O LA’U TALA FO’I

17 February 2016, 12:00AM

1. Matauina i Tala Fou nisi o faiga pi’opi’o ma faiga solitulafono ua fai e nisi mo le Faiga Palota tele o loo loma nei! O le mata’utia la o lea faiga solitulafono-o le nofo o le tagata e ou le suafa-ae nonofo isi ma faaliliu ese e aunoa ma lona silafia.

O le fesili la ua tupu mai- afai ua tulai mai le mea mata’utia i se tasi o itumalo –o lona uiga la- e le o masino foi le anoano o isi faiga pi’opi’o faapenei. O le itu la ua mautinoa e aunoa ma se masalo-ua matua pisia lava tagata o lenei atunuu i faiga pi’opi’o ma le le sa’o ! Ua matua suamalie le pi’opi’o i soo se tagata o Samoa.

Afai la o le taimi muamua lenei pe leai foi ua tula’i mai ai lenei faafitauli-o lona uiga ua matua sasao ma pipisi e pei o le faamai o le Zika lenei mea o le fai mea pi’opi’o! A tatou fesili la pe aisea ua faapenei ai le atunuu- o le tali –ua pisia tagata i le faama’i na faaulufale mai e le faiga-malo-o le fai mea pi’opi’o, faiga sese ma taupulepulega leaga! A faapefea nei la ona toe togafiti lenei faama’i mata’utia ua matua sasao ma pipisi i totonu o le atunuu? Faamata o le a le mea o le a o’o i ai Samoa-pe a o’o ina sasao lenei mala ma le mafai ona toe tineia?

O ai a tuua’ia i lenei tulaga mata’utia ua o’o i ai le atunuu?  O le fesili la-o se mea tatau ma talafeagai ona tausolomua le faigamalo i faiga tau faasese ma le pi’opi’o? Ia-o lea ua toe o se aga-ona tatou toe foi lea i fale palota e filifili se faigamalo na te faafoeina le atunuu!

Afai la o lea ua savali i le 40 tausaga o le HRPP ae o lenei lava e fai nei faiga ma ua matua pisia ai le atunuu-faamata la o mafaufau mamafa le atunuu i nei mea mata’utia a’o sauni atu mo le Palota? E te lagolagoina pe leai nei faiga mata’utia a le faigamalo- lea ua malaia ai le atunuu? Afai la ua e fiu e pologa ma mativa-o ai la lena e te faatali i ai e o mai e fai se suiga? Afai e moni ma faamaoni ua manaomia e Samoa se suiga-e te le faatali se’i o mai nisi e fai! Afai ua tatou mana’omia se suiga mo se lelei ma le manuia o le atunuu –o lo tatou tiute fai faatasi- o le fai lea o se suiga mo lo tatou manuia! O le a sou taofi? 

 

2. Matauina i Tala Fou se tasi o faalavelave tau taavale ua maumau ai se tasi o taavale la’upasese ma o le faaupuga o loo aumai ai-ua tua le tuuga taavale i se feto’aiga uiga ese! A tatou tilotilo la i lenei mataupu tau tuuga taavale ma le saosaoa o taavale i luga o ala tetele-e le o se faafitauli fou lenei-o se faafitauli lea ua leva ona tupu ma vaaia i aso uma-o le lauiti lea o auala o loo fausia-ae le o mafai ona faitiitia ai le saoasaoa o taavale.

Ua le gata la ina le mafai e Leoleo ona fo’ia lea faafitauli-ae ua sili atu ai ona le mafai e le LTA- ona fo’ia lea faafitauli! O le tulaga i le taimi nei e pei ona vaaia-ua na ona avatu o masini faatutu i luga o ala tetele e faasino atu ai le saosaoa e tatau ona tausisia-ae ua matua leai lava se aufaigaluega o mata’ituina lea faafitauli i taimi uma.

Ua matua leai lava ni Leoleo a le Malo-leai ni Leoleo a le LTA-ma o le tulaga ua o’o i ai-ua tuufau lava tagata e feoa’i i taavale! Ia o lea ua lavevea ia taavale-ma o le tulaga lava lea i aso uma! O fea o ai le aufaigaluega e tatau ona vaaia lea tulaga? Afai ua vavae ese ia matafaioi mai le Ofisa o Leoleo-o fea la o i ai le LTA? Atonu e manatu nisi e lelei ona faatu ni faalapotopotoga e faafoeina nei fuafuaga-ae ia manatua foi- afai e le o faatinoina tiute fai o nei vaega i aso uma i le atunuu-o le a le pogai na fai ai? Sa sili lava pe ana tuu pea mataupu tau taavale i le Ofisa o Leoleo e pei o le amataga! O ai la le avetaavale faavasivasi e kea i ni masini ia o loo i ‘autafa o ala tetele?

O le matua maumau lava o le taimi ma tupe a le atunuu ae leai se lelei o maua ai! Masalo e talafeagai ma amiotonu ona fautuaina le Malo ina ia toe tilotilo tasi lava i lenei faafitauli! E lelei ona tuu i le Ofisa o Leoleo ona faatoa mafai lea ona fausia e avetaavale uma le tulafono o ala tetele! O le a sou taofi?

 

3. Matauina i Tala Fou se faasalaga mo se alii mai fafo ma se tamaitai lea fai mai ua la toe talosagaina le toe iloiloina o lo la faasalaga ! O le matau la i lea mataupu o loo aafia ai se alii mai fafo ma se tamaitai. O i la’ua ia e faapena na la faia ni faiga tau faasese!

O le a taatia la lea mataupu-ae afai o lea alii o se Papalagi-o le fesili la ua tulai mai-o le mea ‘ea o le manatu o nei tagata mai fafo o tagata o Samoa e valelea? Na faapefea ona o mai nei tagata mai fafo ma fai nei faiga pi’opi’o? O le pogai lea na ala ai ona o mai i Samoa-o le o mai e faavalea tagata Samoa? Ua silasila la i le mata’utia o le sasao o faiga pi’opi’o i Samoa nei? O lea ua manatu nei Papalagi o Samoa uma e valelea! O le fesili taua lava-faamata e le o iloa i Tusi Folau o lenei alii ma lenei tamaitai-o le pogai lea na o mai ai i Samoa nei? Afai na iloa i o la Tusi Folau le pogai na o mai ai iinei-aisea na faataga mai ai i totonu o le atunuu? O le a sou taofi? 

17 February 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>