O LA’U TALA FO’I

15 July 2016, 12:00AM

1. Matauina i Tala Fou se ulutala fai mai o le ‘fetuleni mai o tagata mai fafo- ua matua popole ai-ma o le manatu faaalia lea o se tamaitai faipisinisi o Nu’uausala Sionaia. Ae fai mai le manatu o se alii e ona se faleoloa i Faleasi’u-‘e o’o mai le taimi o le a faamalosia ai tagata e pei o ia –e faatau atu fua o a latou faatoaga i luga o alatetele-ae faatino e tagata mai fafo faleoloa e faatau ta’itasi ai oloa….!

I sana faamatalaga la i le Samoa Observer-fai mai Nuuausala -o le lolofi mai o tagata mai fafo-aemaise ai lava tagata Asia-ia ua amata ona latou faatauina faleoloa o le atunuu-ua matua faapopoleina ai o ia! Ae fai mai lea alii-‘o lona faanoanoaga sili -ona o uiga o le faigamalo-fai mai o i latou tonu lava ia o loo tatalaina le faitoto’a i nei tagata ese- e fai a latou pisinisi iinei…..!

Ia-afai la o le finagalo faaalia lea o Nuuausala-o lona uiga la- “ua afaina uma ai lava pisinisi a nai tagata Samoa! Afai la ua o’o atu lea tulaga i nuu i tua-o lona uiga-ua matua afaina uma lava faleoloa o nai tagata Samoa matitiva…!

O le fesili la-o le a la le tatou mea a fai nei i ai? Ana moni ma faamaoni le atunuu atoa e tusa ai ma lea tulaga-aemaise ai o le mativa ma le le tagolima lea ua sasao faa-afi  nei i totonu o le atunuu-o le tonu lena sa tatau ona tatou faia faatasi i le faiga-palota ua mavae atu nei!

Ae o le toe laulau mai la o nei faafitauli-o le upu moni lava-‘e tuua’ia lava  i tatou uma lava i lena mea! Aisea? Leaga foi o le atunuu atoa e ou le Malo-se le o se Malo o le HRPP! Silasila foi I atunuu malamalama I fafo-a latou manaomia loa se faigamalo e manuia ai-e sui lava e latou e ala ia latou palota.!

Ae o tatou-e faaaliali atu loa le tupe-galo- loa  ma le mativa ma le fia’ai i aso uma-ae palota i le mea e atili ai ona oti! O le a sou taofi? 

2. Matauina foi i Tala Fou se ulutala fai mai ua ‘manumalo Leoleo” i le taua ma vailaau faasaina…! O lea taua i le matau atu i ai –sa taiulu ai lava le Komesina o Leoleo o Fuiavailili Egon Keil. O le matau la i le ata na pu’e o lea taua-na amata o laau faasaina- ae o lea ua maua ai ma le anoano o auupega o ituaiga eseese…!

Ia e moni lava o laau faasaina e tusa ai ma le tulafono-ae o le talitonuga moni-o loo iloa lelei lava e i latou o totoina laau faasaina- e faasa i le tulafono-ae afai ua ala ona soli le tulafono ona o le mativa ma le le tagolima-o le fesili-“Faamata la e mafai e Leoleo ona matua titina ia mate -lea solitulafono?

Afai la o le fiaola ua mafua ai ona soli e nisi le tulafono-o ai a tio i nai tagata o le atunuu -o lea foi ua toe sii foi le tau o le soifuaga-ae o loo ti’eti’e ai lava ma le VAGST-lea o le a atoa le 40 tausaga o pologa ai le atunuu.Afai la ua matitiva le atunuu-o le pogai moni lava lena ua ala ai ona soli le tulafono-ona o le fiaola! O le a sou taofi? 

3. Matauina foi i Tala Fou fai mai ua fuafuaina se siitaga o totogi mo Asiasi A’oga-ma o lea ulutala e faasino i le Matagaluega o A’oga, Taaloga ma Aganuu! O le fesili la-‘o ai tonu lava ia e gafa ma le matafaioi o le a’oa’o o fanau a le atunuu i aso uma?

O Faia’oga poo Asiasi A’oga? Afai la o le matafaioi lea e patino i Faia’oga-aisea ua le amana’ia ai faia’oga uma o le atunuu? E mafai e le siitaga o totogi o Asiasi A’oga ona faaleleia ai taunuuga o suega a le fanau e pei ona faaalia i se taimi e le’i mamao atu?

O le manatu la e faatia atu mo le silafia-“E na o le lua lava matagaluega a le Malo e seaseā lava ona faatauaina i soo se taimi e fai ai se siitaga o totogi mo tagata faigaluega a le Malo!O ai ia matagaluega? O le Matgaluega o A’oga ma le Matagaluega o le Soifua Maloloina!

O le a le pogai? O le tali e mafai ona maua mai le faigamalo! Ae ui o lea-afai e faatauaina le poto ma le soifua maloloina o le atunuu-o se mea tatau la ona faainaelo i le Matagaluega o A’oga ma le Matagaluega o le Soifua Maloloina? O le a sou taofi? 

4. Matauina foi i Tala Fou se ulutala fai mai –“Ua toe faaui i tua moliaga e faasaga i ni alii Saina Fai-pisinisi-ma o ia moliaga e faasaga i le faaleagaina ma le loto i ai- ma ni moliaga se fa tau le faa-auupegaina.

E ui lava la ina ua toe faaui i tua lea mataupu-ae o le fe’au mo le atunuu atoa-“ia matua faaeteete lava i nei aso-ona o le anoano o tagata ese ua i totonu o le atunuu-ma o tama foi nei -e le manaomia lava le tele o faamatalaga-ae tago loa i le mea malosi-ona maumau ai lea o soifua o le atunuu!

O le mea sili lava-o lea ua amata ona aliali mai uiga o tama nei e faataga e le faigamalo- ona o mai i totonu o le atunuu-ae o le mea e sili ona taua mo le atunuu atoa-“ ‘aua tatou te faasolo nofo-ae alo mai leaga ua lamatia outou soifua ma o matou ola –ona ua toatele tagata eseese ua faataga e o mai i le atunuu! O le a sou taofi?

15 July 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>