TALA FAASOLOPITO O SAMOA MAI LE AMATAGA-

161 Hits

Apia, i le tausaga 1904.

Apia, i le tausaga 1904.

O le 1904 na fai ai se suiga. Ua matua iloga le tulaga manuia o le kolone, ma ua faateleina foi tiute e aafia ai Solofa e tusa ai ma tofi e lua o loo ona tauaveina, ma ua lē mafai ai e le tagata e to’atasi ona tauaveina ni tofi se lua i se tulaga lelei, aemaise ai le faatinoina o le amiotonu.

O le mea lea na se’e ese ai loa Sulusi mai le Tofi o le Faamasino Sili ae tuu atu i ai Dr. Schultz, ma sa avea foi ma Sui Kovana a’o toesea i Siamani Dr. Solf. Sa fiafia tagata Samoa ia Sulusi, ma sa faatinoina e ia le amiotonu ma le loto faamaoni e aunoa ma le popoi i uiga faaalualuō,faailoga-tagata ma le faailoga-lanu.

Ona o ia o se tagata sa naunau ia manuia le atunuu ma soifua fiafia tagata, o lea sa fiafia ai tagata i ona uiga tausaafia ma e faaaloalo i ai tagata uma, o ia o se tagatanuu lauiloa, faamaoni ma o se faamasino amiotonu. O le pogai lea e le’i umi ai talu ona galue i Samoa ae lolomi loa lana tusi o alaga-upu faa-Samoa.

O Dr. IMHOFF na ia umia se tulaga taua tau faamasino. O se alii talavou ae uiga ese lona sogasogā, ma e pei lava o se tulafono ia te ia-o ana faaiuga tau faamasinoga sa matua faafiafiaina ai tagata. O ia sa gafa ma le faafoeina o faamasinoga tonu i tagata Siamani ma isi tagata papa’e o le atunuu, faapea foi ma tagata e ou le atunuu.

Ele’i tele ni tausaga talu ona i Samoa, ae le’i umi sona taimi na tau faamasani ai , ae malamalama lelei i le tulaga o le atunuu o loo galue ai. Sa faasaga e a’oa’o le gagana ma faamasani it u ma aganuu a Samoa faatasi ai ma tulafono a le atunuu.

E ui lava ina nofomau i Apia, ae o le faatinoina o ona tiute i nisi taimi e malaga ai i Savaii ma isi lava vaega mamao o le atumotu. O le 1906 na tula’i mai ai se tagata soloitulafono o Samoa e igoa o Sitivi, lea sa faasalaina e ia e ala i le nofo i le falepuipui, ae na sola ese mai ai.

E masani tele le Alii Faamasino o Imhoff ia Sitivi ae o lona laki na sao ai ma le fasiotia o ia e Sitivi. O lea na tauto ai Sitivi na te fasiotia le Alii Faamasino o Imhoff, ae na lē saofia, e ui ina talepe e ia le fale o le Alii Faamasino i se tasi po, ae o le taimi lea ua uma ona fai le tonu a le Alii Faamasino o le a sui le fale e nofo ai.

Peitai na tuu ai e Sitivi ni ututau i totonu o lea fale faatasi ai ma se tusi o upu mataga, i luga o le laulau i totonu o lea fale, i luga a’e o se faasilasilaga ua uma ona ia lomia ma ofo atu se taui e tele pe afai e maua e se tasi Sitivi. Ae mulimuli ane, na fana e se tasi Sitivi, ma ua matua fiafia ai le to’atele o tagata na ia faamata’u i le fasioti. 

© Samoa Observer 2016

Developed by Samoa Observer in Apia