Sa’ilia le gaoi na avea le Fanafanua o le Taua Muamua a le Lalolagi

Tusia Sky News - US Team ma Fa’aliliu e Maiava ,

146 Hits

UA TOE MAUA: Le fanafanua na gaoi.

UA TOE MAUA: Le fanafanua na gaoi.

O lo’o sa’ilia nei e Leoleo i Kalefonia i Amerika, se ali’i o lo’o masalomia na ia gaoia se fanafanua mai se faletele sa teuina ai, ma fa’atau atu i se tasi e le’i silafia o se mea-gaoi. O lea fanafanua-tuai, o se a’upega-mamafa sa fa’aaoga i le taimi o le Taua Muamua a le Lalolagi.

O lea fanafanua na toe maua i le ogatotonu o Me talu ai, ina ua va’aia e le na fa’atauina i le $1,200.00 (£832 pauni), se ripoti o le gaoia o lea mea-tau, i luga o Tala Fou a le Televise Kalefonia. 

O le Aso Tofi talu ai, na fa’alauiloaina ai e Leoleo i Richmond le tagata tonu o lo’o masalomia i lea solitulafono, o le ali’i o Dezi Adsuara e 44 tausaga le matua.

Na ta’ua e Leoleo, ua maua e vaega su’esu’e ni “molimau maumaututu” e fa’amaonia ai, o Adsuara tonu le gaoi, lea e masani ona fa’aaogaina le isi ona igoa o Roland Joseph Garcia.

Na ta’ua fo’i, na fa’aaoga e Adsuara se loli-piki’apu e toso ai le fanafanua e tasi le tone le mamafa, mai le Faletele mo Fitafita o le Taua i Richmond, i le vaveao o le Aso 01 o Me.

O le fanafanua lea sa ta’atia ai lava i tafatafa o le Faletele lea, talu mai le tausaga e 1947.

E valusefulu-afe tala ($80,000.00) le tupe ua ofoina atu mo le pu’eina mai o Adsuara e loka. 

© Samoa Observer 2016

Developed by Samoa Observer in Apia