O le maua ai o le fa’atalatalanoaga ma le Fofoga o Samoa ma le tinā i a Siufaga Lusia Lui o Samusu Aleipata na ia  ta’ua ai le fia maua ai o se fesoasoani mo le toe fa’aleleia lea o lo latou fale e tua i ai.

“Ia e pei ona outou silasila mai o lea le tulaga o lo’o ua i ai nei le fale o lo’o ua aga’i ai le aiga,” o lana saunoaga mai lea i le Fofoga o Samoa.

“O lo’o lelei si o matou fale, e pei o  le uiga o  la’u tala o le mea e sili ona taua o le maua lea o le fa’apaolo e tua i ai ai mai le timu ma le la.

“Ae pei o lea lava le tulaga o lo’o ua matua’i mana’omia lava.

“O si o matou aiga, ia o fale-le-taua lava ia mai aso lava la o lo’o o matou fa’aaogaina lava e o’o mai le taimi lenei.

‘E to’atasi lava la’u tama ma o lo’o nonofo i Apia ma le fanau e to’afa, o le taimi lenei o le alagatupe o lo’o tua ai le aiga e maua mai salu, o fa’i ma nisi o fua o fa’aele’eleaga e fa’atau atu i le mamalu o le atunu’u.

“Ia o lea le tulaga e maua mai ai le tupe e mafai ai ona fa’atau mai la matou paoa ma nai vaega laiti mo si o matou aiga e pei o suka, masima na isi.

Na ia fa’ailoa o le tele lava o tausaga na nonofo ai Apia ma o le taimi lenei o lo’o ua  toe fa’amautu atu ai i Samusu.

‘Ia e pei ona outou silasila atu, e le soifua maloloina lenei vaega o lo’o tua ai le taimi lenei.

O le itu mautinoa e le mafai ona maua se fesoasoani mo le fausia lelei ai o vaega nei mo le aiga.

“Ona o le tulaga lava i le le gafatia aemaise o le  taugata ai o le tau o le soifuaga o lo’o ua i ai nei.

“E pei o lea e talosagaina ai so’o se tasi e mafai ona fesoasoani mai mo si o matou aiga i le  taimi lenei.

“O le itu lavaia tau meaai olo’o lava ae pei o lea lava le vaega o lo’o ua taumafai ai lava le taimi lenei o le fa’aleleia o lea  vaega e pei ona fa’ailoa atu muamua.