E tatau e le malo ona toe mafaufau ile taugata ole soifuaga
I le fa’atalatalanoina a Fofoga o Samoa ma Lipeni Tiasaga mai Leauva’a, sa ia fa’aalia mai ai le tele o suiga i Samoa ma ua taugata fo’i le soifuaga i lenei vaitaimi.
E 45 le matua o lona soifua, sa fa’aalia mai e Lipeni le taugata ole soifuaga i Samoa ma e tele se a’afiaga mo le to’atele o aiga. O lo’o tua’ia e Lipeni le malo i le leiloa lea o le tiga o aiga o lo’o iai talu ai lenei itu ae peita’i o lo’o fa’amuamua pea e le malo le tau atina’eina o pisinisi o la ua lelei le atina’e.
“Ua tele lava suiga i Samoa,” O le manatu lea o Lipeni
“O le suiga fou lea ou te maitauina ole tau o oloa i faleoloa. O le matua taugata a. E leai a ma sesi e fia fa’amama avega mai aemaise lava i nai tagata ia o lo’o maua ni mea.
“E le pei o aso la sa taugofie ai le soifuaga ma toatele lava sa latou mafaia.”
Sa fa’aalia mai e Lipeni le tele o faleoloa i aso la e taugofie ma e mafai lava oloa e te maua mai i ni sene.
“I aso ua te’a, e mafai lelei ona matou ola i se $10 i le masina atoa,” sa ia fa’apea mai.
“E matou te mauaina fo’i oloa ise tau taugofie ma o se fesoasoani tele lea mo aiga e le tele se latou tupe maua.
Ae peita’i, ua talitonu Lipeni ile tele o suiga i Samoa.
“E le toe maua fo’i aso ua te’a ma ua le toe tutusa fo’i.
“I le taimi nei, toatele tagata tau savali e su’e faleoloa e taugofie oloa e fa’atau ai ina ia maua se latou tupe sefe.”
“E mo’i a e le tatau e le au Saina ona fai o latou pisinisi i Samoa ae ou te ta’utino atu a a’u ia, ana leai le au Saina tatou te le maua ni oloa taugofie.
Na fa’apea mai le tina e le fa’apea na’o ia o lo’o tigaina ai lenei itu, e to’atele lava o lo’o lavevea uma ai ae leai a se fuafuaga a le malo o fai iai.
“Ou te va’ai atu pe to’atele a i fea le mamalu ole atunu’u latou te aveina ifo i luga lea mataupu, e leai lava se suiga o maua mai ai. O lona manatu lea sa fa’aalia ile Fofoga o Samoa.
“O lo’o fesiligia pea e tagata le malo e ala lea ile tatau ona toe mafaufau lelei ile taugata ole soifuaga ua iai ae o lea lava e leai se mea o sui.
“O le fesili la, aisea?
“Ou te masalo o lo’o pisi lava le malo ile fauina o latou fale tetele, ai ole mafuaaga na o lo’o maua ai se latou taimi e va’ai mai ai i fa’afitauli o lo’o feagai ai tagata Samoa.
Na ta’ua e Lipeni ile Fofoga Samoa, e tele a latou mea fai; e fa’aaooga tamaiti, totogi pili ma tausi fo’i le aiga i aso uma.
“To’alua la’u fanau tama lae faifa’ato’aga le taimi nei ae a maua o laua totogi, e le lava fo’i ia matou mea e fai.”
O lesi alagatupe mo Lipeni ma lona aiga, ole atina’eina lea ole la ma’umaga tapa’a ae peitai e le lava fo’i talu ai ona ua taugata le soifuaga.
“O se itu fa’avalevalea ua o’o ai lenei soifuaga ma e toatele lava tatou o lo’o mafatia mai ai lenei tulaga.
“O le ma’umaga tapa’a lava o lo’o feola ai.
“Ae talosaga atu pea i le malo i lenei mea, aua o latou ia latou te feagai ai ma fefa’atau’aiga o oloa i atunu’u i fafo.
“Pe mafai fo’i ia te i latou ona latou faia ina se fuafuaga i le taugata ole soifuaga mo tagata po’o matou i tua nei.”