E manuia pe ā galulue
O le talitonuga o Ioane Sauni o Vailele, o le galulue fa’atasi i le lumana’i o le a tele se sao mo le aga’i ai luma o le afio’aga ma le atunu’u.
“Ia e pei o la’u ia lea talitonuga o lo’o ua i ai nei, e pei o le teuteuina ai o ‘a’ai ia o le masani lea o si o matou fo’i nei pito.
“O le taumafai lava ina ia ola lelei ma ia faia o so’o se fuafuaga aua le lelei alu i luma o afio’aga ta’itasi aemaise ai si o tatou atunu’u ma le autova’a mai o turisi mo le lelei alu i luma o fanau i le lumana’i.
“Ia ma o se fa’ata’itaiga lelei fo’i lea i nai fanau, aua e ta’u sa’o atu lava, e ese ma le manaia o le olaga na ou ola ane ai a’u ia i lo’u nu’u.
“E galulue fa’atasi e leai se tomumu, po le a lava se isi faiga e fa’apea e fa’atuai ai nisi tulaga ae galulue fa’atasi tagata mo le lelei o isi.
“O matai o taulele’a o lea lava le tulaga na maitauina.
O lona talitonuga o se ata lelei lea i le aga’i ai le lumanai.
“Ia o lea lava le fa’amoemoega o lo’o ua i ai le taimi lenei, o le galulue lava.
“O le olaga lenei ia e fa’apena lava lona faiga, e usita’i muamua ona faitio mulimuli ai lea.
“Ae leai se tulaga e fa’apea o le a saga fai lava i fea le olaga ia, ae ao lava ona fa’aaoga lelei mea uma mo le lelei lautele o le atunu’u.
Na ia ta’ua afai lava e lelei le lesona o fanau i le aso o lea lava le tulaga e ao ona aga’i i ai le lumana’i.
“Ia e pei o lea le auga autu ai lava o si o matou galuega ole fa’amamaina o le ‘a’ai nei i aso uma, ia aua a ma ma ia e ta’uleleia lava le to’atele o lo’o i le afio’aga nei.
“O le agaga maualuga o nei galuega, fa’atasi e mo le lelei alu i luma o le atunu’u.
“E le fa’apea ua ala ona fai e tauva atu ai isi afio’aga ae o le agaga maualuga ia avea Samoa ma se atunu’u matagofie i le lalolagi, ma e nonofo filemu ona tagata uma.