E sili atu lava nu’u i tua nei i le nofo

Tusia Fetalai Tuilulu’u ma Aruna Lolani ,

63 Hits

Sapatu Pili,  from Vaovai Falealili.

Sapatu Pili, from Vaovai Falealili.

O le maua o le fa’atalatalanoaga ma le tamā ia Sapatu Pili ma le Fofoga o Samoa le aso ananfai e tele le taua ma le aoga o ali’i ma faipule i toonu o nu’u. 

“O la’u lava ia tilotilo iai e sili atu lava nu’u i tua nei i le nofo,”o lana lea tala. 

“E tele lava ma taua le aoga o matai ma faipule i totonu o so’o se alalafaga o Samoa.

‘E aoga foi e puipui mai ai amioga le taupela o alalafaga. O le tulaga foi o le tele ai o fa’afitauli i totonu o le taulaga ma nu’u e latalata iai ona o le leai o ni faiganu’u a faipule ma ali’i.

“O le tulaga tonu ai foi lea o le tele o femisaaiga, maimau ai ola o tagata ma le tele o fa’afitauli ona o le leai o ni matai e ta’ialaina nei tulaga. 

“Tele ai foi ona o i le falepuipui, maimau le taimi maimaua i foi le olaga ae le fa’aoga tatau e tausi ai aiga ma matua. 

Sa ia taua le tele o suiga o le taulaga ma le nu’u. 

“O Apia lava ia i lo’u va’ava’ai iai i Apia o le tele lava o aiga ma le fanau e le’o fai lotu fa’atasi, e tu’u fau lava le fanau ia e tafafao solo e fa’apena foi ma matua. 

“O le eseesega lena ma nu’u i tua nei, e ta loa le logo iloa lelei ua tatau na fai faigalotu ma taimi o afiafi faleaiga. E mamalu lava pulega i tua nei nai lo Apia. 

“Tusa foi pe leai ni sa le afiafi e fai lotu lava tamaiti i totonu o aiga. E pei o le tulaga lelei na i le nofo i tua i nu’u.

“Ia o sina fautuaga i le malo ua tatau ona una’i fa’amalosi faipule ma pulenu’u o nu’u taitasi ina ia fa’amalosia le faiganu’u, tulafono ma nisi o vaega sa masani mai ai Samoa. 

“Aua o lo’u iloa lava i nei aso, ia ua tele lava vaega ua mou ese atu ma i Samoa nei. Ia o sina va’aiga fa’ataitai o le va o e tuafafine ma le tuagane. 

“Ia ua ese lava tulaga ua alia’e mai lenei vaitau. Ua tele lava ina leiloa e le tuagane le va ma lona tuafafine. Ua ota fa’alogo foi i fa’amatalaga feavea’i solo ua leai lava mafaufau ifo e iai leva tapuia. 

‘Ia  e pei o nisi nei o vaega e ao ona fia fa’aleleia ae o tulaga uma tau nonofo ai tua nei o lo’o lelei lava mea uma. 

© Samoa Observer 2016

Developed by Samoa Observer in Apia