Tausi pe afai e mana’omia ni fua lelei

By Vatapuia Maiava 16 October 2016, 12:00AM

O le filifili sa’o ai o le ituaiga o la’au tōtō e faigata ona fa’aleagaina pe a o’o mai mala fa’alenatura i so’o se taimi, o se vaega taua e ao i so’o se fai fa’ato’aga ona silasila toto’a i ai.

O le tamā i a Leapai Ah Sam, 49 le matua o le soifua o le afio’aga o Fagali’i ua leva ona tōtōina e lona tua’a le la’au lenei o le ufi, ma o lea le mafua’aga na fa’aosofia ai lava o ia ina ia ia fa’aauauina lea tulaga.

I le fa’atalatalanoaga ma le Fofoga o Samoa, na ia fa’ailoa ai e le na’o le ufi o lo’o tōtōna i lana fa’ato’aga, ae e pei o  lana lava ia mau ‘o le ufi lava latou e le tele sona fa’afitauli.

“O lea le tulaga e ao ona silafia lelei ona e le gata i lea ae o le ufi o le isi la’au e  faigofie ona tausi, e pau lava le vaega e ao ona silasila lelei i ai ia tausi lelei.

“E masalo e tau leai se tigaina e tau tausi pe fa’amāmā aua ua o tatou iloa uma lava le ufi.

“E pau lava le mea aua e pei ona mau ese’ese ai le atunu’u a tele lona sosolo ia o lena lava aua e fai mai isi o le telē lava o le sosolo o le ufi ia o le telē fo’i lea o lona i’o.

“Ia e mau ese’ese le atunu’u i le taimi e fa’aaoga ai le ufi, e tele ituaiga ufi ma lo latou ta’uina.

“O toeai’ina i aso la ia e pei e fua e i latou le matua o le ufi aga’i i fua o moso’oi, o le masina...o isi fai mai a afu ia ona toe tu’u lea e fa’asololo.

“Ia o isi e au lava i le sefulu tausaga e le’i eli’ina lava.

 “Ia o le ufi lenei e lima tausaga, ua leva na fai la’u fa’ato’aga ufi na amata mai lava e lo’u tamā ma o lo’u fiafia lava lea ua fa’aauau mai ai lava i le taimi lenei.

 “O le ufi lenei a vavae e $300 le tupe e o’o ai ma e tupe lelei lava.

“E matuā tele lava le aoga o le ufi, o le isi la’au nei e tapa ai tatou pe a uma afā po ole a le ituaiga mala fa’alenatura ma e tua i ai.

Sa ia fa’ailo o le agaga fiafia ua i ai i le taimi lenei ona o le tatala ai lea o le tele o nisi o faitoto’a e auina atu ai ufi mo atunu’u i fafo.

“Ia o le taimi lenei ua mafai na export , ia ma o se fa’aosofiaga lelei lea mo le to’atele o le atunu’u , mo le tōtōina ai pea o le ufi mo le lumana’i aemaise lava tausiga o aiga.

“Ia o le taimi nei lea ua tatala mai faitoto’a e tōtō ai le ufi, ia a va’ai atu taimi nei, ua maua le avanoa mo fafo, ia lea ua fesoasoani tele i le aiga.

“O le taimi lenei e lua eka o lo’o i ai le aiga, ia o le tu’u lava i lalo ma tausi, ae le’o o le tōtō ae le mafai ona tausia, a mana’o ni fua lelei e tatau ona tausia lelei.

By Vatapuia Maiava 16 October 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>