Taua’aoina e le Malo le $9.05 miliona o le Tala Fa’aopoopo o le Tupe

152 Hits

Lautafi Selafi Purcell, Tu'u'u Anasi'i Leota ma Alo Taveuveu.

Lautafi Selafi Purcell, Tu'u'u Anasi'i Leota ma Alo Taveuveu.

Ripotia e Lanuola Tupufia

Fa’aliliu e Maiava 

 O le a toe fa’aopopo le isi tasi-tesi-lima miliona tala ($1.5 miliona tala) mo le polokalame o togafitiga i atunu’u mamao, e fa’afetaia ai se Tulafono Tau Fa’aofi mo Tala Fa’atatau o Tupe Fa’aopopo (numera 1) 2015/2016, e iva-tesi-0-lima miliona tala.

O lea Tala Fa’atatau o Tupe Fa’aopoopo sa taua’aoina i le Palemene e le Ali’i Palemia, o le Minisita fo’i o Tupe, Tuila’epa Sa’ilele Malielegaoi, ina ua toe tauaofia fonotaga a le Palemene i le aso ananafi,

O le Matagaluega mo le Soifua Maloloina, se tasi o Matagaluega sa fa’amatu’u atu iai se vaega o lea Tala Fa’atatau o le Tupe.

Ia Iuni o le tausaga nei, na fa’aitiitia ai i le Tala ‘Autu o le Tupe 2015/2016, fesoasoani mo le polokalame lea, na pa’ū ifo ai i le lua-tesi-lima miliona tala ($2.5 miliona tala) – o se pa’ū e valu-tesi-lima miliona tala ($8.5miliona tala) mai le Tala o le Tupe i le tausaga talu ai. 

I lana saunoaga, na tautu lava le Ali’i Palemia i le ‘autu, e fua le soifua i le seleni e maua. 

“O le fa’aititia o tupe-fa’aopopo, o lo’o fuafua lea i tupe fa’atatau mo le manuia o le atunu’u,” o le saunoaga lea a le Palemia. 

Na fa’amalamalamaina fo’i, o le $1.5 miliona fa’aopopo ua mo’omia mo le polokalame lea o togafitiga i fafo, e fesoasoani ai ia latou e le-gafatia i Samoa nei ona fa’atino ta’otoga o latou gasegase ‘ese’ese. 

E aofia fo’i i le tala o le tupe, le Matagaluega o Fa’ato’aga ma Faigafaiva, lea o le a alu ai le $350,000 mo le atina’eina o fa’ato’aga mo tina ma tama’ita’i o le atunu’u.

O le Matagaluega o Feso’ota’iga ma Fa’amatalaga Fa’aTekonolosi, o le a maua le tasi-tesi-tasi miliona tala ($1.1 miliona tala) mo le Poloketi o le Fa’alauteteleina o Feso’ota’iga Malolosi mo Samoa aoao.

I le Vaega o A’oa’oga, ua fa’aopopo iai le lua miliona tala ($2 miliona tala) mo Tulaga Tau A’oa’oga.

Pe tusa ma le miliona o lea tupe, o le a fa’avagavaga mo totogi o faia’oga a’o le isi vaega, e mo le totogi o faia’oga ua ritaea manumalo, a ua toe fa’afaigaluegaina ona o le le-lava o faia’oga.

E iai fo’i se vaega-tupe ua fa’amatu’u-‘ese mo fanau sikolasipi i le Iunivesete Aoao a Samoa. 

Ua tu’u-‘ese le tupe e $70,000.00 mo le totogia o pili ma ‘aitalafu-tu’ua ona o taliga-malo sa alo iai i le taimi o Ta’aloga a Tupulaga o le Taupulegha ia Setema. 

Mo le Matagaluega o Leoleo, e $63,000 o le a tu’uina atu e totogi ai ‘aitalafu, o galuega fa’atino ma le fa’aaogaina o fale-tetele sa fa’aaoga e taofia ai ta’ifau na pu’e e le Matagaluega.

O le Tala Fa’atatau Fa’aopopo o le Tupe lea, o lo’o fa’alauiloaina ai fo’i tupe-maua a le malo e fa-miliona tala ($4 miliona tala) mai le Vaega o Tupe mai Fafo (SIFA) fa’apea le lua-miliona tala ($2miliona tala) mai tupe fa’asili a Fa’alapotopotoga ma Atina’e a le Malo (SOEs).

E fa’apena fo’I le Matagaluega o Puna’oa ma le Si’osi’omaga, lea na maua mai ai le $217,396 afe tala, mai ‘ele’ele o le malo ma le tasi-tesi-tasi miliona tala, mai le Ofisa o le Pule Fa’atonu.

E na o le $432,802 tala tupe na fa’amauina mai le Matagaluega o Tupe-Maua, mai lafoga masani.

Ua tolopo nei le Fono a le Palemene, se’ia aulia Ianuari I le tausaga fou. 

© Samoa Observer 2016

Developed by Samoa Observer in Apia