O LA’U TALA FO’I -

15 June 2016, 12:00AM

1.Matauina i Tala Fou le uiga ese foi o aga a se alii fofŏ ma le faiga o lana fofŏ! E aliali mai e le tasi se matāfaioi a lea alii foma’i! Sa tatau la ona le faaigoaina o se foma’i o tagafitiga faa-Samoa leaga o lea e le o fofoina nisi ae toso e pei la o sia teine na fai i ai ana faiga.

Maumau la pe ana faapea e resitala foi ma fomai o gasegase Samoa-semanu e le mafai ona toe avea ai ma fofō Samoa ae avea loa ma fofō toso teine! E mafua la se manatu ona afai e fai mai o le foma’i Samoa-ona pau lena o lona faiva- e tatau ona fai-ae le o le toso teine.

O le a la le tulaga e o’o i ai pe afai o le faiga lea o fofō Samoa o loo i ai nei?O lea ua le avea ma foma’i e faamaloloina tagata mama’i- ae ua avea ma foma’i e faaleagaina tagata mama’I ma tagata e le mama’i!. E tatau la ona talia nei ituaiga o foma’i Samoa? O le a sou taofi?

2. Matauina foi i Tala Fou le faaaliga a le Palemia e tusa ai ma le faatuatuaina o le HRPP e le atunuu e tusa ai ma le faaiuga o le Faiga Palota Lautele talu ai nei-ma le mafuli o le iuga o le Palota i le filifiliga o Sui Faatutu o le HRPP. O lea la faaupuga-ua tulai mai ai- le tele o fesili-pe afai e talitonu o le Palemia-o le faamaoniga lea o le faatuatuaina e le atunuu atoa o lana faigamalo. Afai la e moni lea taofi-o le a le pogai o le tele o faamasinoga na fai ina ua uma le faiga-palota lautele? E faapefea faiga faatosina i le taimi o le Palota e pei ona ta’ua e le tele o tagi na faaulu e isi sui faatutu?

A tatou tilotilo foi la i ia faamasinoga na fai e uiga i le Faiga Palota Tele talu ai nei-sa le mafai ona faatino le amiotonu-aua ua avatu le aganuu e teuteu ai-ina ia ‘aua lava nei aliali mai i luga ia faiga pi’opi’o! A tatou toe tilotilo foi i luma mai o le Palota Lautele talu ai nei-‘sa le mafai e isi sui faatutu ona tauva i le faiga-palota-talu ai sa faaaoga le pule a nuu ma itumalo e taofi ai latou mai le tauva i le faiga-palota lautele talu ai nei! A faapefea la aia tatau a na sui faatutu-ae o lea ua avane le aganuu e taofi ai? O le fesili la-faamata e maua e le HRPP lea aofa’i o palota pe ana fai le amiotonu ma le faamasinoga? O le a sou taofi? 

3. Matauina i Tala Fou fai mai o lea ua tofia se Pule Fou o le Faalapotopotoga o Eleele a Samoa-ma o le alii lea o Ulugia Petelo Kavesi-lea sa avea muamua ma Pule o le Pulega o le Faalapotopotoga mo Taui o Faalavelave Faafuase’i! O le fesili la-afai o lea ua tofia Ulugia e pulea lea Faalapotopotoga-o lona uiga-o le a faataatia ai lava le gaosa lea na tulai mai lea Faalapotopotoga i le taimi o le MInisita o Tupe sa i ai ma le Ofisa Tau Pulega lea ua suitulaga ai nei Ulugia?

O ai la na te totogiina le faitau miliona ma miliona o tupe a le atunuu na faaaoga sese  ma aafia i faiga pi’opi’o e pei ona lipotia e le Pule ma Su’etusi Sili? O le tali mautinoa lava- ‘e i’u lava ina toe totogi foi e le atunuu ana tupe ia- ua goto i le moana sausau talu ai ai faiga a le Minisita o lea Faalapotopotoga! O le a la sou taofi? 

4. Matauina foi ma le fiafia le faataunuuina manuia o le Tauvaga o Tusiga-Tala a le Samoa Observer ma le tufatufaina atu o faailoga mo e na lautogia. E uiga ese foi le matagofie o saunoga timai mo le fanau na tauva-a le Afioga i le Faatonu Aoao-le Afioga a Gato’aitele Savea Sano Malifa e uiga i le aano moni o lea tauvaga-ma le una’i malosi ina ia maua le tomai e ati a’e ai- ae le o le faatama’ia ai. O le latou matafaioi o le tusi lea o tala..! Ia atonu o le a mulimuli ane foi ona latou iloa lea-o le tusi o mea moni- e masani ona le fiafia i ai nisi-aemaise ai lava pe afai o se lipoti a tusitala e aafia ai i latou..!

Ae ui o lea-e tatau foi ona iloa e le fanau-e le avea le tete’e o tagata i le moni o lipoti tusitusia ma ala e faavaivaia ai latou-ona fai mai le upu “E malosi le mea moni-a le moni le mea malosi! Ia alo ane la’ia i outou faiva-ma fai mai le upu a le ‘au-matutua-“O le fai so’o lava o le lelei foi lena! O le a sou taofi? 

15 June 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>