Fa’agasolo iloiloga a le Vaega o Faigafaiva

Tusia Deidre Fanene ma Fa’aliliu e Maiava ,

122 Hits

Ta’ita’i o le Vaega o Faigafaiva, Va’aaoao Joyce Samuelu-Ah Leong.

Ta’ita’i o le Vaega o Faigafaiva, Va’aaoao Joyce Samuelu-Ah Leong.

O le vaiaso nei sa fa’atautaia ai e le Vaega o Faigafaiva a le Matagaluega o Fa’ato’aga ma Faigafaiva, se iloiloga o le polokalame o Gataifale-Fa’asao a Afio’aga ma Alalafaga i tua, e ala i ni feutaga’iga se lua sa faia i Upolu fa’apea le motu o Salafai. 

O ia feutaga’iga, sa fuafua e fa’ailoa atu ai i nu’u i tua - e ala atu i o latou sui sa ‘auai, le fa’amoemoe ‘autu fa’apea fa’atinoga o le lea iloiloga.

Na ta’ua e Va’aaoao Joyce Samuelu-Ah Leong - le ta’ita’i o le Vaega o Faigafaiva e fa’apea, o lea polokalame na amataina i se fesoasoani tau-tupe a le Malo o ‘Ausetalia mo le Poloketi mo A’oa’oga ma le Fa’alauteleina o Faigafaiva i le 1995. 

 “O le taimi nei, ua 106 nu’u mai motu e tolu, Upolu, Savai’i ma Manono o lo’o ‘auai,” o lana fa’aaliga lea. 

“O le polokalame e aofia ai le galulue fa’atasi ma afio’aga ma alalafaga, e iloilo lelei ‘auala o faigafaiva, o fa’afitauli ma tu’uina atu fo’i ni fofo a’o ni fautuaga mo nu’u uma nei, aua o latou lava o lo’o fa’aaogaina nei puna’oa ma o latou fo’i e pa’u iai le va’aia lelei o le si’osi’omaga o le gataifale ma  puna’oa o iai.” 

O le a tilotilo fo’i i fa’atinoga uma o lo’o faia i lea polokalame, e aofia ai le mata’ituina pe o aoga fuafuaga ua faia, o tulafono a nu’u, o ogasami fa’asao a nu’u-ta’itasi, o a latou galuega o fa’atino fa’apea le lagolago ua tu’uina atu iai a le malo.  “O le a mafai fo’i ona matou tilotilo a ii ‘auala o lo’o fa’aaoga nei e le malo, pe o aoga pe leai fo’i.” 

O tulafono a nu’u ma a’afiaga o ia poloketi, o le a va’ava’ai fo’i iai.

“O lo’o tilotilo i le ‘au’aunaga o lo’o tu’uina atu e le vaega o faigafaiva a le Matagaluega, pei o tulaga tau-asiasiga, o atina’eina o fa’ato’aga-i’a, tulaga tau-fa’ato’aga ma isi ‘auala o faigafaiva ua saunia e fesoasoani ai i afio’aga ma alalafaga i tua.

“O le tulaga lena, o lo’o va’ava’ai lava i itu uma o le polokalame.” 

Na ta’ua fo’i e Va’aaoao, o le fa’amoemoe ‘autu lava o lea iloiloga, o le fia fa’atinoina lea o se polokalame e talafeagai lelei ma mana’oga ua iai i le taimi nei.

© Samoa Observer 2016

Developed by Samoa Observer in Apia