“E leai se mea o fa’aletonu i totonu o lo’u aiga, o lo’o solosolo lelei mea uma,” Le tinā tausi aiga i a Kalita Taligapi’i, 24 le matua o le soifua o Lepuia’i i Manono.

O le maua ai o le avanoa o le Fofoga o Samoa e fa’atalatalanoa ai  Kalita i le aso ananafi na ia fa’ailoa ai e ui ina o lo’o i ai nisi o le aiga o lo’o faigaluega, ae o lo’o tele lava ina tua i le ma’umaga ma le sami i taimi uma aua le tausiga ai o le aiga.

“O lo’o i ai lo’u uso ma lo’u tuagane o lo’o faigaluega i le taimi lenei ma o i la’ua o lo’o mafai ona maua ai le isi alagatupe mo si o matou aiga.

“O le tele lava o taimi e maua mai ai a la’ua totogi, ia e ta’i $70, ma o la’u va’ai i ai o lo’o lava le fa’asoa aua o lo’o i ai nisi o itu o lo’o mafai ona fa’alagolago i ai e pei o le sami ma le ma’umaga.

“O mea fa’alenu’u ma le Ekalesia ia o lo’o solosolo lelei lava..aua e le’o mafai ona fa’amalosia vaega uma nei.

O le avea ai o Kalita ma se tasi e fa’amoemoe ai lona aiga ma le fanau e to’atolu o se fiafiaga tele i a te ia.

“Ia o fe’au masani lava o lo’o faia i aso uma aemaise lava le tausiga o matua.

“E i ai lava isi taimi e le lava le faasoa ae o lo’o taumafai lava i le mea e gata ai le mafai ina ia solosolo lelei pea le gasologa o le olaga.

 “O le taimi lenei, o lo’o i ai le fa’ato’aga ma ou te iloa toeitiiti o’o le taimi e selesele ai fo’i ia ae le gata i lena o  ma mea tōtō  o lo’o faalagolago ai i le tele o taimi.

“O fuala’au ‘aina e pei ona i ai pi, kapisi ma nisi o lo’o tele lava ina tua i ai pe a ua utiuti le fa’asoa.

Na ia fa’ailoa fo’i o le sami le isi alagatupe maua vave a lo latou aiga.

“E i ai fo’i nisi e faifaiva o le aiga nei , ma e le gata ina fa’aaogaina i’a mo mea’ai a le aiga ae o lo’o fa’atauina atu mo se tupe maua le fa’ai’uga o le vaiaso aemaise lava i le Aso Sa.

“O nai vaega nei o lo’o fesoasoani tele lava lo matou nonofo ai i totonu o Manono.