Faigata le olaga o le leai se suavai

By Aruna Lolani 16 July 2017, 12:00AM

“O le tulaga lava ia i le suavai ua fia sefulu tausaga talu na leai se suavai,” le tinā ia Filiga Ta’alo o Leulumoega Uta. 

“O le lava le fa’afitauli ua tausaga ai nei o le fa’aletonu o le tulaga i le suavai. 

“Ia pei ona tagataga’i atu le tou polokalame, ia le feau masani lava lena o le la’uina mai o le vai i gatai. O le fanau lava e gafa ma le la’uina mai le vai i aso uma. 

“O le itu e faigata ai e le’o iai se tane vai e sefe ai aua le vaiaso atoa, ia o lea lava le tulaga o lo’o iai nei e aso uma lava le la’uina mai le vai. 

“O matou e mamao mai a ma le aai le matou fale o le faigata lava lenei galuega e fai i aso uma. 

O le suavai sa ia taua e mo tagata uma e o se vaaiga fa’anoanoa ona e le’o tofu aiga i Samoa ma le suavai. 

“Sa talosagaina le suavai, peitai e le’o mafai ona o’o mai le paipa i uta nei. 

“O le aai la lea e ola mai ai le vai ae o na foi na e gata mai ai le tosoina o le vai a le malo.

“Ia o le matou aiga a ia e faamoemoe lava ile vai mai le timu ile tele o taimi.”

E fesoasoani tele la’u fanau ia te a’u i le maumaga ae le gata i lea o le suavai. 

“O le fa’afitauli o le leai o se vai i nei le matou pitonu’u ua fai tele si leva ma ua pagatia foi lenei itu i le fa’afitauli. 

O lea foi e vatu ai se talosaga i le malo ina ia fa’amolemole a ia le mafai lava ona iai se isi faiga i le vai ae sei fa’atoai mai ni tane vai mo nei aiga. 

“O le naunautaiga lava ia te a’u ia maua se suavai, o lenei olaga e lelei lava mea uma ae a leai se suvai ia le mafai ona ola se tasi. 

“E taua tele le vai i olaga i o tatou tagata ma e ao foi o le malo ona va’ai alofa mai le naunau atu i se suavai.  

By Aruna Lolani 16 July 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>