Si’isi’i pea le maualuga o taumafaiga a le Fetu o Samoa

Tusia Mathias Huckert ma Fa’aliliu e Maiava ,

112 Hits

SAUNI MO LE TATALAINA O LANA ULUA’I ATA-VIDEO O MUSIKA: Ua mae’a ona pu’eina le ulua’i ata-video o musika a le Fetu o Samoa,o Romeo T. Sabbath, lea o le a fa’alauiloaina i le Aso To’ona’i i le faletalimalo o Taumeasina Resort.

SAUNI MO LE TATALAINA O LANA ULUA’I ATA-VIDEO O MUSIKA: Ua mae’a ona pu’eina le ulua’i ata-video o musika a le Fetu o Samoa,o Romeo T. Sabbath, lea o le a fa’alauiloaina i le Aso To’ona’i i le faletalimalo o Taumeasina Resort.

 Ua fetaui lelei le taimi mo le ali’i o Romeo T. Sabbath.

 Moni e fa’atoa 16 tausaga o lona soifua talavou, a ua na ‘ausia le tele o fa’amoemoega lelei e to’atele nisi e matutua atu, e na o le mo’omo’o ma talotalo e fia o’o iai. 

Tele fa’aaliga ma tauvaga na manumalo a’ia’i ai lea ali’i talavou, ua galulue fa’atasi fo’i ma nisi lauiloa i le lalolagi i tulaga tau-musika ma avea fo’i ma faia’oga o le musika mo isi.

O le taimi nei, o lona ma’ema’e lea ua ‘ausia ai se isi maualuga fou, ua mae’a ona pu’eina lana ulua’i ata-video o musika ‘ese’ese, lea o le a fa’alauiloaina aloa’ia a-taeao, i le Fa’aaliga o La’ei, le Samoa Sinnet Fashion Show. 

Mo Romeo, o se tasi na soifua mai ma se taleni.   

 “Mai lava i le taimi fa’atoa tolu ona tausaga, e fiafia lava Romeo e pese,” o le fa’aaliga lea a lona tina o Ruby Misa Sabbath. “O se taleni na fanau mai lava ma ia, e atoa ane le lima o ona tausaga, a ua pese i luma o le ‘aulotu i le falesa.” 

O le atoa ai o le sefulu tausaga talu ona pese, a ua lava-tapena Romeo mo le lu’itau tele o le a la fa’afeagai: le Sa’iliga o se Fetu o Samoa (Star Search). 

I le sa’iliga o se fetu o Samoa talu ai – i le taimi fa’atoa 15 ona tausaga, a ua mafai ona finau ma isi sui-tauva e silia i le 200, lea na ta’ua, o le tauvaga aupito to’atele lea sa va’aia, talu ona amata lea tauvaga i Samoa nei. 

Leai se  sui-tauva e ‘ese sona fa’ananauga na iai – ina ia manuia ma aga’i i luma i le pisinisi tau-musika.

Ae pei lava o ‘upu masani, e le mua uma ni va’a. 

I le Sa’iliga Fetu o Samoa i le tausaga i tua atu, na sola ai Romeo ma le manumalo. Ae ui i lona manumalo, e le’i o’o ai lava sona manatu e fa’atino sea galuega, o pu’ega o pese ma naunau ai loa e fa’aaoga lana taleni  -  lona si’ufofoga ma amata iloa atili ai ma maua lona malosi e fa’aauau ai i se isi la’asaga i luga atu. 

Ioe, na fa’aaoga tatau lava e Romeo lea avanoa. Na matauina ma iloa e Pieter Tuhoro, o se tama-pese e fa’amautu i Niu Sila e iai lana pisinisi tau-musika,  lea na va’ai Romeo i lana ulua’i pese i se koneseti a le aiga sa faia i le Falekalapu o le Apia XClub, ma fa’amautuina ai loa lona lumana’i e avea o se ali’i-musika fa’aPorofesa. 

I le tausaga nei, ua iai fo’i se isi la’asaga fou o lona taumafai, o le fa’alauiloaina lea o lana ulua’i ata-video o musika. O le a fa’atinoina lea fa’amoemoe i le Fa’aaliga o Laei (Sinnet Fashion Show) a-taeao i le faletalimalo fou, le Taumeasina Island Resort.

Mo Romea – o lo’o a’oa’oina pea i le Kolisi o Fa’atuatua i Vaitele, o lagona ua fa’aosofia atili ai lona taumafai, ona o se tasi lea o lu’itau e ao ona finau iai.

“O ‘upu  o a’u pese, o lo’o taumafai lava ina ia talia ma lagona e aunoa ma ni a’afiaga o le ‘ava-malosi, o fuala’au-fa’asaina, o sauaga po’o fe’ese’esea’iga  fo’i a tupulaga pei o a’u, lea ua o’o i se tulaga ma’ale’ale”. 

O le aoga o le musika i lona olaga, ua suia ai lana va’ai i le taua o le tele o tu ma aga ma talitonuga e ao ona aloa’ia. “O le musika o se gagana fa’ava-o-malo e afua mai le fatu, e leai sona muta’aga po’o ni tua’oi, ae o’o-o’o i tulu’iga i tua atu o tu-ma aganu’u, le matua o le soifua, o ituaiga-tagata, o talitonuga ma le soifuga masani.”

O saunoaga a lea ali’i talavou talenia, ua tilofia ai se lumana’i manuia o Romeo Sabbath, e fa’aaogaina ai lana taleni lea ua fa’amaonia i le tele o tulaga lelei sa ia ‘ausia muamua.

© Samoa Observer 2016

Developed by Samoa Observer in Apia