O LA’U TALA FO’I

16 December 2015, 12:00AM

1. Matauina foi i Tala Fou se isi tusi e uiga i le Pulega o le Matagaluega a Leoleo. O lea la tusi fai mai sa tusia i le gagana Samoa e se vaega fai mai o i latou o Alii Leoleo- ia e manana’o e faaaoga le taimi ma tupe o loo totogi ai latou –ma o lea tusi sa faatuatusi i le Komesina o Leoleo. O ata la o lea tusi e le o iloa le aso na tusi ai- sa faatuatusi i le Palemia, Minisita o Leoleo, Komesina o Sulufaiga, Faamasino Sili, Minisita o Fesootaiga tau Tekonolosi, Minisita o Pisinisi a le Malo  ma le Faatonu o le Samoa Observer.

O lea tusi o loo tuuina mai ai le anoano o tuuaiga e faasaga i le pulega o auaunaga a le Matagaluega o Leoleo. O se tasi o ia tuuaiga fai mai ua faafoe le vaega o Leoleo e pei o se nofoaga o le Militeli e le Komesina o Leoleo o Fuiavailili Egon Keil, ae leai se manuia o maua ai. O loo fesiligia ai foi amioga a nisi o Leoleo. E tusa ai ma lea tusi-e le o lelei ona faatino le galuega a Leoleo ona o le le faamaoni. O loo ta’ua ai foi le faaaoga sese e Leoleo Sinia o tupe o le Teugatupe a le Asosi a Leoleo-ma o loo ta’ua ai foi ni feusuaiga.

Fai mai lea tusi-faamolemole –matou te fia galulue e toe siitia le tulaga o le auaunaga a Leoleo….!Ia-o se otootoga lena o lea tala-ae afai o loo i ai ni faaletonu faapea i totonu o lea matagaluega-o le fesili-o ai e mafua ai? A le o lena- e tatau ona i ai se tulaga faapea i totonu o se Matagaluega o Leoleo? Ae afai foi o i ai-o le fesili –o ni faafitauli ua leva ona i ai pe o ni faafitauli fou nei? Ae o le fesili taua lava- afai o le Matagaluega o Leoleo lea o loo gafa ma le faatinoina o le Tulafono-e faapea la ona malu ma talitonuina e le atunuu le latou auaunaga-pe afai o i ai se tulaga faapea? O le a sou taofi? 

2. Matauina foi i Tala Fou le faamanuiaina o le Aoga a se tasi o alo o Samoa mai Falelima ma Siumu i se faailoga tikeri maualuga o le PhD. Ia e ui lava ina faapea o lea alo o Samoa sa a’oga i Fafo-ae o le upu moni-poo fea lava e amata ai ma matua faasaga e fai le a’oga- e taunuu lava i fafo. O le ata vaaia foi lea o tamaiti finau ma le alofa moni i le aiga ma ona matua-ma a suamalie le poto i lou loto- e te le toe tilotilo i tua pe faalogologo tiga-na o le alu lava i luma-ma e faatoa ea lava i luga ina ua uma!.

Afai la ua faamanuiaina le taumafaiga  a Anthony Palupe- e mafai foi ona e ‘ausia pe a e finau ma taumafai pea e pei o Anthony. E te le ‘ausia se tulaga faapea pe afai e na o lou tafaovale ae leai se meaa’oga e faia! E faatoa mafai ona e ‘ausia le mea sili- pe a e mafo’efo’e ae le faapea e te’i lava ua pa’ū mai le Lagi le PhD! Afai la ua mitamita Falelima ma Siumu i le taumafaiga a se tasi o latou alo ma fanau-o ai a le fia mitamita? O le a sou taofi? 

Matauina foi i Tala Fou- e a isi lava e si’i i luga le igoa o Samoa i mea lelei-ae taumafai lava isi e toso i lalo. Afai o le tulaga lea o le a i ai-o le avea loa Samoa ma mea ula! Aisea? Leaga foi e moni lava e i ai tagata faatautala ma le kea i se atunuu- ae faafetai e maua lava tagata e alolofa moni i lo latou atunuu! Afai la e fai e isi mea e ta’uleleia ai Samoa-ae fai e isi mea e ta’uvale ai-o le a le pogai? Pule oe ma lau tali-ae o le mea masani e maua loa sina iloa-ona fefete loa lea o le ulu! O le fefete lena o le ulu e galo ai le igoa ta’uleleia o le atunuu ma lona aiga lea o loo faatali atu. O le a sou taofi? 

16 December 2015, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>