Ripotia e Sarafina Sanerivi

Fa’aliliu e Maiava

O le Aso Tofi na talisapaia ai e le Tama’ita’i-Pule ma le Aigā-Faia’oga fa’apea tama ma teine-a’oga o le Laumua o le Kolisi o Vaimauga, se foa’i mai le Aiga o Lisa-Bridget Mapu e ala mai le Vaega ua fa’aigoaina, o le Lisa-Bridget Mapu Foundation (LBM). 

O lea foa’i e aofia ai masini-komepiuta, o tusi-faitau ma tusi-a’oga, o masini fai-ata ma le tele o isi mea-a’oga mo fanau. 

O le Fa’alapotopotoga lea – le LBM, na fa’avaeina e fa’amanatu ai le tama’ita’i o Lisa-Bridget Mapu, na maliu i le tausaga talu ai, ina ua 14 tausaga o lona soifua.

O lona uso-matua o Hannah Penina Mapu sa avea ma fofoga o lona uso fa’apea le Aiga atoa.  

 “O Lisa e iai lava lona agaga e fia fesoasoani i isi tamaiti-a’oga e lima-vaivai o latou aiga, ma o le mea lava lea na fa’ananau iai ma avea ma ona mana’oga tumau, e fia fesoasoani i tamaiti-a’oga Samoa, e ala i le saunia o mea latou te mo’omia mo le fa’aleleia o a latou a’oa’oga,” o le fa’aaliga lea a Hannah.

“Sa fuafua lava e Lisa e foa’ia ni mea-aoga e aofia ai mea ua outou silasila atu iai, mo le a’oga, ina ia aoga mo le si’itia o a’oa’oaga e le gata mo fanau nei, a’o fanau uma o le atunu’u.”

Na malia loa Lisa, se’e ane loa Hannah e fa’atino lea fa’amoemoe lelei.

“O lo’u lea fa’amoemoe, o le fa’aauauina o lana miti ma le mea sa fa’ananau iai a’o soifua,” o le fa’aaliga lea a Hannah.

“’Ou te talitonu o nei mea uma o le a avea o ni mea-faigaluega aoga mo fanau-a’oga a Samoa ma ua matou tatala ai fo’i le faitoto’a a’o se avanoa mo fanau-a’oga mo taumafaiga ina ia o’o i se tulaga maualuga i mata’upu e pei o le fa’aaogaina o masini-komepiuta ae maise lava i le gagana Peretania, e tele ai tomai ma agava’a mo’omia e tamaiti, e tapenapena ai mo so’o se galuega i le lumana’i. 

Na fa’aalia le agaga fiafia tele ma le fa’afetai o le Pule o le Kolisi a Vaimauga, o Alofa Kaisara ona o lea fo’ai taua ma le aoga.

Na ta’ua e le tama’ita’i-pule, ua leva ona iai le potu mo masini-komepiuta a le kolisi fa’apea fo’i le faletusi peita’i, o lo’o mo’omia pea nisi masini ma ni tusi se tele mo tamaiti-a’oga.

“O lenei fo’ai tele ua a’ao iai le LBM, o le a tele se fesoasoani e maua ai mo nai fanau-a’oga ma e momoli ai le fa’afetai tele i lo tou agalelei,” o le saunoaga lea a le Tama’ita’i-Pule.

“Ua mae’a fo’i ona matou sainia se konekarate ma o le a matou galulue fa’atasi ai e fesoasoani mo le fa’aleleia atili o tulaga tau-a’oa’oga o a matou tamaiti-a’oga. O se tulaga matagofie tele lea ma a’oga mo matou uma.”

O le foa’i atoa e aofia ai: Masini-komepiuta e valu ma totoga-fa’aleoleo, o le seti o uaea mo masini,  1056 tusi mo le fale-tusi o le A’oga, 12 pusa o pepa A4, e lua masini-lolomi, lua pusa o ‘api-a’oga ma le pusa o vase ma fisi-peni.

E le o le taimi muamua lea ua faia ai se foa’i a le Aiga o Mapu mo a’oga i Samoa nei. Sa faia fo’i sa latou foa’i mo le Kolisi o Alofi-o-Taoa ma le A’oga Tulagalua a Samauga i Savai’i ina ua asiasi mai i Samoa nei i le 2012. Ui o le taimi muamua lea ua faia ai se foa’i i le igoa, LBM Foundation.