O le tutulu o le Maketi ua le fiafia ai se tamaitai faipisinisi

By Lanuola Tusani Tupufia 15 May 2016, 12:00AM

O  le maketi lea faatoa tatala talu ai nei e $10 miliona i Fugalei ua tutulu. O le mea moni e tusa ai ma tagata o loo faaaogaina, e tutulu i le taimi lava e tatala ai –ma o aso nei, ua le mafai ona latou toe nonofo lē leoa. 

O lea tutulu ua matua leaga lava ma e i ai aso ua matua le mafai ai e tagata e faatau atu oloa ona faagaoioi a latou pisinisi laiti, ma ua tupu mai ai ma le matua le fiafia ma le popole e le tatau ai.

O le mamafa o timuga i le Aso Lua ma le Aso Lulu o le vaiaso talu ai na toe faalia ai le mataga o le mea moni..O le taimi lena-na matua afaina ai Faafetai Tu’ifao, o se tasi lea o le sili atu i le sefulu tagata fai pisinisi na matua afaina ai ona o tutulu, ma ua le mafai ai ona taofia ai mea faatiga ua o’o ia te ia. “Ua ‘ou matua ita lava ona o lenei tulaga,” o lana faaaliga lea i le Sunday Samoa,”

“Ua tonu ia te a’u e faailoa atu faalaua’itele talu ai-na matou lagā lenei mataupu pe tusa o se tausaga ua mavae-ae leai lava se mea o faia i ai. I Aso nei-ua le mafai ona faatau atu a matou oloa-ona o le tafe mai o le vai i lalo i taimi uma e mamafa ai timuga.

“ O se mea uiga ese le mana’omia o i matou e totogi le lisi e ui lava ina le mafai ona faaali a matou galuega tau-lima ma tautau a matou ofu.” Fai mai Mrs. Tuifao ua uma ona latou tuuina atu lea mataupu i alii ofisa ia e aoina tupe mo totogi o lisi mai ia i latou ae peiseai e le kea i ai. 

“O taimi uma lava matou te faaseā ai i le ofisa (e noatia ai) e na ona latou o mai lava tutū iinei ma tilotilo i le taualuga ma fai mai o le a latou lipoti atu lea tula. E leai lava se mea ua tupu mai.”E tusa ai ma lea tamaitai, o le latou totogi o le lisi e $10 i le aso –o se matua tupe tele lava.

Ma a timu mo ni aso se tele, ua leai ni a latou pisinisi.Fai mai lea tina ua matua fiu lava i lea pulega ona o le le faatauaina o le latou talosaga. “Ua ou lagona o le matou talosaga ua leva ona tuuina atu ia i latou e leaga taliga,” o le faaaliga lea a le tamaitai.

“E ono le tele ni a matou tupe e maua mai iinei-ae le faapea e le taua o matou manaoga. “Pau lava lo matou mana’o ia toe faalelei le faafitauli a’o le’i to timu ona tapuni foi lea o a matou pisinisi me toe fo’i atu i aiga.”

I nisi taimi pe a naunau tele Mrs Tuifao mo se avanoa, e talosagaina e ia isi tagata e fai a latou laulau pe mafai ona ia faaaogaina se vaega o a latou avanoa. “E le mafai ona ‘ou faia lenei mea i aso uma,” o lana faaaliga lea.

“E le mafai ona ‘ou alu e saili se laulau ae o lea e i ai la’u lava laulau. O le laulau lenei ou te totogiina ai le $10 i aso uma mo ma pe a timu ma ua le mafai ona ‘ou faaaogaina. “E le o se mea amiotonu lenei” O le vaiaso talu ai na tapuni ai isi laulau e latalata ia Mrs Tuifao mo le toetoe lava tolu aso ona o le tutulu.

O le maketi i Fugalei o loo faafoe e le Faalapotopotoga o Taui mo Faalavelave Faafuase’i. Sa le mafai ona maua mai se manatu mai le Faalapotopotoga i le taimi o lenei lomiga. O le Maketi i Fugalei lea na afaina i feeseeseaiga ma uiga faatuai, na tatala ia Aokuso 2014.

O le ata muamua o se fale e fogafale lua ma o lona tau e $42 miliona. Ae ui o lea, ina ua tua’i ni faatuai faaumiumi, na toe sui e le Kapeneta le ata ma fai ai loa le tonu mo se fale fogafale tasi e $10 miliona lona tau.

O lona tatalaina o se musika lea i taliga o faifaatoaga ma tagata faipisinisi, ia e tatau ona lototele e tauivi ma le vevela o le la ma le timu mo ni tausaga se tele ina ia faatau atu fua o a latou faatoaga ma fua o laau eseese.

I le tatalaina, fai mai le Palemia o Tuilaepa e le o toe manaomia e faifaatoaga ona faatau atu a latou oloa ma fua o faatoaga i le vevela o le la ma le timu.   “E lava ma totoe avanoa i totonu o le maketi mo tagata uma,” o lana faaaliga lea.

O le maketi na fausia e le Qing Dao Construction.

By Lanuola Tusani Tupufia 15 May 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>