Ia- e ui lava ina fai mai nisi se’i o tatou mata’itu pea –ae o le lagona moni ua o’o mai-afai ua tulai mai tamaita’i i totonu o le nofoaga tonu o loo vau ai upu o le atunuu-e le taumate le fotua’i mai ai o ni manuia! Ia atonu e mafai ona faapea mai se tasi-“o lea ua faitau tama’i moa ae le’i fofoa…”ae peita’i- afai o nei tama’itai o Tama Sa a aiga uma o Samoa-e faapefea la ona latou le mafaia ona fai ni faaiuga e manuia ai le atunuu!

Afai e na o Tama Sa e mafai ona latou faamaopoopoina aiga, nuu ma le atunuu atoa-aisea la e le tuu ane ai loa i se tulaga aloa’ia le paoa i tamaitai faipule-latou te faia ai tonu e manuia ai Samoa-pe afai ua loa tausaga-o faafoe e alii le atunuu-ae na o mea leaga ma faiga pi’opi’o ua maumau ai le faitau miliona ma miliona o tupe o le afu o le atunuu!

Atonu o le a mafai ai foi e nei tamaitai ua avea ma sui faipule o itumalo- ona fai le amiotonu ma le faamasinoga-e ala i le tuuina atu o faiga pi’opi’o a le faiga-malo i le faamasinoga-talu ai e matua le talafeagai lava lea mea o le falepuipui o le tagata i le gaoi o le $20-ae le mafai ona falepuipui le tagata na te faaaogaina sese le faitau miliona ma miliona o tupe a le atunuu! O ia la tulaga uma e mafai ona faatino ina ia manuia ai le atunuu –pe afai e tula’i mai se Tamaitai e avea ma Palemia o Samoa i lenei nofoaiga e lima tausaga! O le a sou taofi? 

3. Matauina foi i Tala Fou fai mai e leai lava se tagi tau le Faiga Palota Lautele talu ai nei-ua faaulu atu i le Faamasinoga- ae fai mai le Ofisa Sili o Pulega o le Matagaluega o Faamasinoga ma Pulega Tau Faamasinoga-atonu e o’o atu i lea vaiaso ua i ai ni talosaga e faasaga i le Faiga-Palota Lautele talu ai nei.

O ia la talosaga e faasaga i le Faiga-Palota Lautele talu ai nei- fai mai Papalii ua uma ona ia auina atu se tusi-e faapea o lea ua amata ona talia talosaga e faasino i le Faiga Palota Lautele. E lua la ituaiga o talosaga.

O le ituaiga muamua o talosaga e faasino i le toe faitauina o palota- pe afai e mana’o se sui faatu e toe faitau le palota. O le ituaiga lona lua o talosaga e faasaga i le soli o le tulafono. O totogi la e faamautu ai ia talosaga e $2000 ma le totogi e $18.O le matau la i lea tulaga-o lea $2000 o le a faa-vaatu’ia ai le faamoemoe tau le sailia o le amiotonu ma le faamasinoga! O fea a aumai ai e le sui faatu e talitonu ua soli le tulafono ma ia sailia le amiotonu ma le faamasinoga-lea $2000? O le a sou taofi? 

4. Matauina foi i Tala Fou se finagalo faaalia o se tasi Tamalii e fai lona fale talimalo -o Tuala Oli Ah Him! O le finagalo la o Tuala e faasino lea i laisene le tumau e mafai ai e turisi ona feoa’i solo i taavale i Samoa nei!

O le matau la i lea tulaga- e matua sa’o lelei le finagalo o Tuala! Afai e mafai e turisi ona maua o latou laisene avetaavale e feoa’i solo ai i Niu Sila ma isi atunuu ae le mafai i Samoa nei- o ai la le turisi valea e fia sau i Samoa ae le maua sona laisene avetaavale e fealua’i ai? E le tioa lava a oti le Turisi a Samoa-talu ai o mea nei sa tatau ona tapena muamua mo turisi! A mafai e le turisi ona maua sona laisene le tumau ma fealua’i solo ai lava ia-ona sili atu lea ona fiafia-aua e taugofie lena mo ia-i lo le fealua’i i isi taavale! O le a la sou taofi?

© Samoa Observer 2016

Developed by Samoa Observer in Apia