Toe sefulu aso o lo’o totoe mo sau fesoasoani

16 February 2016, 12:00AM

Iliā L Likou

 

O le toe sefulu ai nei o aso o lo’o totoe aua le fa’amoemoe o le ofoina atu ai lea o so’o sau fesoasoani e te finagalo ai mo e na ‘a’afia a latou pisinisi i le mu ai o le Maketi i Savalalo.

O le vaiaso ua mavae na tau’a’aoina atu ai e le Faletupe o le Samoa Commercial ma le Ofisa Inisiua o le Federal Pacific Finance la latou fesoasoani tau tupe mo e na ‘a’afia.

O le ofisa autu o le faletupe o le Samoa Commercial i Matafale na va’aia ai le tau’a’ao atu ai lea  e lana afioga i a Lemalu Ray Ah Liki o ia fo’i o le Pule Sili o le faletupe, la latou fo’ai i le Ta’ita’ifono mo le fa’alapotopotoga ‘Ofoina e Samoa Fa’amoemoega’ le meaalofa e $5,000,i le faletua i a Adele Kruse.

E pei ona silafia ai ua fa’atuina lenei fa’alapotopotoga o le ‘Ofoina e Samoa Fa’amoemoega’ ina ia fa’afaigofie ai e vaega uma aua pisinisi ta’itasi na ‘a’afia i le mu ai o le maketi i Savalalo.

 “O lo’o ua so’oso’o tau’au atu nei le faletupe aua le fa’amoemoe e pei ona i ai le fa’alapotopotoga o e na ‘a’afia i le mu,” saunoaga lea a Lemalu.

“O se fiafiaga sili lea i a’i matou nei le galulue fa’atasi ai lea ma i latou nei.

O le afioga i a Namulauulu Sami Leota o ia fo’i o le Pule Sili o le Ofisa Inisiua o le ‘Federal Pacific Finance’ na o latou foa’ia fo’i se tinoitupe e $20,000, ma o lea fesoasoani na o latou taua’aoina sa’o i le vaega o lo’o i ai le ‘au fai maketi i Savalalo.

E 50 i latou mai le 200 o le ‘au fai maketi na pikiina ai mo lea fa’amanuiaga ma e ta’i $400 na  mafai ona maua e le tagata po o le faipisinisi e to’atasi.

“Ua o matou tu’uina atu lenei fesoasoani mo e na ‘a’afia a latou pisinisi i le mu aemaise ai lava e o lo’o o latou fa’atinoina le gaosia ai meataulima Samoa, elei, fale’aiga ma nisi o faleoloa, ma o le fa’amoemoe tele lava ia mafai ona fesoasoani ai mo le toe atina’eina o a latou pisinisi,” Namulaulu.

Na fa’ailoa le agaga fa’afetai ai o le faletua i a Adele Kruse ona o fesoasoani e pei ua lagolagoina ai nei le ‘au fai pisinisi o lo’o i le maketi i Savalalo.

E pei ona silafia ai e 30 aso lea ua tatala ai nei le faitotoa mo so’o se tasi e fia fesoasoani lea na amata mai i le aso 28 Ianuari se’ia pa’ia le aso 26 Fepuari, ma ua toe sefulu ai nei i le asō aso o lo’o totoe.

O lo’o ua tatalo malosi atu ai nei lea fa’apotopotoga i le atunu’u ina ia tutu fa’atasi mo lea fa’amoemoe aua lava le toe fa’afo’i ai o pisinisi na ‘a’afia i se tulaga lelei e pei ona sa i ai muamua.

“O so’o se fesoasoani lava $5 pe $10, o le a mafai e lea tupe itiiti ona fa’atupuina se aofaiga o se tupe tele pe a tatou galulue fa’atasi, ma so’o se aofaiga e te tau’a’aoina mai e talia ma le agaga fa’afetai” Adele Kruse.

Na fa’ailoa mai fo’i lo latou agaga fa’afetai i e uma na alolofa ma agalelei mai lava le aso na tula’i mai ai le fa’alavelave se’ia o’o mai i le asō

 

16 February 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>