Toe fa’amanatu Tuilaepa i Fa’auluuluga
I le Polokamalame a le 2AP ma le Palemia i le vaiaso ua tuna’i, na toe fa’amanatu ai e le Afioga i le Alii Palemia, Tuilaepa Sa’ilele Malielegaoi i Fa’auluuluga o le Malo ma le atunu’u atoa le taua o le vaiaso o Tatalo ma Anapogi i le amataga o tausaga ta’itasi.
“Ia o le tu’ualalo lava lena i faipule, aua e le fou foi ua uma na fa’asalalau, e pei o le agaga foi lea aua ua silia ma le 20 tausgaa o tatou fa’avagavaga pea le tulaga lenei o talosaga ma anapogi,” lana saunoaga i le taimi ma le Polokalame a le 2AP.
“E tatau lava ona fa’ataua e lo tatou atunu’u , e le na’o upu e tatau ona fa’atino ma o le ala lena e fa’afetaia ai le fono a ekalesia o lo’o galulue so’oso’o tau’au ma le malo i le unaia o uiga lelei lea fa’akerisiano o le tulivae luma a le Atua i taimi ia i le amataga o le tausaga.
“ O lona uiga i le silafaga a le Atua, o lea ua fa’amumua ona o tatou to’ele tatou te tatalo e le gata i le fa’afetai i lona aumaia o fa’amanauiga i tausaga ua tuana’i ae o le toe fa’aolooloma’au e tu’u atu Samoa e ta’ita’i tatou le tausaga ua amatalia..
“Ia e manatua o le isi lea anava o le ekalesia E.F.K.S. o le amataga o vaiaso a Ianuari i ekalesia uma e tulivae ai luma o le Atua.
Na ia fa’ailoa o le isi lea uiga matagofie i luma le silafaga a le Atua.
“ O lea ua amata mea ai le Fono a Ekalesia talosaga ma anapogi le atunu’u atoa.
“O le Katoliko e lotu i aso uma e amata atu i a Ianuari e tau i a Tesema , o le fa’atumutumuga lea o talosaga o sauniga Lotu o le Katoliko e fa’atino ai le Sakalameta ole Talisuaga.
“Ae pei o lotu fa’atasi lea i ekalesia uma e le tau matea le ono fiafia o le Atua e silasila mai se atunuu e fa’amuamau le Atua e tusa ai ma fa’avae.
“E le afaina le tele o tuatuagia le ma’alofia a faipule ma pule sili ae aga’i tonu la’u tusi lea na ave i a’i latou lae avanoa ae le’o omai fa’ataua aso nei, aemaise o pule sili, o lima taumatau a le malo e tatau ona ave fa’ata’ita’iga lelei i tagata.
“O le mea e i ai ta’ita’i o le malo e tatau ona i ai, e le mafai ona laulauvivilu o oe le fa’auluuluga a le malo ae o’o mai loa mea ia ese mea o ta’ita’i ese mea e o ai fa’auluuluga.
“ O le mea lena na ave ai la’u fa’amanatu, e le tu’ufaua mo mea fa’auluuluga leaga aua o le isi lea tiute o a’u, e tatau ona fa’amanatu i a’i latou nei, o mea e i ai ta’ita’i e i ai ma latou aemaise ai le taua o le tatalo fa’atasi.
“O le a le silafaga a le Atua ae silasila mai ua na’o nisi ae le auai uma, ou te ta’u atu lava i a te oe, i le taimi lenei o la le e matua afaina le tele o atunu’u ma lologoi ae a le mea lea tupu ia Samoa?
“E la le taeao ae timu le afiafi, e o’o le fua mai o la’au e fua mai ona tau,o fa’amanuiaga le tele o mea’ai, ae lea malu puipuia tatou e tupu ai le manatu e le’o fua ia o fa’amanuiaga ma tatalo lea tatou te maua.
“O la’u tatalo ia to’a’aga ta’ita’i ekalesia, a o’o le taimi tau fai tatalo fa’atasi ma anapopogi fa’atasi ia mulimulita’i i le vaega ua faataoto vaega taitasi.
O le vaiaso na se’i mavae atu na maua ai le Samoa Observer le tusi atu a le Palemia e Fa’aululuga ina ia tautuana lea vaiaso taua.
I lea tusi na kopi ai ma le kapeneta lea na ia fautuina malosi ai i latou e fa’apea;
“Ua faaiuina i le asō le vaiaso o tatalo ma anapogi a le atunu’u na taulamua ai le Malo ma le Fono a Ekalesia Soofaatasi i Samoa.
“Ou te faafetai atu i Faauluuluga uma sa auai ma Matagaluega na peseina viiga o le Atua o nei sauniga.
“O la’u matau e le atoa se toasefulu o CEOs na auai.
“ E le fou le mea lenei i tausaga taitasi, o CEOs masani lava nei o loo matou vaai i ai.
Na ia fa’ailoa i lea lava tusi i fa’aululuga e tatau ona fa’ataua vaega nei aua le aga’i ai lumanai.
“O le sauniga lenei tatou te o ai i luma o le Atua e alofagia le folauga a le atunuu ma muaau ma muliau iā tatou galuega mo lenei tausaga fou.
“Ia aua nei galo ia te outou o tou tofiga e mai i le Atua. O upu o le Tusi afai tou te faamaoni i mea iti, e tofia outou e pulea mea e tele.
“O lona uiga o soo se Fauluuluga e le fatauaina ma mama ia te ia le Atua, e le umi na i ai i tofiga nei. “E aumai lava e le Atua le auala e faatautau ai lou atigi tagata i luma o le Kapeneta.
“Faapefea ona laulauvivilu o le Atua e faavae ai lo tatou Malo, ae na o upu gaogao ii.
“E lē afaina i latou o loo faataua toe i ai tuatuagia le maalofia, ae mo i latou sa avanoa ae le auai, toe fua nei se tapu.
“E le ulugia le Atua, ma e oo lava i o tatou laulu, na te faitauina uma. Ia fa’ataua lou valaauina ma lau tautoga i luma ole Atua.
“Ia fa’amanuia le Atua i feau o lenei tausaga fou, ma ia tautuana outou tiute faataitai aua le faatamala.
5 Ianuari 2018
Fa’auluuluga o Matagaluega ma Faalapotopotoga a le Malo
Ma Ofisa Faavae Faaletulafono
VAIASO TATALO MA ANAPOGI
Ua faaiuina i le asō le vaiaso o tatalo ma anapogi a le atunu’u na taulamua ai le Malo ma le Fono a Ekalesia Soofaatasi i Samoa. Ou te faafetai atu i Faauluuluga uma sa auai ma Matagaluega na peseina viiga o le Atua o nei sauniga.
O la’u matau e le atoa se toasefulu o CEOs na auai. E le fou le mea lenei i tausaga taitasi, o CEOs masani lava nei o loo matou vaai i ai. O le sauniga lenei tatou te o ai i luma o le Atua e alofagia le folauga a le atunuu ma muaau ma muliau iā tatou galuega mo lenei tausaga fou. Ia aua nei galo ia te outou o tou tofiga e mai i le Atua. O upu o le Tusi afai tou te faamaoni i mea iti, e tofia outou e pulea mea e tele. O lona uiga o soo se Fauluuluga e le fatauaina ma mama ia te ia le Atua, e le umi na i ai i tofiga nei. E aumai lava e le Atua le auala e faatautau ai lou atigi tagata i luma o le Kapeneta. Faapefea ona laulauvivilu o le Atua e faavae ai lo tatou Malo, ae na o upu gaogao ii.
E lē afaina i latou o loo faataua toe i ai tuatuagia le maalofia, ae mo i latou sa avanoa ae le auai, toe fua nei se tapu. E le ulugia le Atua, ma e oo lava i o tatou laulu, na te faitauina uma. Ia fa’ataua lou valaauina ma lau tautoga i luma ole Atua.
Ia fa’amanuia le Atua i feau o lenei tausaga fou, ma ia tautuana outou tiute faataitai aua le faatamala.
Tuilaepa Dr Sailele Malielegaoi
PALEMIA
Kopi: Minisita o le Kapeneta