Taumafai pea aua le tausiga o le aiga

Tusia Vatapuia Maiava ma Ilia L Likou ,

116 Hits

Fa’alagi Folasa, 21 tausaga o Toāmua-Uta.

Fa’alagi Folasa, 21 tausaga o Toāmua-Uta.

O Fa’alagi Folasa, 21 tausaga o Toāmua-Uta na maua le avanoa i le Fofoga o Samoa e fa’asoa mai ai le tulaga e pei ona feagai ai mo le tausiga o lona aiga.

Na ia ta’ua o lo’o sologa lelei mea uma i le tele o taimi se’i vagana ai le fa’afitauli – o le leai lea o se tasi e faigaluega aua se tupe maua.

“Ia ou te talitonu lava a’u ia o le tau soifuaga o lo’o fai lava si taugata, ae o lo’o solosolo lelei lava mea uma tau i mea’ai…se’i vagana ai lava tupe aua nisi vaega e mana’omia.

“E pei o lo matou aiga ia e leai se isi o faigaluega i le taimi lenei.

“Sa i ai se tasi o tuagane na faigaluega, ia ae o le taimi lenei ua le toe faigaluega ae pei o ia sa fa’amoemoe ai i tulaga tau tupe mo si o matou nei aiga.

“I le tulaga lava ia tau i seleni, ia e le’o lava le fa’asoa i le tele o taimi, o le taimi lenei o lo’o maua ia mea’ai ae o le tupe ia…e leai.

“E pei fo’i lava na ta’ua ai muamua, ia o le tau o le soifuaga ia ua fai lava si taugata i le taimi lenei, ma e le’o taitai ona mafai ona fai se fa’asoa ona o le leai o se isi o faigaluega mo si o matou aiga i lenei taimi.

Na fa’ailoa e Fa’alagi, ‘Ia e mo le silafia ai , ia o le nofo ai i le fale ia e tele lava galuega e fai e pei o le faia ai o mea’ai a nai o’u matua.

“Ou te iloa o  le vaega muamua lava lena e fai i taeao, ia fa’atoā faifai atu ai lea o nai isi fe’au e masani ai e pei  o  tagamea ma tulaga uma fa’apenā.

 “Ae o lo’o maua lava mea’ai mai le ele’ele i aso uma, e tele lava ona itu e lelei ai aua e le maua ai se ma’i ia ma ola malolosi ai i taimi.

 

 

 

 

 

 

 

 

 

 

 

 

 

 

O lo’o fai lava ma tōtō atu nai mea tōtō e tua atu ai le aiga i nisi o taimi aemaise lava pe ā le lava le fa’asoa.

Ua savali nei ma le lima tausaga talu ona nofoia e le aiga o le tama’ita’i Fa’alagi Folasa le afio’aga i Toamua-Uta.

“Ia e le’o i ai lava se fale mautu e aga’i i ai i le taimi lenei, ou te iloa ua tele le fia fa’atino o vaega nei ia ae e le gafatia ona o le utiuti o le fa’asoa.

© Samoa Observer 2016

Developed by Samoa Observer in Apia