“O si o matou aiga nei e leai se isi o faigaluega ae o lo’o ola i le fa’ato’aga lea o lo’o ma galulue ai nei ma  le tamā o le aiga.” Le tinā i a Siaunofo Pritchard, 35 le matua o le soifua o  Faleula-Uta.

O le fa’ato’aga a le tinā o lo’o tōtōina ai le kapisi, tamato, pi, kukama, isalaelu, esi ma le anoanoa’i lava o fuāla’au ‘aina.

 “E mo le silafia ai, ia ua fai si leva ona o ma faia lenei galuega o le fai fa’ato’aga ma ou te ta’utino atu, o  le tupe lelei ia.” Siaunofo Pritchard. 

 “O aso uma e $100 le tupe e maua mai pe a lelei lava na o fa’atau, a fa’aletonu lava ia ua alu i lalo i le $50…o le aso lenei ou te iloa ua ova atu ma le $100 aua o lea ou te le’i tago atu lava e faitau le tupe lea e  i totonu o le ato.

 “Ae a lelei lava le vaiaso ma fa’atauga ia e lalata lava i le $1,000 le tupe e maua, aua o le tele fo’i o kapisi o lo’o mafai ona ma fa’atauina atu i le tele o tagata pe kiliva sa’o fo’i i ai.

 “Ia o le tele o taeao e usu lo’u to’alua e le’i taitai, ia ona malolo fo’i lea i le aoauli , ia ona toe amata fo’i lea i le 1.

“O le taimi lenei o lo’o o matou tōtōina kapisi, ma e tele lava ina ave sa’o i faleoloa o lo’o fai mai a latou oka, ia o le uilipaelo lava o lo’o fa’aaoga e toso atu i tai … ia ae le umi lava ae fo’i mai ua uma.

 “O le tele o faleoloa e latou te fa’atau kapisi ma toe fa’atau atu mo se polōfiti.

 “O le taimi lenei e leai ma se fa’alelei palapala o lo’o o ma fa’aaogaina ae o taemoa o lo’o aumai ma fa’aaoga mo le palapala.

“O ma’ua e ma te le manana’o e  fa’aaoga ni vaila’au ia e masani ona fa’alelei ai le palapala.

 “Ia mo le silafia ai, na amata mai lava i nai mea laiti e pei ona i ai esi …ia o lea ua alu alu lava ua tula’i mai lava i se tulaga lelei.

Na ia ta’ua i le Fofoga o Samoa o le fa’ato’aga o se tupe maua vave lea ma e fesoasoani tele i le tele o vaega e mana’omia ai le fa’atinoina mo le fa’aleleia o aiga.

 “O le taimi lenei e to’atolu si a ma fanau ma o lo’o aoga le matua , o le isi to’alua e laiti.

 “Ou te talitonu lava a’u ia e sili ona tele tupe a le fai fa’ato’aga nai lo le tagata o lo’o faigaluega, aua a e fai fa’atoaga, ia e maua le tupe maua ai ma mea’ai.

 “O le taimi lenei ua tele se sao o lenei fa’ato’aga i le aiga, ua mafai ona toso le paipa, e 24 apa ua ma’ea ona fa’atau mai mo le fausia ai o le fale.