FONOTAGA FA’ALETAUSAGA A LE MATAGALUEGA O A’OGA, TA’ALOGA MA AGANU’U

161 Hits

“A lē o nei..-..o ĀFEA?” O le autū lea o le fonotaga fa’alētausaga a le Matāgaluega o A’oga, Ta’aloga ma Aganu’u, ole’ā fa’ataunu’uina i le Aso Gafua 18 ma le Aso Lua 19 Ianuari 2016 i le potu fono o le TATTE i Sogi.

Ole’ā mua’i faia le Sauniga Lotu Fa’afetai i le Aso Sa 17 Ianuari i le itula e 4 i le afiafi i le malumalu o le Ekalesia Metotisi i Matafele, e talosia ai galuega amata o le tausaga ma fa’afetai ai i le Atua ona o galuega ua mae’a o le tausaga ua te’a. O le susuga i le fa’afeagaiga ia Rev Opapo Oeti, FS o le EFKS i Si’ufaga Falelatai e ta’ita’ia le sauniga.

E tatala le avanoa mo faia’oga uma o Samoa e auai ai, o le ta’imuaga lea o le galuega fa’alea’oa’oga o lenei tausaga.

Ole’ā saunoa le Afioga i le Palemia i le saunoaga ‘autū e tatala ai le fonotaga.

O le ‘au fai pepa e aofia ai le Afioga i le Minisitā o le Matāgaluega, o sui fa’apitoa o malo mai fafo i tulaga o a’oa’oga, o le ‘Ōfisa Sili o Pūlega a le Matāgaluega, o Sui o Fa’afeagaiga, Sui o Puleā’oga, Sui o Komiti Ā’oga ma nisi o afioga ua lautogia e fa’asoa o latou manatu i lu’itau ma ‘auala ese’ese e fa’aleleia ai le auaunaga fa’alea’oa’oga e si’itia ai le tomai o faiā’oga mo le aga’i i luma o le atina’eina o a’oa’oga i Samoa.

Ole’ā maua e sui auai o le fonotaga ma le matāgaluega se avanoa tāua e fa’afofoga ma molimauina le fa’asoa a se tasi o faufautua fa’apitoa o a’oa’oga mai fafo, le susuga ia Mr Fred Brooker. O lea saunoaga, ole’ā fesoasoani tele i le fa’atinoga o le a’oa’oina o alo ma fanau o le atunu’u. 

O le sui fa’apitoa o su’esu’ega fa’asoifua mālōlōina, le susuga ia Adonica Limon mai le Iunivesite o Utah i Amerika, ole’ā saunoa i le fesoota’iga o le ola maloloina ma le a’oa’oina lelei aemaise ona foi tomai e fesoasoani ai i le aufaigaluega mo lenei tausaga. 

E lua aso ua fuafuaina mo le fonotaga.

© Samoa Observer 2016

Developed by Samoa Observer in Apia