Le Ulu-felefele ma le toea’ina

By Fa’aliliu e Maiava 15 June 2016, 12:00AM

Toe mafaufau tasi lava…O le ali’i-talavou o Pili na a’oga i se iunivesete, sa fa’aigoa e nisi o se tagata “agaga-mama” po’o le “ulu-felefele.”  E matua u’umi ma felefele lona lauulu, o ona lavalava masani lava e ‘ofu i aso uma, o le mitiafu-masaesae, le ‘ofuvae tuai ma leai ni ona se’evae.

E fa’afesaga’i lelei le lotoa a le iunivesete ma se falesa i le isi itu o le ‘auala. O tagata e aga’i i le ekalesia lea, o tagata maumea ma tagata matutua e matua la’ei mama lava. E manana’o fo’i e fesoasoani i tamaiti-a’o’oga i le iunivesete peita’i, e le matua manino pe fa’ape’i ona fa’atino lea mea o lo’o manana’o ai.   

O le tasi la aso, na tonu ai i le ali’i o Pili, o le a asiasi i le ekalesia lea e tu-lalata i lana a’oga. O le mea masani lava lea a Pili, o le ‘ofu o ona lavalava nei, le ‘ofuvae-tuai palapala, o le mitiafu masaesae ma le ulu-u’umi e matua ve’uve’ua.

E o’o atu Pili, ua amata le sauniga a ua matua tumu lava, savalivali atu loa e tau sa’ili sona nofoaga. Na matua tete’i le ‘aulotu ma le-mautonu, ma tulimata’i le ali’i-talavou lavalava palapala toe ulu-felefele e le selua. Na o’o lelei Pili i luma e le’i maua se nofoa avanoa, ona saofa’i lemu ane lava lea i luga o le fola o le fale, e fa’afeagai tonu ma le faife’au. Leai se tagata na faia muamua se mea fa’apea i le falesa lea! A o le taimi lea, ua matua le-fiafia uma le ‘aulotu ona ua avea Pili ma fa’alavelave o fai le lauga a le faifea’u.  

Na va’aia e le ‘aulotu le tiakono toea’ina o le ekalesia o savali atu i luma o le falesa ma fa’apea uma ai: “E le tu’ua’ia le tiakono, e tatau lava ona fa’asa’o le ali’i-talavou le-mafaufau lea.” Na mata’i uma e le ‘aulotu le tiakono.

E o’o lava i le faife’au, ua taofi lana lauga ina ua o’o atu i luma le tiakono toea’ina. Ae na matua fa’ate’ia tagata uma, ina ua va’ai atu ua tu’u-‘ese le to’oto’o o le tiakono ae nofo-malie ifo i le fola o le falesa i tafatafa o le ulu-felefele la’ititi lea. E le’i mana’o le toe’aina e nofo to’atasi na o le ali’i-talavou lea ma foliga ai e le talia lelei i totonu o le falesa. Na suia uma lagona o tagata sa i le lotu, o nisi na i’u lava ina maligi lemu ifo loimata i le o’otia. Ae saunoa mai loa le faife’au: “O la’u lauga na fai atu nei, ‘ou te lagona e leai se tasi o manatua. A o le mea ua ‘outou silasila nei iai, o le a le-mafai ona galo!”  

Uso, e le taulia ni la’ei ma va’aiga, pe tele fo’i ni au tupe ma lelei lou a’oa’oina. E le afaina ou sese ma fa’aletonu sa fai muamua. Ae fa’amagalo ‘Oe ma alofagia fo’i e Iesu Keriso, lou tagata i lou tagata ma le tulaga o e iai nei.

Ioe, tatalo nei ia te Ia e fa’amagalo ‘Oe ma pulea e Ia lou ola atoa, ona Ia avatu lea ia ‘Oe o Lona Alofa fa’amaoni, Lona Filemu ma Lona malosi e te mo’omia e sui ai lou tagata ma e soifua ai i Ona ala i aso uma. Toe mafaufau tasi lava…

By Fa’aliliu e Maiava 15 June 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>