TALA FAASOLOPITO O SAMOA MAI LE AMATAGA

17 March 2016, 12:00AM

Tapena ma Tuufaatasi e Fuimaono Na’oia Fasavalu Touli F. Tupua mo le Samoa Observer

 

E le’i mamao tele atu le taimi sa ma talanoa ai ma Mataafa, lea sa avea ma ‘Tupu faatupu faalavelave”, o lana finauga na mafua ai ona mafana le mafutaga a Tusitala ma lea tamalii matua.

O lea ua 73 tausaga o lona soifua, ma sinasina lona lauao-ma sa toetoe tutulu ina ua na faamatala mai ia te a’u lona alofa ia Tusitala. O lana saunoaga fai mai-“Afai ou te oti, o le a tuufaatasi e tagata o ma igoa.”

E uiga ese lona poto, ma e mana’o lava ia i le filemu. E moni lava ana upu uma. Ia faamanuia e le Atua le eleele o ta’oto ai Tusitala.Ia alofa le Tupu e afio i le Lagi ma talileleia lenei tamalii i lona Maota e faavavau.

E le’i umi, ae tuua loa le malo e Mataafa. “O ia o se tamalii uiga ese, o se tamalii matua e uiga ese lona agalelei”, o le tusitusiga lea a Tusitala. O le tasi sa mafana lana mafutaga ma Tusitala i le lagolagoina o taumafaiga a Mataafa o Misimoa poo Mr.H.J. Moors ma atonu o le a fiafia nisi pe a latou iloa, o lea faatoa uma ona ia tusia se tusi e uiga i le soifuaga o Tusitala i Samoa. E lē taumate o le a filigā tagata e saili foliga o lea tusi.

O le a iloa ma le fiafia tele e i latou e alolofa ia Tusitalo, o lona tuugamau ua le o toe avea i le taimi nei ma nofoaga ua faatafunaina e pei ona ‘ou vaaia i le taimi muamua, ma o le ala i le mauga o Vaea ua toe faaleleia ina ia faigofie ai ona a’ea.

O tama’ita’i sa naunau e fia asiasi i Vailima, ma feoa’i solo i totonu o le fanua, ma tilotilo momo’o e fia o’o i le tumutumu o Vaea o loo tu mai, aemaise ai o le tuugamau o Tusitala, ua pei o le selo na mea uma i le taimi nei.

Ona o lea itu, e tatau ona tatou faafetaia Sulusi poo Dr. Schultz, lea sa avea ma Sui Kovana a’o to’ese Solofa poo Dr. Solf i Siamani. I le talanoaina o Tusitala, sa faaseseina a’u i le manatu e faapea e leai se ala lelei i lona tuugamau, ma e le o vaaia lelei lona tuugamau, ae o le mea ua ‘ou te’i ai, o lea tulaga o le a manatua ai pea Tusitala ma lana tusitusiga o le “Footnote to History, lea na ia faamaumauina ai ni mea faigata e uiga i tagata Siamani, ae fai mai Sulusi-, o le a faasaga e fai lea galuega. 

E le’i umi ni aso talu ona mae’a le sainiga o le Feagaiga i Perelini, o le tusi lenei a le Sui Kovana na aumai ia te a’u-ou te faanoanoa ona o le tulaga leaga o le ala i le tuugamau o Tusitala na e vaai i ai pe a fua i le faaaloalo na ave i ai e tagata o le lalolagi e masani ma Tusitala.

Ou te le’i iloa e i ai se tulaga faaletonu faapea o le auala, ma o le a fai loa lava i ai ni galuega tau le toe faaleleia. O le a ‘ou faia aiaiaga uma e mautinoa ai ua tausia lea ala i lona tulaga lelei i taimi uma lava.

17 March 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>