To’ai taunu’u le Manu Samoa i Fiti

Tusia Mere Naleba - Fiji Times ma Fa’aliliu e Maiava ,

171 Hits

ALU IAI MANU! Le Ali’i Kapeteni o David Lemi ma Patrick Fa’apale i ulua’i koleni i Suva, i le malae o le ta’aloga ma Fiti i le Aso To’ona’i nei.

ALU IAI MANU! Le Ali’i Kapeteni o David Lemi ma Patrick Fa’apale i ulua’i koleni i Suva, i le malae o le ta’aloga ma Fiti i le Aso To’ona’i nei.

O se tasi o vaega e fa’afetaia ai e se tasi o toa-magumagu o le ‘Olopeleki lea ua avea nei ma faia’oga-ulu a le ‘Au a lona atunu’u, o Namulau’ulu Alama Ieremia, ona o lea ua atoatoa nei lana lana ‘Au e fa’afeto’aia le ‘Au Taufetuli a Fiti i le Aso To’ona’i nei. 

Na taunu’u le Manu Samoa – lea ua ‘auai ma ana tama-iloga e ta’a’alo i atunu’u fafo – i Suva i le Aso Lua ma ua sauniuni lelei mo lana ta’aloga lona lua i le malae o le ANZ Stadium i Suva.  

Mo le Manu Samoa, o le a tu’u atoa iai le malosi ma le iloa ina ia tumau ai pea lo latou atunu’u i le ta’amilosaga mo le Ipu a le Lalolagi i le 2019. 

“Ua manino lava o le ta’aloga ‘autu lea mo matou i lenei tausaga. O se ta’aloga e sa’ili avanoa ai mo le aga’i i luma ma o se ta’aloga taua tele," o le saunoaga lea a  Namulau’ulu.

 “I le matamata atu i le ta’aloga a Fiti ma Tonga i le vaiaso talu ai, na iloa ai, o le tele o le ‘au po’o ‘au uma fo’i ua o-mai tapena lava ona o se ta’aloga taua tele. E le faigofie mo matou ona o lo’o ta’a’alo i Suva nei, i lo latou malae ma o se tulaga taua fo’i o lo’o matou tulimata’ia.”

Na ta’ua fo’i e Namulau’ulu, o le tulaga fiafia lava lea mo le ‘au ua malaga mai, ona o le ‘au lea o a ta’a’alo nei ma Fiti. Na ta’ua, e matua ‘ese lava mai le ‘au sa ta’a’alo ma Georgia i le vaiaso talu ai, lea na tutusa e ta’i-19 ‘ai. 

 “Na manino lava nai fa’aletonu sa iai i le ta’aloga ma Georgia ma e mautinoa lava le toe tilotilo lelei i nisi o tulaga ma ua fai fo’i iai nai suiga e fa’aaoga ai a matou tama e ta’a’alo i atunu’u mamao. O le a matua ‘ese la mai le ‘au na ta’a’alo ma Georgia.” 

Na saunoa fo’i le Faia’oga Ulu, e iai lava nai manu’aga o feagai na nisi o tama-ta’a’alo, a ua sauni le ‘au mo le ta’aloga i le Aso To’ona’i.

O le itula e 3.00 i le afiafi e amata ai le ta’aloga a Samoa ma le ‘Au a Fiti i le malae o le ANZ Stadium i Suva.

© Samoa Observer 2016

Developed by Samoa Observer in Apia