Fiafia Lupesoli’ai ua to’ai taunu’u i Samoa
O le aso ananafi na taunu’u mai ai i fanua le ali’i fusu i a Lupesoliai La’auli Joseph Parker ma na va’aia le fa’afiafiaina o le mamalu o le atunu’u i lea fo’i alo o Samoa.
E pei ona silafia ai o le taunu’u mai ai o Parker e mo le fa’amoemoe tele lea o le a alo atu a i le Aso To’ona’i lea o lo’o lumana’i nei lea o le a pa’ilima ai ma le ali’i i a Jason Bergman mai Amerika.
O se fusuaga taua tele lea i le olaga o le ali’i Samoa lenei ona o le taimi muamua lea o le a fusu ai mo Samoa.
I le fa’atalatalanoaga ai ma le Observer na ia ta’ua ai lona fiafia tele i le mafai ai lea ona fusu i Samoa.
O se fa’alogona fiafia tele lea mo a’u lava ia i le mafai ai ona o’o ma i Samoa mo la’u fusuaga lenei aemaise o le taimi muamua lea o le a fusu ai mo lo’u atunu’u.” o lana tala mai lea.
“O au na fanau i Niu Sila, ma o se fiafiaga tele o le avea ai o a’u ma Samoa moni lava.
Sa ia fa’afetaia ai fo’i le tapuaiga i le mamalu o le atunu’u.
“O se tasi nei o fusuaga e tali atu ai lo’u nei tagata ma le agaga fiafia mo tagata Samoa uma lava mo la latou lagolagosua – fa’afetai tele lava.
Na fa’ailoa mai fo’i e le faiaoga le taua tele ai o lenei fo’i fusuaga.
“O se tasi lea o vaega tele na tulimata’ia pea o le o’o mai lea i Samoa ma o se itu na una’i ai Parker ma ia talotalo ai lava i le vave ona o’o ai lea o le fa’amoemoe.
“E tulaga ese le fiafia ma le alofa ai lea o lea o Parker i ona tagata Samoa, e 12 tausaga o fa’atasi ai ma David Tua ae le’i maua lava se avanoa e o’o mai ai mo se fusuaga mo lea fo’i alo o le atunu’u, ma o se itu vaega taua le toe fo’i mai e fa’afetai le tapuaiga a Samoa atoa.
Sa fa’amatalaina e le faioaga le pisi ai lea o Parker i lona auai ai i fusuaga lea e ono lelei lava i le 10 tausaga talu ai ma e le’i i ai lava se malologa.
Aepeita’i fai mai Parker e leai se mea e popole ai fua i lea tulaga.
“O le taimi lenei o lea ua sauni e fusu, e ui e i ai tiga ae ua matua’i ova atu ma le sauni le mea lea ua i ai mo lea fa’amoemoe.
Saunoa Barry e fa’afetaia Samoa ma lo latou lagolagosua.
“Ou te fa’afetai tele i tagata o Samoa uma ona o lo latou lagolagosua mo Joe.” o lana tala mai lea.
“O le a ou taumafai i le mea e gata ai le malosi e koleni ia malosi lelei Parker, ma o le fa’amoemoe o le isi 12 masina o le a toe omai ai ma aumai le fusi o le lalolagi i Samoa nei.
“I’ve never trained a fighter who is as driven and who works as hard as Joseph Parker.
“Ou te le’i kolenia lava se tama fusu e finau ma tauivi e pei o Parker.
Saunoa Kevin o le a le avea le vevela ma luitau mo Parker aua ua masani i le tau o Samoa se’i vagana le ali’i o Bergman lea e tele ina ‘aisa tele Amerika lea e sau ai.