“Ia e manatua, ua le ola le pogai ia te oe, a ua e ola i le pogai”

Tusia Petaia Setu ,

1240 Hits

Petaia Setu

Petaia Setu

E lelei si fasi mea e ai ua magumagu a’o iai le filemu. O upu ia a le poto e faamatalaina ai le agaga faafetai i soo se mea ua maua. Tele pe itiiti, viia le Alii. Talia ma le fiafia.

O ai na manatu o le a sii le fale o Asomua i le mauga i le aso lenei e pei o gagana faafitifiti ma faaviivii a failauga o le atunuu. La lea ua nenee nuu ese. Ua maua fua faamanuiaga (f.15) ua faasiasia ai i fanau a le eleele. O le tuualalo a le aposetolo, ia e iloa, ma ia e manatua, ua le ola le pogai ia te oe, a ua e ola i le pogai.

Ua oo mai i si’ui o finauga a le aposetolo o Paulo. O le Iutaia, ua momomo le loto ona o Iutaia. O le aposetolo o nuu ese, a o lona aiga, nuu ma lona faasinomaga ua sili ona pele. O faamanuiaga o le ola ua mele.

Lele ua inu ai nuu ese! I le, o le vaega lenei o le mataupu nei o loo tautala ai Paulo e faamanino i tagata o nuu ese. E faigofie pe a faapea, o nuu ese, o le ola nai le oti. I le manatu o le aposetolo, o tatou nuu ese, o le olive vao - ua maua avanoa; o faamanuiaga.

O avanoa maua fua. O manuia ua le mai so tatou lelei. Peitai, ona ua masae le laufai a le Atua ma lona nuu, ona ua le faatuatua le nuu o le Atua i le Atua. Lea ua sao ai i totonu nuu ese.

Manatua foi o Isaraelu sa faatusaina e nisi perofeta o le Feagaiga Tuai, o le olive a le Atua. Auā o le laau lea e le gata ina taatele ae matuā tele lona aoga i le lalolagi Metiterani.

O la Ieremia, “Na faaigoa oe e Ieova, o le olive lauolaola e matagofie, e lalelei ona fua” (Ieremia.11:16) E tutupu a’e ona tatupu e pei o le olive lona matagofie” (Hosea.14:6) I le, ua manatu la Paulo, o nuu ese, o lālā o le olive vao ua faapipiiina mai i le faatoaga olive, o Isaraelu lea.

I le vaai a le aposetolo, o nuu ese o loo i fafo i le laueleele o le toafa ma le pouliuli o le vaomatua, peitai o le asō, i le alofa tunoa o le Atua o Isaraelu, ua faapipiiina mai ai i latou i le tamaoaiga ma le manuia o le faatoaga o olive.

Peitai ne’i faualuga nuu ese ma manatu, ua fa’ieseina e le Atua Iutaia ina ia faapipii i latou i faamanuiaga o le ola fou. Leai. O le oti o Isaraelu, o le ola lena o nuu ese. Pe ana le fouvale Isaraelu i lo latou Atua, po ua le oo le manogi o le ola i nuu uma o le lalolagi.

O lona uiga ua manino lelei, o Isaraelu le pogai o faamanuiaga i lo tatou ola. Auā o folafolaga ia a le Atua ia Aperaamo (Kenese.12:3; 18:18) Ina nei mitamita nuu ese ma o tatou faitauesea lā moni o le olive a le Atua.

O le fautuaga a le aposetolo i le mataupu nei, ia faamaoni i le Alii. Ia talitonu ma tumau ai i le faamaoni o le Atua. Auā afai ua faigofie ona gauieseina e le Atua lona nuu, o lā moni ia o le olive ona o le masalosalo ma le lē talitonu, o le mea fua lava foi la i tatou, auā ua na o ni lālā ua faapipii.

E le na ona lapatai ma faufautua le aposetolo mo le lelei faatumauina, a ua ia faamanatu mai foi, o loo iai le faamoemoe o le nuu e ui ina ua faateaeseina. Afai e tumau nuu ese i le faatuatua, o le a tumau ai pea foi i faamanuiaga ma le agalelei mai o le Atua.

Auā afai e salamō le nuu o le Atua ma toe foi i lo latou Atua, o lona uiga o le a toe pipii lā moni i lona pogai. Auā afai ua mafai ona faapipii mai ma faaolaina le olive vao, se ā o le a faigata ai ona toe pipii mai lā moni o le olive?

O loo momooo pea Paulo i le aso e toe faafoisia mai ai le nuu i le mafutaga ma le Atua. Ia o moomooga ia o Paulo mo lona nuu. Ae faapefea oe? O ‘e taasȇ i le toafa poo ‘e malemo i se moana? Poo e pipii i le pogai, ia po ua e faapeapea atu ai

Samoa ma le au uso kerisiano e, o avanoa i le faaolataga o le mea sili lea ona tāua. A maua manuia viia le Alii. Faaaoga tatau lelei avanoa ua tatou maua mai le faaletonu ma le faatamala, mai vaivaiga ma faafitauli o le olaga o loo tatou fesēsēta’i ai, e faatonuina ai o tatou olaga ma faapipii atu ai lou tagata i le mafutaga ma lou Alii o Iesu, e ala i le talitonu ma talia o ia i lou loto e fai ma ou faaola.

Ua tatou iloa o le sesē o nei e a’oga ai taeao. E mafai foi ona faatonuina lou olaga i faaletonu o le isi. E lasi ma anoanoa’i o tatou faafitauli. O Iutaia, o le faafitauli tele lea o le galala o nuu ese i le talalelei o le faaolataga. E lima mau.

E ‘u e faasoa. E lima vale. E ‘ai Iloilo. E fuapau le alofa. E faatuāoi le vaai. E le tali tiga. E te silafia Samoa, o vaivaiga ia o le nuu filifilia, ua masaa ai i fafo le alofa faaola o le Atua. O manatu ia o isi aiga, o pulega faale nuu, ma le ekalesia kerisiano i Samoa.

Uso e, o fea o taumalua solo ai lou olive, o le vaomatua, poo le faatoaga a le Atua? O faapogai oe o le ola, poo taulamua oe i le faasola? O ‘e manatua le nuu o le Atua i au tatalo, poo faamuamua pea lava ma faamamafa ou mana’o? Poo e iloa o le fanau a Aperaamo na fanau mai ai ou manuia?

O le ala lea o le manatu faapea o Paulo, e leai se mea e tā’ua o se Faakerisiano pe ‘a le iai muamua se Faa-Iutaia. Ioe, o Iutaia le to’alafanau o le faaolataga. O le mănava ia o le talalelei ma le faakerisiano. Afai la sa fai Iutaia ma faafitauli, o faafitauli la ‘ia na maua ai e nuu ese le ola.

Le au faatuatua e, faafetai i le Atua i faafitauli ua ia aumai e fesagai ma tatou. E tofotofoina ai oe ma luiina ai lo’u vaivai. O nisi foi taimi ua tatou toilalo ma pa’u’ū i faafitauli. A o le pa’ū a le popo uli, o iai le faamoemoe e toe tupu (f.23)

O le faamoemoe ola, o loo taoto i le loto ua talitonu ma faatuatua i le alofa ma le faamaoni o le Alii lo tatou Atua. O lou avanoa lea e toe faapipii ai oe e le Atua i le matagofie o lana faatoaga. Samoa e, e le ‘alofia tatou i le ta’uleagaina ma le ta’uvalea! A o manu’ a lava e fȏfȏ-a-alamea. Salamō, Toe fuata’i lou ola ia Keriso Iesu, ona toe maua lea o mafutaga fiafia ma lo tatou Atua, o Lē na ia aumaia luitau o le soifuaga nei, e su’e malo ai le ola toefuataina i manuia e faavavau.

I le ma lenei, afai ua faasaoina i tatou ina ua lafoaiina le pogai, se a se mea tatou te fai ina ia toe faafoisia mai ai lē ua oti i la le agaga?

Amene.

E-mail: petaiasetu@gmail.com

7737063/7783782

© Samoa Observer 2016

Developed by Samoa Observer in Apia