Tete’e atu sauaga i aiga

Tusia Ilia L. Likou ,

86 Hits

Toma Stowers.

Toma Stowers.

O le sauaina o tinā i totonu o aiga o se itu e ao lava ona taofia i le taimi lenei.

O lea le finagalo fa’aalia o le tamā i a Toma Stowers i le Fofoga o Samoa i le aso ananafi.

‘I a te a’u lava ia ua leva tele ona tula’i mai lea tulaga ma e o’o mai lava le taimi lenei o lo’o tausaili lava ni vaifofo.

“O lo’u ia iloa i ai, e leai lava se mea e faigata pe a o tatou loto lava i ai, o a fo’i ni vaega e tau fa’afefe mai ua tatau ona o tatou minoi ina ia vave ona fo’ia lea tulaga i nai o tatou tagata."

Na ia ta’ua o le tele o tausaga ua mavae sa faigata lava ona iloa nei faiga.

“Ia o nei vaitaimi ua matua’i saosaoa lava ua matua’i faigata lava."

“O lo’u iloa i ai, ia o i latou nei e mapu ai le tele o le mau vaega o lo’o mafai ona fa’ataunu’uina i le aso, aemaise lava i totonu o aiga."

"O i latou e latou te fa’atinoina le tele o galuega aua le lumana’i manuia o fanau, ekalesia ma le atunu’u."

“Ae o le faiga ua i ai nei, ua matua’i galo lava i a’i tatou aemaise le itupa o ali’i o tama’ita’i o le i’oimata, o i latou o feagaiga tausi i totonu o aiga."

“E tatau ona fa’apelepele i ai ma ia fai fa’alelei aua le lumana’i lelei aemaise o aiga manuia."

“Ua ese nei aso ua fai lava le sa’olotoga o le tagata lava."

Na ia ta’ua e ao lava i le malo ona silasila lelei i polokalame e omai le tv ina ia mafai ona atia’e ai aiga.

"E pei e manaia ae tu’u na tv bingo ae omai nai polokalame e ta’u mai ai nai tinā auala e ao lava ona uia aua lo latou saogalemu."

“E moni o lo’o alu polokalame a matagaluega i tua i nu’u ma afio’aga ae le’o mafai ona lava,  e tatau ona matua’i  fa’ateleina avanoa e a’ao’oina lelei ai nai tina aua le aga’i atu ai le lumanai."

© Samoa Observer 2016

Developed by Samoa Observer in Apia