O LA’U TALA FO’I

15 May 2016, 12:00AM

1.Matauina i Tala Fou-o lea foi ua toe sasa pala e le Palemia le Kolisi o Avele. O i latou la ia na sasa pala e le Palemia-o le Pule o le Kolisi-faia’oga-toe sasa pala faatasi ai ma matua o tamaiti a’oga o le Kolisi.

Fai mai o le taimi na faatino ai lea tulaga-o le taimi o se fono na fai i le Ofisa o le Palemia-lea sa auai le Pule o le Kolisi ma Faia’oga, matua ma sui o tama tuai o le Kolisi. O le faamoemoe la o lea fonotaga-o le tau sailia lea o se fofō i misa a Aoga-ia sa aafia ai le Kolisi o Avele.

A tatou tilotilo la i le ata lautele o lenei mataupu-e leai se tio i le Palemia! Aisea? Ia silasila la- e o’o lava i le Palemia ma lana Kapeneta-Sui Usufono o le Palemene-o le upu moni-sa a’o’oga uma lava!

A tatou tilotilo la ma fesili pe sa i ai ni mea faapenei na tutupu i o latou taimi i le a’oga-o le tali-“e matua leai lava”! Aisea? Leaga e tasi pe lava lo latou faamoemoe-“ia maua le aoaoina”! O le pogai lea sa le maumauina ai lo latou taimi e fai ai ni misa-ae fai na o le a’oga ma toe fo’i i o latou aiga i aso uma!

A faatusatusa la na aso ma aso nei-sa leai ni o latou seevae-ae sa savavali i lalo i le mu-tigitigi o le La i le taeao ma le aoauli pe a uma le a’oga. Sa leai ni a latou ‘lunch’ leai ni pasi e o ai ma toe fo’i mai-ma sa taunuu lelei uma a latou taumafaiga i a’oga sa aoaoina ai!

E leai la se tio i le Palemia! Aisea? Ua faafia ona tutupu nei misa-ae le o mafai ona taofia? O ai lea e pogai ai? Ua le gata ina auai tamaiti a’oga a ua auai fo’i ma isi tagata!O le fesili la-afai ua tausolomua i fanau a’oga ona faatupu vevesi i nofoaga faitele-faamata e le o le tulaga lena tatou te o’o i ai i le lumana’i?

Aisea ua le mafai ai e faia’oga o ia a’oga ona taofi lea mea mataga? O se upu la e faapea ua mafua nei mea uma ona o fesootaiga televavave o nei aso-o le a le mea a fesootaiga televavave o nei aso e fai i le fiailoa-tautalaitiiti ma le fiapopoto o tupulaga i nei ona po?

Afai la ua le mafai e pulega o ia a’oga ona togafiti lenei mea mataga ua aliali mai ia tatou fanau-e faapefea la ona toe togafiti i le lumana’i? O le a sou taofi?

2. Ua matauina foi i Tala Fou o lea ua taunuu mai i Samoa nei nisi o meaola mata’utia e pei o gata! Ia-ua silafia uma lava e le atunuu-e maua gata i Samoa nei i Asau ma isi vaega o le atunuu-ae le o se ituaiga lea o gata e ono lamatia ai le soifua lautele o le atunuu!

O le fesili la-afai o lea gata e le o se ituaiga lea o gata e masani ona maua i Samoa nei-o lona uiga la-o se gata mai fafo-ma afai la ae faateteleina-o lona uiga- e le toe saogalemu Samoa! Afai foi o se gata mai fafo-o le fesili-na faapefea ona taunuu mai i Samoa nei?

Afai foi o se gata na aumai faananā i totonu o le atunuu-o lona uiga la-e le o lelei foi ona faatino le auaunaga i le Malae Vaalele poo uafu-tau le siakiina o ato a tagata e malaga mai fafo-fua ina sao mai lenei ituaiga o meaola mata’utia i Samoa! Afai la e o’o atu lea gata i Asau ma fanafanau ai-o le a le mea o le a tupu mai? O le a la sou taofi? 

3. Matauina i Tala Fou le toatele o tagata agalelei mai fafo e ala ile foa’i mai o le tele o mea mo lenei atunuu. Ua toetoe lava o soo se galuega e faatino i lenei atunuu-e le mafai lava ona aunoa ma se fesoasoani o soo se ituaiga.

Ua matauina foi la se tasi foa’i i le Matagaluega o le Soifua Maloloina-ma o se foa’i talafeagai lea pe a fua i le taua o le galuega ma auaunaga a le Matagaluega o le Soifua Maloloina. Ae o le tulaga ua mautinoa i nei foa’i uma-poo ai lava le matagaluega poo le faalapotopotoga e ave i ai-e le o mafai ai lava ona faaleleia auaunaga a ia matagaluega!

Ona tulai mai ai lea o se fesili-“O fea o ave i ai nei fesoasoani? Afai o le Falemai Tele i Motootua e tapuvae tasi i ai le atunuu-o tatou vaaia ni suiga lelei? Afai o le tali e leai-o le fesili la-o le a le pogai? O loo silafia uma e Samoa le faatumulia pea o lea nofoaga i aso uma i le ao ma le po –ona o sailiga togafiti a le atunuu-ma o le mea ua mautinoa-o le tele lava o gasegase-e tali ao lava o tatali se fesoasoani ona o le toatele o gasegase-ae ausage le aufaigaluega. Afai o le Falema’i Tele lea o loo i Motootua-o lona uiga la-o lana auaunaga i taimi uma-e tatau ona sili atu i le lua afe pasene! O le a sou taofi?

4. Matauina foi i Tala Fou nisi o Faiga-Paaga fai mai ua manuia ai Samoa-ma o lea la manuia- e faasino i le aoaoina o nisi o tamaiti a’oga o le Iunivesite Aoao o Samoa- e nisi o tagata popoto mai le Iunivesite o Otago i Niu Sila.

O lona uiga la-o lea manuia e faasino i le aoaoina o fanau.Ae ia manatua la-e le ona pau ai lea o faiga-paaga a Samoa-e anoano isi faiga-paaga-ma o le tala lava lea o loo aumai pea-o loo manuia ai Samoa. Afai o ia fesoasoani uma e fai fua-ia atonu o le manuia moni lea-ae afai e i ai se mea faaopoopo e fai ma sao o Samoa-o lona uiga la-o ia manuia o Samoa- e faatoa mafai ona tino mai-pe a taunuu sea fuafuaga-ae le o le taimi nei!

O le a la sou taofi?

15 May 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>