Ripotia e Tusitala o le Samoa Observer

Fa’aliliu e Maiava

Ua fa’aalia le le-fiafia tele o se vaega o matai sa fa’ao’o atu i le Faletupe o Atina’e a Asia i le 2014, sa latou fa’asea o se fuafuaga e ‘avea ai fanua fa’aleAganu’u.

Ina ua fa’afeso’ota’i atu e le Samoa Observer mo se tulaga ua iai lea mata’upu, na fa’aalia ai e le Fofoga o le Vasega lea o Matai, o Fiu Mata’ese Elisara, ua matua le-fiafia tele ona o le fa’ata’amiloga o le mata’upu lea, ua “matua leva tele o fa’atalitali iai.” 

“O le taumafai e fa’atuai ona fa’atino o ni feutaga’iga se’ia mae’a faiga-palota tele ia Mati, ua le maua ai lava se fesoasoani i lenei mata’upu,” o le fa’aaliga lea a Fiu. “Sa matou manana’o lava ia o’o mai i le taimi nei, ua mae’a ni talanoaga pe ua iai fo’i se la’asaga mo le aga’i i luma talu ai, ua latalata i le lua tausaga talu ona tu’uina atu le matou fa’asea i le Faletupe, i le Aso 29 o Aokuso 2014.

 “Atonu o se taimi talafeagai lelei lenei e fai ai se fa’atatau a le atunu’u i ana faiga-palota aua o la ua malamalama lelei i le ‘autu ma le fa’amoemoe o le matou talosaga, lea e naunau ai e faia o se feiloa’iga e fetufaa’i ai finagalo i lenei mata’upu.”

I le latou fa’asea, o lo’o fa’aalia ai popolega tele o Fiu, Lilomaiava Dr. Ken Lameta o Vaimoso, Telei’ia Dr. Sapa Saifaleupolu o Samatau ma Leulua’iali’i Tasi Malifa  o Afega, ona o pulea-to’atasi, le fa’aaogaina o  

E mafua lo latou le-fiafia ona o se fuafuaga a le Vaega o Fesoasoani a le Faletupe o Asia mo Samoa e “Una’ia ai le Fa’aaogaina o ‘Ele’ele Pulea Fa’aleAganu’u mo Atina’e.” O lo’o finau le matai-Samoa, ua fa’atino lenei poloketi e le’i faia ni feutaga’iga talafeagai ma le atunu’u aoao.

“O le fa’anoanoaga tele lea, ona o lea ua o’o i le taimi aupito taua o le a alo le atunu’u mo ana faiga-palota i le Aso 4 o Mati 2016, a ua matauina ma le popole tele le leai o se sui-tauva po’o vaega fa’a’Upufai fo’i o lo’o fa’amamafa ma fa’atauaina le mata’upu lea i a latou fa’atosina o fai,” o le fa’aaliga lea a Fiu.

 “Mo tatou lava, e leai se aoga o nei mea uma pe a silafia mulimuli ane e le atunu’u, ua le amana’ia a latou aia-tatau e pulea ai, e puipuia ma feoa’i sa’oloto ai i o latou ‘ele’ele o fa’asinomaga ma ‘ele’ele e umia fa’aleAganu’u. Lea e talanoa atu i le 80 pasene o ‘ele’ele atoa o le atunu’u e a’afia ai.” 

O le tulaga na o’o iai, na ‘auina mai e le Faletupe o Asia se vaega su’esu’e fa’apitoa e to’alima mo lea poloketi i Samoa. 

Na maua e le vaega su’esu’e lea, e leai ni feutaga’iga talafeagai sa faia mo lea fuafuaga, ui sa tu’uina atu e le malo o Samoa ni ripoti fa’apea, ua mae’a ona fa’atinoina o ia tulaga.  

 “O se vaega taua lava o le matou fa’asea, o le leai lea o ni feutaga’iga na faia ma tagata tonu e pule ‘ele’ele nei fa’aleAganu’u, lea matou te iloa, o se mea e tatau ona ulua’i faia a’o le’i amataina lea fuafuaga,” o le fa’aaliga lea a Fiu. 

 “Ae fa’apitoa lava i a matou iloiloga le taunu’uga o le Vaega I ma le II o fuafuaga sa fa’ata’oto mai ina ia talia ai e faletupe o ‘ele’ele e pulea fa’aleAganu’u e fai ma vaega e fa’amau ma fa’amaoniga e puipuia ai tagata ma pisinisi e autova’a mai i Samoa.

“E le gata i lea, ae aupito taua le taofia pea o ‘ele’ele fa’aleAganu’u, e ‘ese mamao ai mai le tulaga o lo’o fa’amatala so’o e le malo i tagata-nu’u o Samoa, o lo’o puipuia ai i lalo o le Fa’avae.  

 “Ae fa’afetai ai ona ua matu’u mai le Faletupe o Atina’e ma le Malo i le matou finau atu ma iloa ai fo’i, e le’i faia lava ni feutaga’iga talafeagai mo le fa’atinoga o lea fuafua. Ona o matou sa talosaga le taofia o fa’atinoga uma o le Vaega I ma le II se’ia mae’a ona fa’atino o sea feutaga’iga ma le mamalu o le atunu’u, e umia tonu ia fanua ma ‘ele’ele fa’aleAganu’u. 

 “O lo’o fa’aauau pea ona finau i tulaga o feutaga’iga pe ono toe asia ai nisi o taunu’uga o le Vaega I ma le II, le Tulafono o le Resitalaina o ‘Ele’el 2008 ma le Tulafono a le Komiti Faufautua mo Fanua Fa’aleAganu’u 2013.

“Mo matou, o le a fa’aauau pea ona fesiligia le tulaga lea, ae mo le malo, e le-manana’o e toe fo’i i tua i le Vaega I ma le II lea, ae amata ni feutaga’iga o mo’omia, i le Vaega Lona III.” 

Na ta’ua e Fiu, o le i’uga o le latou fa’asea, ua talia ai e le Faletupe a Asia, le fa’afaigaluegaina o se Tagata Poto-Fa’apitoa mo Feutaga’iga.

 “Peita’i, e fa’atoa mafai ona fa’afaigaluegaina e le Faletupe o sea tagata, i le vaega fa’ai’u o Tesema 2015 ma o’o mai ai i Samoa i le fa’ai’uga o Tesema 2015 ma amata ai loa ona galue i le ogatotonu o Ianuari 2016, mo se ata-fa’ata’ita’i o mana’oga talafeagai mo feutaga’iga e tatau ona fai,” o le fa’aaliga manino lea a Fiu na tu’uina mai.

“I se fonotaga a sui o le Faletupe ma le malo ua silia i le lua vaiaso talu ai – i le Aso 27 o Ianuari o le tausaga nei lava, na fa’amauina aloa’ia ai le matou fa’asea ona o le fa’agasologa o lenei fuafuaga, ua matua fa’atiga-ulu tele mo matou ma ua fai lava si umi tele o matou fa’atalitali.”

Ae na ta’ua e Fiu, o lo’o tumau pea lo latou fa’amoemoe.