Te’ena talosaga mo le fa’aleaogaina o tagi

By Pai Mulitalo Ale 15 April 2016, 12:00AM

Na fa’aleaogaina e le Fa’amasinoga mo Faiga-Palota, se talosaga a le Minisita Lagolago mo Feso’ota’iga ma Fa’amatalaga Tau Tekonolosi, o Lealailepule Rimoni ‘Aiafi, ina ia fa’aleaogaina tu’ua’iga fa’asaga ia te ia, ona o ni faiga-fa’asolitulafono fa’apea sa ia faia i le taimi o faiga-palota.

O le fa’ai’uga lea a le laulau o Fa’amasino sa ta’ita’ia e le Fa’amasino Sili, Patu Tiava’asu’e Falefatu Sapolu i le Aso Lulu.

O tu’ua’iga fa’asaga ia Leala sa fa’auluina e le sa avea fo’i ma Faipule o le Palemene muamua, o ‘Ale Vena ‘Ale.

O tu’ua’iga o faiga-fa’asolitulafono e fa’asaga ia Lealailepule, e afua mai i le le-agava’a o sui-palota o le itumalo o Faleata i Sisifo. Ua fa’ata’oto nei lea mata’upu e iloiloina i le Aso Lua, 19 o Aperila 2016.

Na fa’ailoa e Sarona Ponifasio, le loia o lo’o tula’i mo Lealailepule,  ana fa’apea e manuia le ua tagi nei i Faiga Palota ua mavae, e le taitai ona laga’ia ia tu’ua’iga pe fesiligia fo’i le agava’a o le ‘au-palota i le fa’amasinoga.  Na fa’aopoopo mai fo’i, o tagata-palota o lo’o fesiligia nei, o lo’o agava’a lava e palota i lalo o le tulafono.  Peita’i e le ‘auai Maiava Visekota Peteru, le loia a ‘Ale. Fa’ailoa e Maiava, o le to’atele o tagata-palota nei, e leai ni o latou so’otaga i le itumalo. Na ta’ua fo’i, e moni ua mae’a ona resitalaina i le lola-palota ma nonofo i totonu o le itumalo, ae leai lava ni o latou pi’itaga i le itumalo.  O Muriel Lui o lo’o tula’i mo le Ofisa o Faiga Palota, le itu-tete’e lona lua o le fa’amasinoga lava lea.

Na talosaga Muriel ina ia fa’aleaogaina tu’ua’iga fa’asaga i le Ofisa FaiPalota.

Na fa’aleaogaina e le Fa’amasino Sili le talosaga a le itu-tete’e muamua fa’apea fo’i le talosaga a le itu-tete’e e lua.

O le talosaga fo’i a le itu-tagi mo se poloa’iga mo mau o lenei mata’upu, sa fa’apea fo’i ona te’ena e le fa’amasinoga. 

Ua fa’atonuina nei e le Fa’amasino Sili le itu-talosaga, ina ia aloa’ia le tu’uina atu o tagata-palota nei ina ia ‘auai i le su’esu’ega o lea mata’upu. O le poloa’iga fo’i lea na tu’uina atu i le itu-tete’e, ina ia avatu uma molimau i le aso o le fa’amasinoga. 

Na fa’ailoa manino fo’i e le Fa’amasino Sili i loia a itu uma e lua, e tatau ona fa’ailoa i tagata-palota uma nei, i le Aso Gafua, 18 o Aperila 2016.

By Pai Mulitalo Ale 15 April 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>