1. Matauina ma le ofo i Tala Fou a le Televise fai mai ua matua leai ni vailaau mo le togafitiga o gasegase o maua i le taimi nei i le Falema’i Tele i Motootua! Afai la e sa’o lo’u manatu-o se taimi muamua lenei i le tala faasolopito o Samoa talu mai ona Tuto’atasi-ua matua le maua ai ni vailaau mo le togafitiga o gasegase o le atunuu!

A fua la i le ta’u fai mai o le Falema’i Tele i Motootua ae leai ni vailaau mo le togafitiga o gasegase o le atunuu o maua ai-o le a la le ta’u o lea mea? Ua matua aliali mai lava  iinei- le le kea o le Malo i le soifua manuia o le atunuu!

E o’o lava i le Fale Talavai o le Falema’i Tele I Motootua-fai mai ua na o le o i ai o le atunuu e faatau mai ni vailaau-ae fo’i mai le le fiafia ona o le tala e faapea ua leai ni vailaau! O fea o i ai le Minisita o le Soifua Maloloina ma le Faatonu Sili Aoao-ae tulai mai lenei tulaga le manuia? Afai la ua o’o i vailaau e le o maua i Motootua-o le a faapefea la ona fai le auaunaga a lea matagaluega i le atunuu?

O lona uiga-ua moni ai le muagagana fai mai-“Foma’i-tago oe e togafiti lou ma’I”! E matua ofo le loto i si nei atunuu laititī-ae fai mai ua leai ni vailaau! Afai la ua o’o i vailaau ua le maua- e faapefea la ona fai mai ua manuia le atunuu?

O lea ua savali i le 40 tausaga o pulea le atunuu e le faigamalo o i ai nei. O lea foi ua toe tula’i lea lava faigamalo mo le isi lima tausaga-ae leai lava se foliga tino mai o se manuia o lenei atunuu! A tatou tilotilo la i le faitau miliona ma miliona o tupe a le atunuu ua maumau talu ai faiga-pi’opi’o a le faiga-malo lea ua toe tulai mai- e te talitonu la e ono maua afea se manuia o le atunuu?

Silasila foi i faama’i pipisi o loo faamata’u mai ia Samoa e pei o le Denge ma le Zika- e matua leai lava se mea o faia e le Matagaluega o le Soifua Maloloina –e fo’ia ai le faafitauli!

O lona uiga- e na ona fai mai i le atunuu e faamama lapisi ma teu nofoaga o tautuufua ai le namu- ae matua leai lava ma se latou taumafaiga o fai e tineia ai ia faama’i! Atonu la ua tatau loa ona aumai ni falema’i mai fafo-aua o lea ua tatou iloa nei- e matua leai lava se mea o faia pe ua matua saga’i mai e fai mo le soifua maloloina o le atunuu! Ia –afai la ua leai ni vailaau o maua i Motootua-o le a la le pogai e faatonu ai fua le atunuu e faaaoga isi fale talavai o loo i le Taulaga.

Afai la ua tulai mai lea tulaga- ia manatua la-o le isi 5 tausaga lea ua savalia nei- o se taimi umi-afai la e faaauau pea lenei tulaga-o le mea sili lava- ia silafia e tagata uma –o le mea lava lea na tatou loto i ai! Ua moni ai lava le upu na tagisia lava e Lauulu se vaa ia goto-ma o lea lava ua goto! Afai nei la ae leai foi ma ni vailaau a Fale Talavai o i le Taulaga-o ai la a tua i ai le atunuu? O le a sou taofi?

2. Matauina foi mai le tele o Faipule fou ua filifilia ni o latou manatu faaalia ma nisi o mea ua latou faamoemoe e faatino! Ae pei lava ona masani ai-o le taimi lava le itu taua! E mafua ona o nei mea o folafolaga-ua fai foi ma faatiga-taliga i le toatele o tagata-talu ai ona fai mai latou-Fai mai e leai lava se faipule e leai ni ana folafolaga-ae a fua i le mea moni-e faapefea ona faatino ia fuafuaga e folafola mai pe afai e le talia e le ta’ita’i?

E faapefea foi ona faatino nei folafolaga pe afai ai e leai ni tupe e fai a’i-pe ua uma ona fai se lisi o mea e ave i ai le faamuamua? Fai mai la se tasi o tamā matua-o ia mea o folafolaga-o mea tauave lava ia a tagata e faananau ia maua se mea o mana’o i ai-ae a maua loa-ona le manatu mamafa lea i ai-se’ia o’o foi i le isi faiga-palota ona toe fai foi lea! O le a sou taofi? 

3. Matauina i Tala Fou o lea lava ua toe faaa’e Faumuina Tiatia Liuga e lona nuu o Sili, Savaii! Ia-o ai se afioaga a’o se alalafaga e le fia maua le to’afilemu ma le sologa lelei o se nuu? O faaletonu ma lape o le natura lea o le tagata soifua-ma e leai foi se isi e sao ai! Afai la o lea tulaga na mafua mai ona o le faamasinoga ma Le Tagaloa-o le a la le tulaga o loo taoto ai lea mataupu? O lona uiga-e faamaonia e le afioaga o Sili……”e fai lava le monotaga a le Papā?

O le uiga la o le manatu-o lea ua ta’oto i lagotonu le tasi vaega o le mataupu-ae o le a le tulaga e uiga i le isi vaega o le mataupu na mafua ai ona faatula’iese  Faumuina Tiatia Liuga? O le a sou taofi? 

Matauina foi i Tala Fou- le faamanatuina o le Aso Soifua o le Tina Matua o Lotte Chan Mow poo Amau! O le vaai tino la i lenei Tina o Lotte-ua matua matua lava ma e faafetaia ai le Atua ona o nei tausaga e tele o lona soifuaga e pei ona faamanatuina. Ae i le toatele o tamaiti a’oga sa a’o’oga faatasi ma si ana fanau tama i Felela Malisi i Mulivai- e le mafai ona galo lenei tina ma lona agalelei.

E manatua lelei e ia tama a’oga o le Malisi aso o fai lo la fale’aiga ma le Toeaina i Saleufi. E silasila mai loa Lotte o ota tūtū atu i le faitoto’a o le fale’aiga-valaau mai loa ta te alu atu ta te ‘ai! A ta fai atu leai faafetai ona o lota fefe-savali mai loa ta’ita’i atu ta ita i totonu faa-nofo i le laulau o le faleaiga-aumai loa ma la ki-falaoa! Ona fai mai lea- “tope le ‘ai ae alu i le a’oga”  Talofa e Lotte- e ui lava ina matou le iloa le faamanatuina o lou Aso Soifua-ae ia alofa le Atua ma taui atu lou agalelei- ia i  matou! Ia maua pea lou malosi faafouina mai le Atua i aso o totoe!