Lotu Fa’afetai aiga Gatoaitele Savea Leulua’iali’i Tuivaiese II
O le Aso To’anai na se’i mavae atu nei na fa’ataunu’uina ai le Lotu Fa’afetai a le aiga o Gatoaitele Savea Leulua’iali’i Tuivaiese i lo latou maota i Tanumafili le Tolotolo.
Na amatalia e le sauniga lotu na saunia e le Susuga i le Fa’afeagaiga i a Luapene Nepo o le Ekalesia Fa’apotopotoga Kerisiano a Samoa i Afega lava.
O se fa’atasiga taua tele lea mo le aiga atoa e talosia ai taualumaga uma o le a feagai ma le aiga i lenei tausaga fou ua aulia.
O lea fo’i le fa’amanatu o le Upu a le Atua i lea taeao mo suli uma.
Na saunoa se tasi o sui o le aiga i a Fata Malifa i le taua o lea aso mo le aiga atoa.
“Ia o lenei lotu fa’afetai ua loa tausaga o fa’atinoina e si o matou aiga, ma ua silia nei ma le 100 tausaga,” Fata Malifa.
“E pei ona silafia ai, ia o lo’o ua matou fa’aauauina mai lava e o’o mai le taimi lenei, ma o lo’o ua talosia ai le tele o fanau o lenei aiga aemaise ai le aga atu ai le lumana’i ma lenei tausaga fou ua amatalia.
“E le’o auai mai uma si o matou aiga, ona o nisi o tuatuano’a ae o le agaga maualuga lava o le avanoa taua e talosia ai vaega uma i luma o le Atua.
Na ia fa’ailoa o lea sauniga lotu a le aiga o se fa’amanatu foi lea mo i latou uma i le taua o le omai fa’atasi i le agaga e tasi ma le tino e tasi e fa’afetaia ma talosia ai luma o le Atua o fuafuaga uma.