LAUGA - “O le vaai mautinoa e manino ai i le atoatoa”

Tusia Rev. Petaia Setu ,

341 Hits

Rev. Petaia Setu

Rev. Petaia Setu

(Galuega.7:56)


Ua iai mea vā’ai malolosi faanei onapo (eg.binoculars) ua mafai ai ona iloa lelei atu ma manino lelei e vaai i ni mea o loo mamao lava. Ua tele foi le poto faasaenisi ua mafai ai ona fausia ni ituaiga masini faapitoa e iloa lelei atu ai mea o i luga i le masina ma nisi foi paneta o le vateatea. Peitai, ua le mafai e ia mea ua faia e le tagata ona iloa atu le nofoalii o le Atua i le lagi ma lona matagofie uma lava; vaganā le tagata ua tumu i le Agaga Paia e pei ona molimau mai ai Luka i lana tusi nei e uiga ia Setefano. A o Setefano, ua tumu o ia i le Agaga Paia. Ua faapea a Setefano, “Faauta, ua ou iloa le lagi ua avanoa, ma le Atalii o le tagata o loo tu i le itu taumatau o le Atua.” O le vaai mautinoa, e manino ai i le atoatoa.

O le mea moni lea ma le ofoofogia sa tupu ia Setefano. Ae ua o se faapa’i tau ma se faapalopalo i manatu o le au tauaso(f.57).

O Setefano, o le uluai kerisiano na agaleagaina, saūaina, ma fasiotia ona o le Suafa o Iesu Keriso ma le Upu Moni. Ua na tautala faaaliali ma molimau i le finagalo faaola o le Atua mai lo tatou tupuga o Aperaamo e oo mai i o latou tupulaga, ae ua inosia ai e le nuu. Ua na faailoa atu le amiotonu ma le faamaoni o le Atua ua lafoaiina ma teena e Iutaia, ae lilivau ai ma lalau le fouvale e toeaiina ma le lotu Iutaia.

A o le mau a Luka, e le i fefe ai le mea moni. E le i palaai ai le faamaoni. Ua le fai lava lea ma taufaamata’u i le amiotonu a le Atua. Ua tautala le alofa faaola o le Atua. Ua faagaganaina e ua filifili e le Atua e tala’i le saolotoga i lona nuu ma ona tagata. O le galuega ua faia i le ma’elega o le Alii o ‘au. Ua fai mălie mai le taitaiga ma le pule a le Agaga o le Atua.

Ua fanau mai i le loto ua saoloto ma ua faatumuina i le Agaga Paia. Ua na o lea lava foi le loto ua mafai ona vaai atu ai ma le mautinoa i foliga o le lagi. O le vaai e le seūa; e le fuatia; ae sa’olele i maninoa. O le vaai ua fausia e le loto faatuatua; e le toe ‘apo ai i le pola ua motu i tua. E manino ai i le taunuuga o le faamaoni. E ‘ula ai i faamanuiaga o le olioli. E malamalama ai foi i le atoatoa; o le mafutaga ma le fesilafaiga ma le Tamā, atoa ma lona Alo o i lona itu taumatau.

Samoa, e le o ni taimi faigofie ia taimi. E le o taimi uma foi e mafai ona maua ai e le vaai le mamalu o le Atua ma le malamalama o le lagi. Ae o le mea sili ona taūa e ao ona faamanatu atu Samoa, e le o tagata uma e avanoa iai le lagi. E le o le tumau i faavae o le aiga ma faamamapo i ou talitonuga faaleaganuu e tatala ai faitotoa o le lagi ia te oe! E leai lava. Peitai o le tautala ma le loto faatuatua ma molimau atu le amiotonu ma le faamaoni o le Atua. O le auauna atu ma le lē faapito ma faatino le alofa faaola o le Atua i tagata uma – o lena. 

Samoa, a faapuupuu, o le ola ua tia’i i le Atua. Ua mălie ma ua faamaoni le loto e tali lu’itau ma inu i tīgā uma lava ona o Keriso. E te mafaia?

E le i fe’alofa’i Setefano pe tautala i ni gagana faafitifiti. Ua le vaai lava foi i le va fealoa’i ma toeaiina ma le au matutua, a o le va tapuia o ia ma le Atua. Ua le poi e ta’u le ua ma’a’a ma le olaga le faapaiaina o tagata, ma ta’utino le tete’e o tuaā o le nuu i le Atua o loo saga valea ai pea ma nei augātupulaga (f.51). E maifea lea loto sa ia Setefano?

E mai le loto ua gaua’i ma ua pulunaunau atu i le Agaga o le Atua. Fai mai le tusitala nei, “Ao Setefano, ua tumu o ia i le faatuatua ma le mana” (Glu.6:8). Le au uso e, o mea ia o loo manaomia e le faigaluega e fai ai le galuega a le Atua. O mea ia e lua e sa’o ai tamaiti, o “kama kuku’a” lava na. E ala ona kuku’a, auā o loo faafoe e le Agaga Paia. Ae e iai foi taimi e kuku’a faavalevalea ai! E mafua mai, ona ua faaofiofi mai ai ma oe i totonu o le galuega ae tulei ese le Agaga o le Atua. Lea lava e tupu! Na e tupu i lau galuega! Vaai iai! Vaai ia te oe! ’A le manino lava lau vaai ia te oe, e le mafai foi ona e iloa atu le lagi. O le ’a faapefea ona e iloa atu le lagi e mamao, ma oe e le mafai ona e iloa e oe oe lava? Uso e, o la tatou galuega o le faaola; ae le o le faasola. O le faalalata; ae le o le faatataa.

Talofa e, ia Setefano! Le au uso e, vaai i lenei faifeau talavou. Na lē fiafia i le fouvale o le nuu i le Atua (f.51-53), ae le fiafia tatou pe a ta’ita’i sa’o tagata i le Atua! E naunau Setefano ia faaolaina tagata uma i ala o le Alii; ae asosi lava tatou i tupe ma faiga faapisinisi. Oe le faigaluega o le talalelei, o fea o mea ia e matala ai le lagi? Oe le tagata lotu taulagi, o le lagi poo seoli i le afi? 

Samoa e, o le vaai a Setefano i ona toe taimi o le vaai ua faauuina, ua faapaiaina, ua alofaina. O le vaai ua saoloto ma ua faamanuiaina. O le vaai ua mautinoa auā sa tapuaia ma talosia. O loo pepese ai agelu o le lagi ma le au pa’ia. Oka se manaia! O lona uiga, ua le lilo se mea o i le lagi i le vaai toto’a a Setefano. Ae aumā mea uma a o le atoatoa o mea uma, o Lē o loo tu i le itu taumatau o le Tamā. O Lē na te faafeiloai lou lāina ma lou sautia; lou to’atūgā ma lou noonooia; lou la to i le tino ma lou la to i le agaga.

O lana faamālo, tautai a’e! Le auauna lelei e, ma le faamaoni, ulufale maia i le fiafia o lou Alii (Mata.25:21) O upu ia o le lagi ua avanoa. O le faatu lima e nanea. E maualuga le faaeaea. A o le fesili, E te iloa la e oe afea? E te lagona ma talia afea ia mea? E leai se mea faigata pe afai e te faataga le Agaga o le Atua e nofo i totonu ia te oe. Ia fai ma ou taitala.

Ia pule lava ia i lou olaga. Se’ia o tatou lagona le suamălie o lana faaolataga, ina ua tatou manumalo i manatu o le lalolagi ma loto o tagata. Tou te silafia Samoa, sa mālo le motu o tagata i ma’a; ae malo Setefano i le faaolataga. Ua lilivau le ‘au uso’ ma latou fasioti Setefano; ae ‘alaga le alofa faaola i le Atua ia faamagalo! Oka! pe ana faapea uma faifeau Samoa. Semanū e ke’i Kapilielu ua tatou tutū faasoloatoa!

Samoa e, o le vaai mautinoa, e faavae mai i le loto ua talitonu i le Alii. O le talitonu, o le faatuatua lava lea o lou loto i le Atua le Tamā ma lona Alo lava e toatasi, na tali mălie ai ma le filemu e Setefano ona tīgā, ona moe ai lea o ia (f.60)

O le atoatoa, o le ‘tini’ lea o le faamoemoe, poo le ‘taunuuga’ o le tausinioga. O le faamoemoe ua le o le fisiga poo le fusiga, a ua tau i le Niusina. O lona uiga, o le mautinoa ma le atoatoa, e fua i le faatuatua ma le mana.

A o le faatuatua ma le mana, e ao ina foeuli e le Agaga. Ioe, o le malosi lea tatou te maua ai agaga. Aua o Iesu lava ua fetalai, Tou te le mafai se mea na o outou. E le o le poto foi faasaenisi poo le malosi o masini vaai mamao i nei ona aso; a o le Agaga Paia sa taitaiina ai Setefano. Ua tau ‘ai ai nei le faamaoni ma le talitonu i le Alii. Fai mai Setefano, “Faauta, ua ou iloa le lagi ua avanoa, ma le Atalii o le tagata o loo tu i le itu taumatau o le Atua.” O le itu taumatau, o le itu tauleleia. O le itu malo. E faaeaina i le atoatoa. Ae faapefea pe a puaoa lau vaai, o fea e taunuu iai?

 

Amene

7737063/7783782  

© Samoa Observer 2016

Developed by Samoa Observer in Apia