O Ai Lau Tama-‘Autu?

By Fa’aliliu e Maiava 16 June 2016, 12:00AM

Toe mafaufau tasi lava…O le tasi o tagata Italia aupito ta’uta’ua i vaitau o le seneturi lona 20, o Penito Musolini, e lauiloa i tagata-nu’u Italia, o Il Duce, o lona uiga, ‘O le Ta’ita’i. O ana aga e pei o aga a se fetu-pupula o ata-tifaga ae le pei o se ta’ita’i o se malo, ui e nana i totonu lona agaga i sauaga ma vesiga fa’amaligi-toto.

E ‘a’ave tala ma ta’uta’ua tele Musolini. O ia e to’atasi na liua atoa Italia e avea o se atunu’u mata’utia ma mata’ina ona va’aiga e fa’amemelo iai ona tagata-nu’u, o fa’aaliga tetele, o le malosi fa’aMiliteri ma musika malie. E masani ona tutula’i Musolini i le fa’apaologa o lona maota a’o alalaga fiafia le afe ma afe o tagata e vi’ia o iai i le taimi o le ma’ati’ati o lona malosi ma ana pulega. I tupulaga-tama talavou, o ia lava o se fa’ata’ita’iga lelei o se tama-tane moni, e malosi ma le-fefe; ae mo le itupa-vaivai, o se tama-tane mao’io’i lava e momo’o iai e malu ai i le saogalemu.  

E tuli’aupu e tagata-nu’u Italia ma tagata mai isi atunu’u, ma fa’anaunau i ni fa’amanuiaga mai ia Musolini le fetu-pupula. O se tasi o tagata nei, sa ia avatu iai se ata ma le fa’amoemoe, e saini ai lona suafa, peita’i na te’ena e Musolini le mana’o o lea tagata. Ae ana silafia e Musolini le tagata lea ma le tulaga na o’o fo’i ia iai, semanu na te sainia lava le ata na avatu iai. Ae mo le ali’i-talavou lea sa fiafia ma vi’ia Musolini e avea ma ana tama-‘autu, na mulimulita’i lava i tulaga-a’ao o Musolini se’ia o’o i le aso na tutu-fa’atasi ai ta’ita’i-mata’utia nei: o Penito Musolini ma Adolf Hitler, o ta’ita’i aupito mata’utia  ia ma logologoa i tala fa’asolopito o le lalolagi. 

Ua avea tatou - mai lava i le taimi nei se’ia o’o i le gata’aga - e pei o tagata tatou te matua fiafia ma va’ai-maualuga iai. Fai mai le tusitala Peretania lauiloa o C.S.Lewis: “E matua mata’utia lava le soifua i se lalolagi e matua to’atele le mau atua-tamaloloa ma atua-fafine…O aso ta’itasi uma lava, tatou te fesoasoani ai pea lava pea – i so’o se ‘auala lava – ina ia avea se tasi o tagata nei, a le o se tagata e matua mata’utia le lelei, ’o se tagata fo’i e matua mata’utia le leaga… Ua leai ni tagata-ola masani, ni tagata masani e pei ona iai’.   

O le a le ituaiga tagata e te mana’o e ola ai e o’o i le fa’avavau? Fea e te fia soifua ai pe a uma o le ola nei: fa’atasi ma Le Atua pe leai fo’i? Manatua, na fa’amanino mai lava e Iesu, tatou te ola e o’o i le fa’avavau aua na faia tatou e Le Atua i Lona lava fa’atusa, e o’o i le fa’avavau. Pau le tagata e fetaui lelei e avea ma au tama-‘autu e fa’ata’ita’i iai, e vi’ia ma mulimulita’i iai, ua na o Lou Fa’aola Le Ali’i Foafoa. Tatalo nei e fa’amagalo ‘Oe ona o lou ola i ou ala sese ma agasala. E ao fo’i ona tatalo ia pulea atoa e Ia lou tagata i aso ta’itasi o totoe o lou soifuaga. Pau lea o le ‘auala e mafai ai ona amata sou ola fou, o lou fa’ata’ita’i ma mulimuli i ana poloa’iga uma. Toe mafaufau tasi lava… Toe mafaufau tasi lava… 

By Fa’aliliu e Maiava 16 June 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>