TUMUTUMU O LE LALOLAGI

201 Hits

Ua ta’utino nei e Seiuli Dwayne “The Rock” Johnson, o le a atili galue malosi pea, talu le fa’asalalauga a le Nusipepa o le Forbes, o ia le tagata-o-tifaga e aupito maualuga le totogi i le lalolagi. E 64 miliona tala Amerika (US$ 64 miliona), le totogi o le ali’i 44 tausaga sa avea muamua ma tama-pi’i fa’aporofesa, i le tausaga talu ai, e fa’afetaia ai le sologa lelei o lana ata mulimuli nei, le Furious 7 ma le ata-mata’ina o le San Andreas.

Na fiafia lava ma talia-malie e Seiuli lea fa’aaliga ma ia toe manatua ai taimi faigata i le tau-fa’asoasoa o seleni ina ua na tu’ua fa’afuase’i le lakapi fa’aporofesa i le 1990, ina ua fa’amanu’alia.

E masani lava ona talanoa Seiuli i le vaitau o le 1995, lea na o’o ai lava i le na o le 7 tala Amerika (pe 16.1 Tala Samoa) lana tupe na maua, ina ua muta le taimi sa iai i le Lakapi Liki a Kanata.

“O le maua o se tala manaia fa’apea e masani lava ona avea ma fa’amanatu, ina ia fa’aauau pea ona galue malosi. E le gata ia naunau e “fa’ai’ila le taleni” ae saga fa’aleleia atili pea,” o le fa’aaliga lea a Seiuli i luga o upega-tafa’iLagi.

Sa ia fa’ailoa atu fo’i i ana pa’aga, ina ia ‘auai ma filofilo fa’atasi ma isi tagata e to’a’aga e galulue; ‘aua ne’i fa’agaloina taimi faigata sa iai muamua, ma fa’ailoa mai fo’i, e le o manatu-mama i lona manuia ua iai nei.

“Ma ‘aua lava ne’i galo le tulaga sa e ola mai ai. Sa ‘ave’esea a’u fa’ato’a 14 o’u tausaga ma sa matua mativa lava ma leai se tupe ina ua 23. O aso uma ‘ou te nofo i luga ma tu mai i o’u luma le taimi lea, e foliga o lo’o fa’atalitali mai, ma o le mafuaga lea o lo’u fa’apea so’o, “o lo’o valuvalu mai pea le faitoto’a e tama-leaga ia”. 

“Tatou te manatua ma le fa’anoanoa, taimi ua te’a, ae le-tatau ai lava ona tatou nofoa’i ai ma fa’amoemoe e maua ai se lumana’i manuia. Tatou nonofo fia-a’ai pea ma taumafai e matua tuli ua maua mea lelei uma.”  

E masani ona fa’aaoga e Seiuli, fetusia’iga i luga o upega-tafa’iLagi e una’i ai ma fa’amalosi’Au i le 59 miliona o tagata e fiafia ma taumulimuli i ana taumafaiga. 

Na matua vi’ia, o se tasi o tama-o-ata-tifaga i Hollywood e aupito galue malosi ma o lo’o fa’agasolo lava i le taimi nei ana taumafaiga, i ona ata o le Furious 8, le Baywatch ma le Jumanji lea ua toe fa’afou ae maise ona ata fa’asolo o le Ballers i le HBO TV.

O le fa’aaliga sa fa’alauiloaina i le Aso Tofi, o se vaega lea o le lisi a le Forbes, o tagata ta’uta’ua  e aupito maualuluga totogti i le 2016, lea o lo’o laualuga ai Taylor Smith, i lona totogi e 170 miliona tala Amerika (US$170 miliona).

O le fa’aili mai Peretania, o le One Direction o lo’o tulaga lua e 110 miliona tala Amerika (US$110 miliona), o se pa’u mai le tulaga sa iai i le tausaga talu ai.

O le lisi o tagata-o-ata-tifaga e aupito maualuluga totogi, o lo’o fa’aalia ai, o tama o ata-fitifiti e aupito tetele o latou totogi. O Jackie Chan le tama-‘autu e tulaga lua i le lalolagi, e 61 miliona tala Amerika (US$61 miliona).

E Matt Damon, Tom Cruise ma Johnny Depp, e atoa iai le to’alima aupito maualuuga totogi.

O Jennifer Lawrence le tama’ita’i aupito maualuga le totogi, e 46 miliona tala Amerika (US$46 miliona) i le 2016. E soso’o iai Melissa McCarty – le tama’ita’i-‘autu o le ata o le Ghosbuster, e 33 miliona tala Amerika (US$33 miliona), talu ai le mata’ina o lona ata o le Spy. 

© Samoa Observer 2016

Developed by Samoa Observer in Apia