“E laveai e le Atua ona tagata”

Tusia Petaia Setu ,

438 Hits

Rev. Petaia Setu

Rev. Petaia Setu

(Ken.19:15-17)

O āu o mātua mea nei o fanau. E le mafai foi ona nofo lelei le tamā poo le tinā pe a satia fanau e ni ma’i, poo ni faalavelave o le olaga nei. E tu ma savali; e faamua le alofa laveai. O le alofa lena faa-mătua alofa moni. O le tala a le tusi nei, ua auina mai e le Atua ana agelu e aveese Lota ma lona aiga mai le leaga. O le a faaumatia le nuu atoa uma, ae faasao Lota ma lona aiga. Auā e laveai e le Atua ona tagata.

O ’e maitau mai le faapogai o le laveaiina o Lota e le Atua? O lona nuu ma lona siomaga ua na o mea leaga lava (ken.13:13). E le mafai ona faaolaina ai o oe i sea ituaiga lalolagi. A o le lalolagi lea sa fetosoaiina sesē ai le faautautaga a Lota. Ua vaai i le lalelei ma le matagofie o le fanua laugatasi. Ua filifili i mea e faigofie. Ua faasesēina i le lafulemu (Ken.13:9-11). A o le lafulemu ma le faigofie lea fai mai Iesu, e toatele e fiafia e ui ai (Mata.7:13). O faapefea le siomaga o loo e ola ai? Ua tele ina faasesēina i tatou i le lalelei o laumata ma foliga i fafo. O si leo mālu ma aga faatosina. A o totonu o le faasatauroina o oe, ma le eliina o lou tuugamau. Poo saisaitia oe i se siomaga faapena? Poo faapologa oe e se olaga faapea? ’Aua ne’i seetia oe i le malu o le tai taeao. ’Aua ne’i avaga lou loto i le suamalie o upu ma leo faatosina o le lalolagi. ’Aua ne’i faatauina lou lelei i tupe ma oa a le tagata maua mea. Ua fia ni aiga fetaua’i ona o leo taufaasesē o lou siomaga? Ua fia ni ulugalii malepelepe ona o leo fasioti tagata? O leo o tuinanau ma leo o le malosi o le lalolagi na le mafai ai ona faasaoina le aiga atoa o Lota. Auā ua filifili le avā a Lota ma tane a ona afafine i leo o le lalolagi, a ua le iloa, o le mata ia o le afi.

Ua oo mai le faamasinoga a le Atua i le aai o Sotoma. O le finagalo pule foi o le Atua e a le tu e a le tu lava (Sala.33:11). O ai na te tu ma tetee le faamasinoga a Le Silisili ese? Ae maumau pe ana iai ni nai tagata se to’asefulu faapei ona tatalo ai Aperaamo ina ia faasaoina ai le nuu uma ai le toasa o Ieova, ae leai lava; ua na o Lota ma ona afafine e toalua. Ia, ua le afaina lea auā ua tatou iloa, e pa’ū tonu lava le samala i le ulu o le fao. E ifo foi le fuiniu i le lapalapa. Pe a o oe o se tagata o le Atua, e popole fua la i se ā? Auā poo  fea lava e fetogia’i solo ai oe e le alii o le lalolagi, fai mai Tavita, e mau lava le Atua i lou lima (Sala.37:24).

Ua fia faaumatia e le Atua le aai; peitai o loo taumafai e ave ese muamua Lota ma lona aiga. Fai mai le tusitala, ua nanati agelu ia Lota ia vave ona tuua o le aai. O le upu a agelu “…ne’i malaia oe i le sala a le aai.” Fai mai le Tusi nei a uō le gaoi ma le lē gaoi, e i’u a ina gaoi atu ai. E maua loa oe i ’ave o le tiapolo, ona e foliga ma amio faatiapolo atu ai foi lea ma oe. E sa’o a? Ia, e tatau ona e mataala auā fai mai Peteru, o loo fealua’i solo le tiapolo e saili se tasi e faaumatia (I Pet.5:8). E te iloa ua tau augata Lota e alu ese! Ua kaupeupe ai le tiapolo! Ona fetagofi lea o agelu i lima o le toeaina ina ua alofaina o ia e Ieova. Ia silasila la Samoa, ua alofa tele le Atua ia Lota. Aisea? O tagata o le Atua. Latou te iloa le Atua. E mata’u i le Atua. E ui ina siomia ona autafa faale tagata soifua e mea leaga ma uiga mataga o le lalolagi, ae le o ’alo ese ma le Alii lona Atua. E talitonu i le Atua. E tumau pea lava i le Atua. Na te iloa lelei le faamaoni ma le alofa o le Atua ia te ia. Fai mai le tusitala, ua taitai e agelu i tua o le aai ina ia sao mai le mala o le a faaumatia ai le aai o Sotoma. 

Uso e, e te talitonu e faasaoina oe mai le siomaga o loo e tafili saunoa ai i le ola o le isi tagata? E te talitonu e mafai e ou tofi faale lotu ona laveai oe? O ’e manatu ua lava lau tautua ma galuega tetele ua e faia mo le lotu ma au taulaga e laveaiina ai oe i le faamasinoga a le Alii? Fai mai Iesu, “E toatele latou te fai mai ia te a’u i lea aso, Le Alii e, Le Alii e,… Ona ou tautino atu ai lea ia te i latou, Ou te le iloa lava outou; inā o ese ia outou ia te a’u, o outou o e fai amio leaga.” (Mata.7:22,23). Ua silafia e le Atua ona tagata. E laveai foi e le Atua ona tagata. E le i lilo Lota i le silafaga a le Atua. E le faapea ua atoatoa Lota, leai. A ia iai se vaipanoa o lou loto ma lou olaga e talia ai le Atua; e afio ai le Alii. E faalogologo ai pea i le Atua ma amanaia fuafuaga a le Atua i lou olaga. Ia mausalī lo outou faatuatua. Uso, e alofa le Atua ia te oe. E amana’ia oe e le Atua. Mai le faitau fia selau afe o tagata Sotoma, e tasi lava le tagata na amana’ia e le Atua, o Lota. Fai mai Peteru, a o le Atua e ona le alofa tunoa uma lava, o le na valaauina i tatou ia iu atu i lona manuia faavavau o ia Keriso Iesu, pe a tigaina outou i nai aso, ia faaatoatoaina outou e ia lava, ia faatumauina, ia faamalosia, ma ia faavaeina outou. (I Pet.5:10) O le malosi lea e fausia ai le fanau a le Atua. E le mafai ona tuulafoaiina e ona aao. Na te avatua le malosi i e ua vaivai; a o ē ua leai se malosi, na te faatuputele iai le malosi (Isa.40:29). Ua api le uli. Ua tumu le fua. E tauia le amioleaga. Le au uso e, e leai so tatou lafitaga. Alu ese nei loa mai le olaga leaga o loo faataugaina lou tagata. Tetee ese le tiapolo mai lou loto. Saili i le Atua lou saolotoga. O upu a agelu ia ia Lota, Inā sola ia e te ola ai. E te le maua i le lalolagi nei se mea e te malu ai, a o le Atua. O le alofa lava ia (I Ioa.4:16). Sola i le Alii, ona maua lea e outou o le malologa mo outou agaga (Mata.11:28,29). Liliu atoatoa i le Alii. Faasaga i le Atua ma tumau ai. Aua le toe tepa i tua, ‘aua foi e te tu i se mea o le fanua laugatasi; a ia sola lava i le mauga ina ne’i malaia oe. O le feau o le olataga mo le fanau a le Atua o loo luitauina e le malosi faale siomaga o loo tau ma finau ai.

Ua tatou iai i le vaitau matautia ma le faigata ua uma ona valoia mai i le amataga ma faama’alo mai e lo tatou Alii Faaola (Mata.24:10-13). O amioga mataga ma le pule faamalosi a le lalolagi i o tatou tagata galulue. O le ola taufaamata’u ma le taufaavaivaia o lo tatou faatuatuaga faakerisiano. O ata o Sotoma ma Komoro o loo tau faaofi mai i o tatou olaga. Ua matuā manu’a ai mafutaga faa ulugalii; malepelepe ai aiga; fetautaua’i ai nuu ma ekalesia, toilalo ai pulega ma faiga malo. E faaalia ai le faamasinoga tonu a le Atua. A o oe le tagata o le Atua, e le tanumia oe i manogi o le lalolagi. Auā ua le finagalo le Atua e fano le tagata e faatuatua ia te ia, a ia maua le ola e faavavau, Fai mai le tala, ona fetagofi lea o ia tagata i le lima o Lota, ma le lima o lana avā, ma lima o ona afafine, ina ua alofaina o ia e Ieova, ua la taitai atu ia te ia i tua o le aai. Ua la aveese Lota mai le faafanoga o le a faaoo i e amioleaga. Auā e laveai e le Atua ona tagata.

Amene

Petaia Setu

E-mail: petaiasetu@gmail.com

7737063/7783782

© Samoa Observer 2016

Developed by Samoa Observer in Apia