Sauni Namulau’ulu mo le Palemene

172 Hits

Ripotia e Lanuola Tusani Tupufia 

Fa’aliliu e Maiava

 

O le Tofa a Namulau’ulu Dr. Malofouosamoa Nu’ualofa Tu’u’au-Potoi le tasi sui-tauva tama’ita’o lo’o fa’atula’i mai mo se sui o le Itumalo Tu-Taulaga i Sasa’e, i Faiga Palota Tele a le atunu’u.

Moni lelei, e iloa-gofie Namulau’ulu i ana teuga ma la’ei fa’aleAganu’u masani, a o le to’atele lava, lea fa’atoa silafia, ua loa tausaga o foufou le sa o le Tama’ita’i Foma’i – ua 67 tausaga o lona soifua – mo le Palemene. 

Na soifua ane i le pitonu’u o Nu’ualofa, i Vailoa Palauli, ma na saunoa, ua sauni atoatoa e fa’ataunu’u lana miti.

“Ua leva lava ona ‘ou mana’o e fia avea ma faipule o le palemen i lo’u olaga atoa, peita’i e le’i maua lava se taimi e avanoa atoatoa ai,” o lana fa’aaliga lea.

“E le’i fa’aigoina a’u o Malofouosamoa e ‘ou matua. O le pulenu’u o le matou nu’u na fa’aigoa a’u ia Malofouosamoa talu ai, o le taimi tonu lava lea o le ulua’i Palemene po’o le taimi fo’i na fa’atoa avea ai Samoa ma malo tuto’atasi ma sa ‘ou mafaufau loloto lava iai i lena mea.”

O le a finau nei Namulau’ulu ma le Minisita Lagolago mo Fa’alapotopotoga ma Atina’e ‘ese’ese a le Malo, o Papali’i Niko Lee Hang fa’apea le tama’ita’i-faiPisinisi, o Toleafoa Mara Coffin Hunter.

Ma o lo’o mafanafana lava lona finagalo mo le palota o le a alo iai.

Sa toe to-manatu Namulau’ulu, ma toe manatua ai se tasi o Faipule mai Palauli i aso ua mavae, le Afioga a Tualaulelei Mauli, o se tasi o tagata iloga i le amataga mai o le malo a’o le’i tuto’atasi.

“E masani lava ona talanoa Tualaulelei ma si ‘ou tama i tulaga o faigamalo,” o lona toe manatua lea o ia taimi, lea e le mafai ona galo.

I faiga-palota talu ai, sa tauva ai le ali’i-o-Namulau’ulu, le Afioga a Masoe Leota Dr. Toga Potoi mo le nofo o Vaisigano Nu.1 ma e le’i manuia ana taumafaiga. 

Ae na ta’ua e Namulau’ulu – le sa avea muamua ma Fa’atonu o le Vaega o ‘Au’aunaga Lauteler maile 1997 – 2005 e fa’apea, o lo’o sologa lelei lava ana tapenaga mo le  palota.

E talitonu Namulau’ulu – o le alo o le Faife’au Toea’ina o Tu’u’au Sao ma le Faletua o Gogosina ‘Ai’ono Tu’u’au Sao ua tofafa i tu’ugamau, o lona lea fa’asinomaga, o le tautuaina o Le Atua ma Ona tagata.

“O le a’oa’oga lea o matou nei o fanau a faife’au, ia ola e tautua so’o se tagata, pe o le falai-panikeke mo le malu-taeao ma so’o se mea lava e mo’omia ai le ‘au’aunaga,” o lana saunoaga lea.  

 “O le tulaga lava lea ua masani ai le olaga, o le tautuaina o Le Atua ma ona tagata ma ua 32 nei tausaga, o lo’o ‘au’auna pea mo le mamalu o le atunu’u e ala i galuega a le malo, fa’apea fo’i le sefulu tausaga talu ai, i le vaega tuma’oti.

E talitonu le sui-fa’atu, o le matua o le soifua, o le tele fo’i lea o le silafia ma le malamalama ua maua, ua fa’aTagata-matua ma ua mamao fo’i le silasila mo le aga’i i luma o le soifuaga. E le fa’atusaina lea i le tupulaga o aso nei, lea na fa’aalia, e ma-itaita, e le mautonu ma le-lava fo’i le onosa’i.

“Pei lava ona silafia, o le Fono Faitulafono lava e afua ai le manuia o le atunu’u. E le gata i le faia o tulafono a’o le fa’amalosia fo’i o ia tulafono aua se suiga lelei e si’itia ai le soifua o le atunu’u.”

I le tulaga tau Vaega Fa’a’Upufai, na fa’amalamalama mai e Namulau’ulu lona filifilia o le Vaega e Puipuia Aia Tatau A Tagata (HRPP). “O lo’u tina, o le faletua o le faife’au. Na fai mai, e tatau lava ona e alu e lagolago le malo. E talitonu o ia, po’o ai lava o lo’o i le malo, o tofiga na mai Le Atua.”

Sa toe fa’amanatu fo’i e Namulau’ulu le la fonotaga ma le Palemia, Tuila’epa Sa’ilele Malielegaoi, lea sa ia fesiligia ai le Ali’i Palemia, pe talafeagai ona tauva i lalo o le fu’a a le HRPP.

“Na tali mai ua tatau talu ai, o le nofo-fou le nofoa o le Itumalo Tu-taulaga ui o lo’o iai pea le Faipule o Papali’i Niko Lee Hang. ‘Ou te le’i mana’o e matamata mai tua-pa. ‘Ou te le manatu fo’i, a-mea o a’u o se sui le-aloa’ia a le HRPP – se mea o na mea uma. ‘Ou te iloa le to’atele o sui-tuto’atasi e osooso-solo, ae mo a’u lava ia – o se tamata’ita’i aga-fa’aPorofesa, e le talafeagai lena mea.”

Se’e ane i mata’upu anoa mo le finau ai i faiga-palota, e ‘ave le fa’amuamua a Namulau’ulu, i a’oa’oga. E naunau e una’i ma fa’amalosia le ‘ave o fanau a le atunu’u i a’oga – a’oga tulagalua ma a’oga fa’aItumalo. E fa’apena fo’i ona naunau ia toe amata a’oga-a-faife’au a Ekalesia uma e pei ona sa masani ai i aso ua mavae. 

O ia fuafuaga uma, e taofia ai le va’aia pea o fanau-laiti o fa’atauoloa solo i maga-ala o Apia ae maise lava i nofoaga i le taulaga o lo’o va’aia ai lea fa’afitauli.

“Moni o lea ua fa’amalosia le ‘ave o fanau i a’oga peita’i, e le o fa’amalosia lava,” o lana saunoaga lea. “’Ou te manatu ua tatau ona pa’u le mamafa i matua.

“O le olaga mativa lea ua va’aia nei, o le fa’aaliga lea o le tele o le fa’aletonu ua iai nei le atunu’u aua, a silasila i le faitau-aofa’i o le atunu’u, e aupito to’atele lava i tupulaga talavou ma fanau laiti.”

O le fofoina o lea fa’afitauli, na faia ai e le sui-fa’atu, o se fa’ata’ita’iga mai le Kolisi o Matata ‘Ese’ese a ‘Ausetalia ma le Pasefika (APTC), lea o lo’o fa’atino ai su’esu’ega, po’o a ituaiga o tomai ma agava’a o lo’o aupito mo’omia e le maketi.  

“A maua loa i’uga o su’esu’ega ia, a’oa’o ai loa tamaiti.”

O le tele o lona silafia ma le malamalama o tulaga tau-Soifua Maloloina, e talitonu ai Namulau’ulu, e tatau ona fa’alelei le ‘au’aunaga lea mo le atunu’u aoao. O ia sa ‘auai i le foafoaina o suiga fou ua iai nei a le malo, ma ta’ua ai, o le ‘autu lava mai le amataga, o le fa’aitiitia lea o tupe-alu, si’itia le lelei ma atoatoa le ‘au’aunaga e tu’uina atu mo Samoa. 

Peita’i, e le’i atoatoa lava ona fa’atino o ia fuafuaga.

“I aso ua mavae, sa galulue so’oso’o-tau’au lava le vaega o le Soifua Maloloina ma komiti-tumama i afio’aga ma alalafaga i tua,” o lana fa’aaliga lea. “’Ou te mana’o e toe amata le so’otaga lelei lena. O le mea moni, o le ‘au’aunaga Fa’aSoifua Maloloina lava na afaina ai le so’otaga lena, i le latou fa’apea mai, ua aiaina tele e komiti-tumama ma tama’ita’i o afio’aga, le latou galuega, peita’i, o vaega uma ia o le latou ‘auai, e tu’uina atu le ‘au’aunaga tauSoifua Maloloina. 

“E matua fa’aletonu lava le mea ua iai i le taimi nei, ua ‘ese’ese le ‘Au’aunaga Fa’aSoifua Maloloina ma le Matagaluega o le Soifua Maloloina. ‘Ou te lagona, e le o galulue fa’atasi ae o lo’o toso lava fala o le vaega ia ma fa’atino le mea e mana’o ai latou, e tuto’atasi.”

A fa’atusatusa i le taimi a’o galue ai i le Matagaluega, na ta’ua e Namulau’ulu, e foliga ua fa’ato’ateleina tagata ae leai se galulue fa’atasi.

“O le taunu’uga aoao-tetele, o le tatou galulue fa’atasi i se fa’amoemoe e tasi, o le si’itia lea o le soifua o o tatou tagata,” o lana fa’aaliga lea. “A fua i aso la, lea ua matua tele tupe ma tetele totogi, ae la’ititi galuega e fa’atino.

“O le mafuaga lea, ona e ‘ese mafaufauga ua iai, e fai lava le mea e mana’o ai le tama a le olomatua ia. E leai se agaga e galulue fa’atasi…e finau ma finau ai lava e matau galuega ua faia ae le tu’ufa’atasi galuega ma fa’atino fa’atasi.”

O nisi o ana poloketi o lo’o naunau iai, o se nofoaga fa’apitoa e fa’aaoga e se komiti-tumama mo togafitiga fa’aSoifua Maloloina.

Na ta’ua fo’i, ina ia maua  se Samoa Soifua Maloloina, e ao lava ona toe fafagu mai ma toe fa’aolaola galuega o le tausia o le soifua maloloina lelei lautele ma siaki masani pei ona faia i aso ua mavae.

‘Ese mai lea, ae na ioeina e Namulau’ulu, le tulaga ua iai nei Samoa.    

 “E tele lava lu’itau ‘ou te talitonu e ao ona fa’aleleia ma galulue fa’atasi ai mo le tu’uina atu o le ‘au’aunaga…ua matele-tele i faiga fa’aPapalagi. O le tasi lava lea o vaega sa ‘ou finauina i suiga fou tau-soifua maloloina, o le fa’aaogaina lava lea o faiga ma aga fa’aSamoa i so’o se mea, ina ia lagona ma manogi-Samoa, ia foliga-Samoa fo’i mo o tatou tagata Samoa.” 

O tulaga tau-turisi ma tagata maimoa mai fafo, le tasi vaega e fa’atauaina tele e le sui-fa’atu.

O Namulau’ulu, o le Ta’ita’ifono o le Sosaiete mo le Puipuia o Meaola (APS) ma na te una’ia malosi le atina’eina o tagata-tafafao mai fafo i nofoaga o le taulaga ae maise le tausia lelei o meaola – ae maise lava o ta’ifau.

O se faletua e fiafia tele i meaola ma e talitonu fo’i, e le o se faiga alofa lea sa ulua’i fa’atino e le vasega o leoleo, e fa’alalo ai ta’ifau, aua e le o-gatasi ma le fa’amoemoe o le Sosaiete.  

O le tasi vaega e talitonu Namulau’ulu e le o matua atoatoa ona fa’aaoga, o le Fa’alapotopotoga mo Su’esu’ega Fa’aSaienitisi a Samoa (SROS).

Na fa’aalia, e moni ua tele su’esu’ega a le fa’alapotopotoga i oloa ma faiga ‘ese’ese e ‘auina ai oloa i fafo mo fefa’ataua’iga, ae le o lelei lava ona fa’aaoga. Lona uiga, e le o iloa tele e le atunu’u. 

“Ua anoanoa’i a latou su’esu’ega ua mae’a ona fa’atino peita’i, e le o fa’ailoaina atu i tua i le atunu’u,” o lana fa’aaliga lea. “O matua tele lava lea tulaga ua maua…fa’afetai ua iai se nofoaga mo su’esu’ega fa’apea e ui lava tatou te le o fa’aaogaina fa’ai’uga o a latou su’esu’ega sa faia. O se fa’ata’ita’iga le manogi o le moso’oi. Moni e la’ititi, ae taua tele i maketi i fafo, ae maise, e matua tele lava le moso’oi ma pua-manogi i o tatou ‘ele’ele, ae la’ititi lava se galuega o faia e mafai ai ona ‘auina atu i maketi i fafo.”

O le isi fa’ata’ita’iga sa ia ta’ua, o le la’au o le avoka. Na saunoa, e tatau i le Matagaluega o Fa’ato’aga ona galulue so’o-so’o-tau’au ma le Fa’alapotopotoga o Su’esu’ega Fa’aSaienitisi e una’ia oloa nei aua se manuia o faifa’ato’aga uma o le atunu’u.’

“Ua se solofanua-mate le atina’eina o fa’ato’aga,” o lana fa’aaliga lea. 

O le Fa’amoemoe o Namulau’ulu mo le Palota, o le “’Ana’ana e ‘Au’auna ma le Alofa.” 

O Namulau’ulu o lo’o alala nei i Tiapapata ma Vaivase-uta, ae o lona tupu’aga, e mai Vailoa Palauli, Gautavai, Fasito’o-uta, Lauli’i, Falealupo ma Fagali’i.

Sa galue o se tasi o Foma’i- fa’apitoa mo le soifua maloloina lautele mo le 32 tausaga e aofia ai le avea o se foma’i i le tele o falema’i fa’aItumalo o le atunu’u.

O Namulau’ulu, o se tama’ita’i-foma’i ua ritaea, ma o lo’o galue nei fa’avaitaimi o ia o se foma’i, i le Falema’i Fa’aPisinisi, o Potoi Medical Clinic. O lo’o ia fa’atinoina fo’i galuega e galue-fua ai mo lana ekalesia, o Fa’alapotopotoga Tuma’oti fa’apea fa’alapotopotoga i tua.

 

© Samoa Observer 2016

Developed by Samoa Observer in Apia